Read Kok Borok HIBRU 5 Bible Online

HIBRU 5 - Kok Borok bible

HIBRU 5

¹Joto ochai bokhorok bini bororokni bere’-no chongjago, hakhe bo sumsokni bagwi barokna bai ratharna bagwi bororokni wngwi Kaitorni bwskango bachana berjak.

²Bo podrepodo’-no kebel wngwi phaijak ba si yarok bai lama korónairokno bo kwchang kwchang khe naiwi mannai.

³Bo sak se kebel wngma bai bo buini sumsokni bagwi simi ya, bini sakni sumsokni bagwi suda ma se ma ratharnai.

⁴Kebo sakno kotor khlaiwi ochai bokhorok wng ya. Ochai bokhorok wngma wng kha Kaitor ringwi chongma bai se, Aronbo omo hai kheno chongjago.

⁵Omo hai’-no Khristobo sakno kotor khlaiwi ochai bokhorok wng ya. Abo wng yaui Kaitor bono hai hwnwi sa kha, “Nwng ani Sajla; tini ang nini Nwpha wng kha.”

⁶Tei kwrẃngsa-o bo hai hwnwibo sa kha, “Melkisedekni ochai bosongo nwng mol brúm brúmni ochai wngnai.”

⁷O swngcharo tong phuru Jisu sotonwi chirikhógwi mokol muktwi bai khe Kaitorni thani koiwi suri sano, Kaitor se bono thwinani yakni phiyógwi mannai ba. Bo bwkha sutrang khe surima bai Kaitor bini suri sanmano khna kha.

⁸Bo Kaitorni Sajla wng phano sátokjakma bising tẃi bo kók khnana srwng kha.

⁹Bo rwng súk kha hwn khe bo bini kók khnanairokno mwthang phlainai wngwi phai kha,

¹⁰hakhe Melkisedekni ochai bosongo bo se ochai bokhorok hwnwi Kaitor sakhlai kha.

¹¹O kókno sana tháng khe chini kók kwbáng se tongo, norokni thani omono swbai sana khe kók kuthuk wng laha, tamni hwn khe norok khá si ya.

¹²Tabuk norok se phrwngnai wngnani jora, hai phano norokno Kaitorni kók yaphangno phrwng grana bagwi phrwngnai khoroksa samung nangwi tong kha. Tabuk phano norok mai chá yaui abuktwi se nungna nangnai.

¹³Abuktwi nungwi tongnai borok bo tabuk phano chwrai kho, bubo cha bubo cha ya abo bo mungsa phano saui man ya kho.

¹⁴Phiya ba mai hwn khe abo okrarokni chámung bórok le chánaiwi manjagwi phaijak, bubo kaham bubo hamya abono saui mano.