Read Kok Borok HIBRU 8 Bible Online

HIBRU 8 - Kok Borok bible

HIBRU 8

¹Chwng sa laimani kók bokhorok khe ahai: chuknoha-o Kaitor Kotorni achukthayungni yagra bwkhak achugwi tongnai abo tẃi ochai bokhorokno chwng man kha.

²Bo Khotol Kwthar kugo ochai bokhorokni samung khlai-o, abo wng kha Subrai swngmani a sói rínitamu se, abo borok swngma ya.

³Kaitorni thani ratharna bai barokna bagwi se joto ochai bokhorok chongjago, hakhe chini ochai bokhorokbo mungsa ya mungsa ma barok thai.

⁴Tumungno bo o swngcharo tongma te bo ochai w se wng glak kha mun, tamni hwn ba Judai Kerongno rwksaui baroknai ochairok tong baima ba.

⁵Bórok samung khlaimani abo wng kha chuknohanino srwngma se, aboni sampili se. Omo wng kha Musi wngmani abo hai se. Bo rínitamu swngna nai phuru Kaitor bono hai hwnwi sa kha, “Hathái-o nwng phunukjakmani katswi abo hai khe bebak’-no khlai di.”

⁶Hai phano Jisuni bising tẃi Kaitor bororokno swmai tangmani abo teibo kaham wngma hai’-no Jisu ochaini samung berjakmani abo bórokni samungni slái tor kugo; a swmai wng kha ham kugo, tamni hwn ba abo teibo manwi kahamno rwna hwnwi kók rwui swmai tangjak.

⁷Swkango swmai tangmani abo cha sukma te tei uáisa swmai tangna nang glak kha mun.

⁸Phiya ba Kaitor hai hwnwi saui bini bororokno majra bero, “Israilrokni thani tei Juda bosongrokni thani ang kwtal khe swmai tang anw, a sal phai rwrwgo hwnwi Subrai sa-o.

⁹Abo bórokno yak tolwi ha Ijipni ongkhorwi tubu phuru ang bórokni chuchusongni thani swmai tangma hai wng glak. Ang bórokni thani swmai tangma hai bórok tong ya, hakhe ang bórokno naharwi nai ya hwnwi Subrai sa-o.

¹⁰Tabuk, phainai molo Israilrokni thani ang omo tẃi swmai tang anw hwnwi Subrai sa-o: Ang bórokno ani kerong si rw anw, phiya abono bórokni bwkha-o swi anw. Ang bórokni Kaitor wngnai, hakhe bórok ani borok wngnai.

¹¹Khoroksa phano bini kamini borokno Subraino si di hwnwi phrwngna nang glak, khoroksa phano bini borokno Subraino si di hwnwi sana nang glak. Tamni hwn khe tamo kusu tamo kotor bórok bebak’-no ano saui man bainai.

¹²Bórok hamya khlaimarokno ang nakar anw, bórokni sumsokno tei muitu khu glak.”

¹³Swmai kwtalni kókno saui Kaitor swkangni abono kwcham khlai kha; phiya chamsor wngwi samung nang ya wng rwrwknai a manwi khe dakti’-no komorwi thángnai.