Read Kok Borok JAKOB 3 Bible Online

JAKOB 3 - Kok Borok bible

JAKOB 3

¹Ani takhukrok, norok bebak’-no phrwngnai ta wng di, tamni hwn ba norok saui mano chwng phrwngnairok buini slái teibo kwrak khe buj thumjaknai.

²Chwng joto’-no cha ya khlai khlai-o. Kók sa thani uáisa phano kók cha ya sa ya borok bo wng kha kaham, bo bini bebak saknobo kók khna rwui mano.

³Chwng koraino kók khna rwna bagwi búkhúgo jing rw-o, hakhe chwng thángna muchung thani’-no bono tlangwi mano.

⁴Rungtornobo naisik di: abo aswk kotor phano, nokbar kotor bai kochok rwjak phano, abo baital bwsate bai sói khe tẃijago, bwsate thángna muchung thani’-no abo ma thángo.

⁵Bwslaibo ahai’-no, abo chikonsa phano kók kotor saui mano. Nai di, hór kisicha bai se bwswk bolong kotormano sógwi man!

⁶Bwslaibo hór hai’-no. Oro’-no bebak hamya tongo; abo chini bwsago tongwi bwsak gwnangwi hamya sitogo. Abo morkeni phainai hór bai chwng thwi ya sak’-no chini bebak’-no sógo.

⁷Yabrwirok, toksa-toktẃirok, chibuk-sindrairok tei árok bebakno’-no borok kók khna rwui mano, khwbo khna rw-o.

⁸Phiya ba khoroksa phano bwslaino kók khna rwui man ya kho. Abo wng kha hamya, abo kók khna ya, butharnai bis máng se kupulung.

⁹Chwng bwslai bai se chini Apha Subraino hambai rw-o, phiya Kaitorno kosol khe snamjak boroknobo bwslai bai’-no swrai-o.

¹⁰Hambai rwmani kókthái bai swraimani kókthái búkhúk kaisani’-no ongkhoro. Ani takhukrok, omo hai wngthai kwrwi.

¹¹Twimuk kaisani’-no twi kaham bai twi hamya thansa khe phai ya.

¹²Ani takhukrok, khwichang buphango tháistwi tháiwi man ya; angur buphangobo khwichang tháiwi man ya, twi kwprapnibo twi kaham phai ya.

¹³Norokni bere khoroksa swk elem gwnang da tong? Khoroksa swk sinai da tong? A borok tongmung kaham tongwi omono ma phunuknai, bo koinene khe siui samung kaham khlaiwi omono ma phunuknai.

¹⁴Phiya norok bising bising músú lai khe, naisler lai khe, sakni kaham simi nai lai khe hakhe norok kók kotor saui tatal ta wng di.

¹⁵Omo tẃi elem chuknohani phai ya, omo swngcharni se, omo Kaitorni aroni ya, mwtai hamyarokni aroni se.

¹⁶Bororok músú lai thani, sakni kaham simi nai lai thani aro chili-lupa tongo, bebak hamyarokbo tongo.

¹⁷Kuchukni phainai elem wng kha jotoni slái swkang kwthar khlainai; aboni ulo abo kwtha rwnai, kwchang kwchang tong rwnai, buini kók nanai; abo maya gwnang, samung kaham báng rwnai; abo jotono baksa khe nuknai, abo phatra kwrwi.

¹⁸Kwtha rwnairok kwchang khe káima bwchlwirok abo kaham’-no thái-o.