Read Kok Borok HIBRU 9 Bible Online

HIBRU 9 - Kok Borok bible

HIBRU 9

¹Bahai khe surina nangno a kók swkangni swmai-o tongo, phiya abo hai’-no borok tangmani surijaknai nokbo tongo.

²Rínitamu kaisa swngjak kha, swkang manjak gramani a khotolno Khotol Kwthar hwno. Aboni bisingo thopna, songphang tei Kaitorno barokmani ruti tongo.

³Bisingni rí swngjakni uklogo tei kaisa rínitamu tongo, abono Khotol Kwthar kuk hwno.

⁴Aro satrai sókna bagwi rangchakni songphang tongo, swmaini swndwkbo tongo, abo bebak’-no rangchak khopjak. A swndwgo manna gwnang gola, bwlái rotomnai Aronni raidang, phiya Kerong dagima swijak holongdap lapnwi tongo.

⁵A swndwk saka-o khe Kaitorni aroni chẃngsajak suarirokni mangtang tongo, bórokni bwkrang hwn khe sumsok nakarjak thani-o phehelsajak. Tamni hwn ba a kókrok hwn khe tabuk yaphang buchuk swbai sa laijak nai ya.

⁶Bahai khe tamo khlaijak kha omo’-no a kókrok. Ochairok khe bórokni samung khlaina bagwi swkang manjak gramani a rínitamu-o sal brúm brúm habo;

⁷phiya ba ochai bokhorok simi se bisingni a rínitamu bisingo habo, abobo bisi-o uáisa se. Bo thẃi tlangwi habo, a thẃino bo bini bagwibo, phiya sumsok khlaiwi tongo hwnwi saui man ya wngwi bororok sumsok khlaimani aboni bagwibo Kaitorno yapharo.

⁸Swkang manjak gramani rínitamu tong sak a Khotol Kwthar kugo hapnani lama khlaijak ya kho abo omo tẃirok khlaima bising tẃi Phola Kwthar srai-srai khe phrwngo.

⁹Omo wng kha tabukni molno phunukma se, Kaitorni thani barokmani tei ratharmani abo surinairokni bwkhano kaham khlai súgwi man ya hwnma se.

¹⁰Omorok wng kha chá lainani nung lainani tei podrepot súcha lainani simi se. Omorok saka sakani tongmung se, omorok Kaitor bebak’-no jali ya sak simi se wngwi tong granai.

¹¹Phiya ba Khristo le aswk manwi kaham kaham sók phaimani a manwirokni se ochai bokhorok wngwi phaijak. Bo samung khlaimani a rínitamu tobo tor kugo, habo ham kugo; omo borok snamma ya, kók wng kha omo o swngcharni buya.

¹²Khristo rínitamu bising tẃi thángwi a Khotol Kwthar Kugo uáisa bai’-no habwi phuru bo pun bwthẃibo tlang ya, dega bwthẃibo tlang ya, tamo khe bo bini sakni thẃi se tlang si-o, hakhe chwngno mwthang phlai kha.

¹³Punrokni thẃi bai musukrokni thẃi tei dega sókmani thaplano borok kwthar yarokni sago sarwi bórokno kwthar khlai-o.

¹⁴Omo se kubui wngwi tong khe Khristoni thẃi teibo bwswk se kwthar khlai kukno! Tong phlainai Pholani bising tẃi bo sakno Kaitorni thani kwthar khe yaphar kha. Chwng Kaitor kwthangni samung khlaiwi manna tẃi khe bini thẃi chwngno samung nang ya tongmungni yakni phiyógwi chini bwkhano kuphur khe súnai.

¹⁵Aboni bagwi’-no Khristoni bising tẃi swmai kwtal tangjak gra-o, hakhe Kaitor bai ringjaknairok Kaitor rwna hwnwi kók rwmani a pái phlai ya manwi kahamrokno mannai. Omo wngwi mano, tamni hwn khe bororok swkangni swmaini yago tong phuru samung hamya khlaimani yakni bórokno phiyókna hwnwi borok khoroksa thwi kha.

¹⁶Uil tong kha hwn khe a uil khlainai borok thwi kha hwnwi saui manna nango.

¹⁷Tamni hwn ba a uil khlainai borok kwthang tong sak a uil mungsa samungo chúk ya; bo thwimani yagulo simi se abo samungo chúknai.

¹⁸Aboni bagwi’-no swkangni swmaino samungo phnangna bagwi thẃi bai swmai ma tongo.

¹⁹Puilano Musi Kerongo tongmani bebak dagimarokno bororokno saui khna rw kha. Aphuru bo twi bai baksa dega bwthẃi na kha, hakhe hisop bai tei mera buikhumu kwchak bai khe abono Kerong bijap bai bebak lukuno sarcha kha.

²⁰“O thẃi bai’-no Kaitor norokno rákhok di hwnwi swmai tongo,” hwnwi bo sa kha.

²¹Abo hai khe’-no Musi a rínitamu-o’-bo thẃi sarchaui rw-o, suri thani nangmani bebak manwi’-obo sarchaui rw-o.

²²Omo sói’-no Kerongno rwksa khe aswk manwirok bebak’-no thẃi bai se súchajago; phiya thẃi kochok rw khe simi se sumsok nakarjago.

²³Omorok chuknohani sói manwirokno srwngma se, omorok omo tẃi khe se súchajakna nangnai. Tamo khe chuknohani a manwirokni bagwi teibo manwi kaham ratharna nangnai.

²⁴Tamni hwn ba Khristo borok snammani Khotol Kwtharo habwi ya, abo wng kha sói khotolno srwngwi khlaima se. Bo katswi chuknoha’-ono habwi kha, bo aro chini wngwi Kaitorni bwskango bachaui kha.

²⁵Judai ochai bokhorok bisi brúm brúm pun tokni thẃi tlangwi Khotol Kwtharo hap habwi-o. Tamo khe Khristo le sakno yapharna bagwi kwbángma hapna nang li ya.

²⁶Wng ya khe swngchar snamjak phuruni simi bo kwbángma’-no sátokjakna nang kha mun. Abo wng yaui bebak mol páinanogo sumsokno swkakna bagwi bo sakno rwui uáisa bai’-no bacha phai kha.

²⁷Uáisa le joto borokno ma thwithai, aboni ulo Kaitor bai buj thumjaknai.

²⁸Abo hai kheno Khristobo aswk bororokni sumsokno swkakna bagwi uáisa bai’-no sakno rw kha. Bo tei uáisa phai phinai sumsok swkakna bagwi ya, bono naisingwi tongnairokno mwthangna bagwi se phainai.