Read Kok Borok 1 PITOR 1 Bible Online

1 PITOR 1 - Kok Borok bible

1 PITOR 1

¹Ang Jisu Khristoni chonghor Pitor omono swihoro. Ponto, Galatia, Kapadokia, Asia tei Bithunia angkor gwnangwi pisar-piring khe riphuji hai khe tongnai Kaitorni chongjak bororokno omono swihoro.

²Norok Apha Kaitor khá chapma tẃi chongjak kha, Jisu Khristoni kók khnana bagwi, phiya bini thẃi bai súchajakna bagwi norok Kaitorni Phola bai borok kwthar khlaijak bai kha. Norok belai khe khairokjak thung, belai khe khá kwchang rwjak thung.

³Phai di, chwng chini Subrai Jisu Khristoni Bupha Kaitorno hambai rw anw. Bo belai khairogwi Jisu Khristono kwthwini mwthangwi tisama bai chwngno achai rw phi kha. Abo chwngno khatung rw súgo,

⁴hakhe Kaitor bini bororokni bagwi khatiui tonmano man anw hwnwi chwng naisingwi tongo. Bo abono chuknoha-o khatiui ton kha, aro abo sok glak, hamyabo wng glak, babo bálai glak.

⁵A khatiui tonmani abo norokni bagwi se, norok wng kha poito khlaima bising tẃi Kaitorni phan bai mwthangjakna bagwi kaham khe tonjaknairok; norok a mwthangjakmani abo mol pái phuru phunukjakna bagwi tiyar khe tonjak.

⁶Aboni bagwi tongthok di, norok tabuk podrepot khe potalijakma bai srapsani bagwi khá hamya ma wng phano tongthok di.

⁷Norok potalijakmani abo norok poito kwrak hwnwi sijakna bagwi se. Komornai rangchak suda hór bai sógwi potalijago; omo tẃi khe rangchakni slái teibo kaham norokni poitobo sói tongna tẃi khe ma potalijak thai’-no. Hakhe Jisu Khristo nukjak phuru norok lobjaknai, mwkhang chẃng rwjaknai, bórijaknai.

⁸Norok bono nuk ya phano hamjago. Norok tabuk bono nuk ya phano bono poito khlai-o. Aboni bagwino norok aswk belai khe tongthok lai-o, abo kók bai sa bai ya,

⁹tamni hwn ba norok poito khlaima hai kheno norokni phola mwthangjago.

¹⁰Norok mwthangjakmani kók saui manna bagwi diyarirok cherwi naichom lai kha; Kaitor norokno khairogwi rwna hwnmani kók bórok sa lang kha.

¹¹Khristo ma sátokjaknai, ulo khe chẃngsacha khlaijaknai hwnwi bórok sa phuru abo bu phuru bahai khe wngno hwnwi bórok bórokni bisingo tongnai Khristoni Phola bai naichom lai kha.

¹²Kothoma Kaham pírnairok chuknohani rohorjaknai Phola Kwtharni phan bai tabuk norokno khna rwmani abo diyarirok sa lang kha. Bórok sa langmani a kókrok bórokni bagwi klai ya, norokni bagwi se klai-o hwnwi Kaitor bórokno phunuk kha. O kókrokno suarirok suda sina muchungjago.

¹³Hakhe tabuk, samung khlaina bagwi bwkhano kwrak khe ton di. Sichaui tong di, Jisu Khristo nukjak phuru norok khairokjaknano khatung súgwi tong di.

¹⁴Kók khnanai bwsa hai khe Kaitorni kók khna di, norok mungsa phano si ya phuru muchungma tẃi tei ta tong si di.

¹⁵Ahai wng yaui norokno ringnai Kaitor kwthar wngma haino norokbo bebago’-no kwthar khe tong di.

¹⁶Elembago hai hwnwi sa-o, “Ang kwthar ba norokbo kwthar wng di.”

¹⁷Jotono mwkhang naisik yaui samung khlai tẃi’-no buj thumnai Kaitorno suri san phuru norok bono Apha hwnwi hwno, aboni bagwi’-no norok o swngcharo tong lang sak bono kiriui tong di.

¹⁸Norokni chuchusongni sakni manwi phaimani a mungsa chúk ya tongmungni yakni norokno phiyókna bagwi tamo rwjak kha abono norok saui mano. Abo rangchak rukphai hai komornai manwi ya;

¹⁹norok Khristoni thẃi kaham bai phiyókjak kha, bo wng kha khait kwrwi mera bwsa kaham,

²⁰o swngchar snamjak ya sini’-no bo Kaitor bai chongjak, phiya o mol páinanogo norokni bagwi phunukjak kha.

²¹Bono kwthwini mwthangwi tisaui chẃngsacha khlainai Kaitorno bini bising tẃino norok poito khlai-o; aboni bagwi’-no norok Kaitorno poitobo khlai-o, khábo khatungo.

²²Norok tabuk Pholani bising tẃi kók kubuino khnama bai norokni bwkhano kuphur khlaiwi norokni Khristan takhukrokno kaham khe hamjak kha ba norok kiching norok khá nangwi hamjak lai súk di.

²³Norok Kaitorni tong phlainai kók kwthang bai achai phi kha, hakhe norokni Pha thwiblang ya, bo wng kha thangblang se.

²⁴Elembago hai hwnwi sama hai, “Bebak bororokno sam hai, bórok kotor wngmani abo sam bubar hai. Sam thwi-o, bubar kwrai-o,

²⁵phiya ba Subraini kók mol brúm brúm’-no tongo.” A kók wng kha norokni thani pírmani a Kothoma Kaham.