Read Kok Borok HIBRU 7 Bible Online

HIBRU 7 - Kok Borok bible

HIBRU 7

¹O Melkisedek wng kha Salemni bugra, phiya Kaitor Kotorni ochai. Abraham choba-o a bugrarokno butharwi kiphilwi phai phuru Melkisedek bo bai malaiwi bono hammari rw kha.

²Abraham choba-o aswk manwi manmani aroni kaichi-o kaisa bono rw kha. (Melkisedek mungni puila gujok wng kha “Bugra Kaham” hwnma se, phiya bo Salemni bugra wngma bai bono “Khá kwchang rwnai Bugrabo” hwno.)

³Melkisedek buma buphani eba bini chuchusongni kothoma tháisabo kwrwi, bo achaimani eba thwimani kothoma tháisabo kwrwi. Bo wng kha Kaitorni Sajla hai, bo mol brúm brúmni ochai.

⁴Hakhe norok nugo bo bwswk se kotor. Bosong okra Abraham bo choba-o aswk manwi manmani aroni kaichi-o kaisa bono rw kha.

⁵Phiya a Lebi bosongni ochairok bórok Israilrokni thani kaichi-o kaisa khangna bagwi Kerongo dagijak kha, abo wng kha bórok abo sakni bororokni thani khango, Abrahamni bosong wngwi tong phano abono khango.

⁶Melkisedek bo Lebini bosongni ya, tamo khe bo Abrahamni thani kaichi-o kaisano khango, phiya Kaitor kók rwmani a borokno hammari rw-o.

⁷Hammari manjakni slái hammari rwnai se tor kugo, o kók tei sa laina nang ya.

⁸Ochairokni kók hwn khe borok thwiblang se kaichi-o kaisano khango; tamo khe Melkisedekni kók hwn khe elembago sama hai kwthang tongnai borok se khango.

⁹Hakhe sana tháng khe Abraham a kaichi-o kaisano rw phuru Lebibo abono rw kha (Lebini bosongrok wng kha kaichi-o kaisano khangnai.)

¹⁰Tamni hwn ba Melkisedek Abraham bai malai phuru Lebi achai ya kho, sana tháng khe bo aphuru bini chuchu Abrahamni sago si kho.

¹¹Lebirok ochai wngma bising tẃi se Israilrok Kerong rwjago. Tabuk, tumungno Lebi ochairokni samung kaham wngma te tei khoroksa ochai bachana nang glak kha mun, abobo Aron bosongni ya, Melkisedek bosongni ochai se.

¹²Tamni hwn ba ochai bosong sláijak khe Kerongbo haino sláijakna nangnai.

¹³Chini Subrai le bosong Judani se, aile bono tẃiwi se o kókrok sajakmani; bini bosongni khoroksa phano ochai wngwi háyá-o samung khlai ya kho.

¹⁴Bo Juda bosongni achaimani, abo kaham khe saui man bai-o; phiya Musi ochairokni kók sa phuru a bosongni kók sa lang li ya.

¹⁵O kók wng kha teibo sijak rwrwgo; Melkisedek hai tei khoroksa ochai bacha phai kha.

¹⁶Bo wng kha borokni kerong bai ochai chá rwjakma ya, bo thwi phlai ya wngma bai se ochai wngo.

¹⁷Tamni hwn ba elembago hai hwnwi sa-o, “Melkisedekni ochai bosongo nwng mol brúm brúmni ochai wngnai.”

¹⁸Aboni bagwi kerong kwcham norjak kha, abo wng kha nabo nang li ya, samungbo chúk li ya.

¹⁹Musini Kerong wng kha mungsano phano kaham khlaiwi man ya. Hakhe tabuk teibo lama kaham khlaijak kha, abo baino chwng Kaitorni gana-o sók phai kha.

²⁰Teibo sana tháng khe oro Kaitorni swmaibo tongo. Bui ochai chá rwjak phuru omo hai swmai tangjak ya.

²¹Phiya ba Kaitor hai hwnwi swmai tangma bising tẃi se Jisu le ochai chá rwjago, “ ‘Nwng Melkisedek hai khe mol brúm brúmni ochai wngnai,’ hwnwi Subrai swmai tang kha, hakhe bo kók phér glak.”

²²Hakhe abo bai’-no Jisu wng kha teibo swmai kahamno sijak rwnai.

²³Oro tei tháisa kók hwn khe ahai: A ochairok samung pái ya sini’-no thwi thwiwi thángma bai ochai kwbángma nang kha.

²⁴Phiya ba Jisu le mol brúm brúm se kwthang, hakhe bini ochaini samung tei khoroksano phano berna nang ya.

²⁵Hakhe abo bai’-no bini bising tẃi Kaitorni thani phainairokno bo tabukbo mwthangwi mano, mwthang phlaiwibo mano, tamni hwn khe bórokni bagwi Kaitorni thani sa chruna bagwi bo mol brúm brúm kwthang tongo.

²⁶Hakhe Jisu se chini samungo nangnai ochai bokhorok. Bo wng kha kwthar; bo majra kwrwi tei khá kuphur; sumsok gwnang bororokni bisingni bo khagwi narwkjagwi nokha saka tisaui tlangjak.

²⁷Bo wng kha tei ochai bokhorok hai ya. Bo puila bini sakni sumsokni bagwi, phiya aboni ulo bororokni sumsokni bagwi sal brúm brúm ratharna nang ya. Bo sakno rwma bai sumsokni bagwi uáisa bai’-no ratharwi pái kha.

²⁸Musini Kerong wng kha bahan bwthẃini borokno ochai bokhorok chongo, phiya ba Kerongni slái ulo sók phainai Kaitorni swmai tangmani a kók le mol brúm brúmni bagwi kaham khe snamjaknai a Sajlano se chongo,