Read Kok Borok JAKOB 1 Bible Online

JAKOB 1 - Kok Borok bible

JAKOB 1

¹Ang Jakob omono swihoro, ang Kaitor bai Subrai Jisu Khristoni seleng. Ang swngchar gwnangwi pisar piring wngwi tongnai bebak Kaitorni bororokno khápang rohoro.

²Ani takhuk, norok podrepot khe potalijak khe belai khe khá tongthok di,

³tamni hwn ba norok saui mano omo tẃi potali thani norokni poito kwcha khe norok soiwi manma klai-o.

⁴Norok pái ya sak’-no soiwi tháng khe bebago’-no kaham hwnjak súk anw, kisa phano hamya hwnjak glak.

⁵Norokni bere khoroksa phano elem kwrwi khe bo aboni bagwi Kaitorno san thung, hakhe Kaitor bono abo’-no rwnai, tamni hwn ba Kaitor bebakno’-no khairogwi yak kuar khe rw-o.

⁶Hai phano norok poito wngwi ma san thai, kisa phano bwkha udru mudru ta wng di. Bwkha udru mudru wngnai borok bo wng kha nokbar sipchaui tlangjaknai twijlangni twi aphal hai.

⁷Omo tẃi borok wng kha phatra, bo bebak samungo’-no bwkha udru mudru; bo Kaitorni yakni mungsa phano man anw hwnwi ta uansuk thung.

⁹Kwrwisa takhuk Kaitor bai chasa rwjak khe bo khá srang thung,

¹⁰phiya gwnangsa takhuk Kaitor bai swklwkjak khe bobo khá srang thung. Tamni hwn ba gwnangsa sam bubar hai kraiwi thángnai.

¹¹Sal kasaui bini tungma bai samrokno khampra rw-o, bini bubar kwrai-o, bo naithok ya wngwi thángo. Abo hai khe’-no gwnangsabo bini samung bai dula-dula wngwi tong phuru komornai.

¹²Potalijagwi kwchanai borok bo hamchajak, tamni hwn ba bo potalijagwi kwcha khe Kaitor bono hamjaknairokno rwna hwnwi kók rwmani a langmani motokno man anw.

¹³Khoroksa swk potalijagwi belokjak khe bo “Kaitor ano belogo,” hwnwi ta hwn thung. Tamni hwn ba Kaitor hamya bai belokjagwi man ya, phiya bo sakphangbo khoroksano phano belok ya.

¹⁴Tamo khe khoroksa swk sakni hamya muchungma bai sotonjagwi khẃi-o kwcha khe a borok belokjago.

¹⁵Hakhe bini a hamya muchungma ogo chu-ui sumsokno bá-o; a sumsok tor khe lok khe borokno butharo.

¹⁶Ani khájani takhukrok, lama ta koró di.

¹⁷Joto manwi kaham rwmani, joto manwi sói rwmani abo chuknohani se phai-o. Nokhani sal, tal tei athukirirokno snamnai Kaitorni aroni se abo phai-o. Bo sakno mul phíl ya, sal kasaui sal thángwi sampili klaima tẃi bo sampili klai ya.

¹⁸Bini bebak snammarokni bere chwng tháiskang bwthái hai wngna bagwi bo bini muchung tẃi kubuini kókni bising tẃi chwngno achai rw kha.

¹⁹Ani khájani takhukrok o kókno si di. Jotono khna thani khunju kwkrwk wngthai, sa thani khe búkhúk hilik wngthai, doui joli thai kwrwi.

²⁰Borok jolima bai Kaitorni samung kaham wng ya.

²¹Hakhe bebak tongmung sitra bai bebak tongmung hamya khibi di. Kaitorni thani bomwi bo norokni bwkha-o káimani kókno chu-ui ton di, abo norokno mwthangwi mano.

²²Bini kók khnama bai simi wng kha hwnwi lama ta koró di. Hai wng yaui bini kók sama tẃi se tong di.

²³Kaitorni kók khnaui abo tẃi tong ya borok bo wng kha aina-o sakni mwkhangno nainai hai.

²⁴Bo sakni mwkhangno naiwi thángo, phiya phatsa khe bini mwkhang bahai pokjago.

²⁵Bororokno phiyóknai a sóini kerongno kaham khe nainai borok, abono haino khna yaui kaichomwi khnanai borok, abono pok yaui abo hai khe’-no tongnai borok bo se bini samungo hamchanai.

²⁶Khoroksa swk “Ang Kaitorno surinai borok,” da hwn? Bo kók narwgwi sa ya hwn khe bo Kaitorno surimani abo mungsa buya, bo lama koró-o.

²⁷Tekto mannai ma-pha kwrwirok bai randijwkrokno naimani, phiya swngcharni bagwi khá sitra wng yaui tongmani, abo se Apha Kaitorni mokolo kaham khe kubui khe surima klai-o.