Read Kok Borok 1 PITOR 3 Bible Online

1 PITOR 3 - Kok Borok bible

1 PITOR 3

¹Norok hik hwnjaknairok omo tẃi khe sai-sani kók khna di, hakhe baksa Kaitorni kókno poito khlai ya khe bórok norokni tongmung bai poito ma khlainai. Norok aboni bagwi kók tháisa phano sana nang glak,

²tamni hwn ba norok kwthar khe bomwi tongmano bórok nuk anw.

³Norok podrepot khe sakno ta naithok rw di, khaju naithok rwui khaui, gwina-ganthi kanwi, rí-chum kanwi omo tẃi khe sakno ta naithok rw di.

⁴Hai wng yaui bwkha bisingo se naithok di, abo tẃi hamya wng phlai ya naithokmung wng kha bwkha kwchang kwchang bai koinene se, Kaitor abono’-no samung nangjak kugo.

⁵Kaitorno surinai agini bwrwirok, Kaitorno khatungnairok, bórok omo tẃi khe’-no sak sakno naithok rw-o, bórok sai-sani kók khnaui tongo.

⁶Sarabo abo haino; bo Abrahamni kók khnaui bono “Ani bugra,” hwnwi hwno. Norok tabuk mungsa kiri yaui samung kaham khlai khe bini bwsajwksong wngma klai-o.

⁷Norok sai hwnjaknairokbo chwlani slái hik kebel kuk hwnwi saui manẃi hik bai tong di; aboni bagwi bórokno kaham khe nai di, tamni hwn ba bórokbo norok bai baksa khairokjagwi mwthangjak anw. Norok suri san thani kebengjak ya tẃi khe omo hai khe tong di.

⁸Páinanogo ang o kók sa-o, norok bebak’-no kók tháisa wng di, khá baksa wng di; takhuk hwnwi norok kiching norok hamjak lai di, khairok lai di, koiwi tong lai di.

⁹Norok hamya khlaijak khe hamya ta khlai phi di, norok swraijak khe ta swrai phi di; hai wng yaui ham di hwnwi se hwn phi di, tamni hwn ba norokni kaham khlaina hwnwi se Kaitor norokno ringo.

¹⁰Elembago hai hwnwi sama hai, “Tongthogwi tongna muchungnai, sal kaham nukna muchungnai, a borok kók hamya tei ta sa thung kók tatal tei ta sa thung.

¹¹Bo hamyani kiphilwi samung kaham khlai thung; bo kwchang kwchang khe tongna muchung thung, kwchang kwchang khe tongna nai thung.

¹²Subrai kahamrokno naikhlai-o, bórok sanmano khunju káiwi máng tongo, phiya hamya khlainairokno naisigwi nai ya.”

¹³Norok samung kaham khlaina muchung khe norokno sabo hamya khlainai?

¹⁴Phiya norok samung kaham khlaiwi sátokjak phano norok hamchajak. Bórokno ta kiri di, bórokno tẃiwi ta uana di.

¹⁵Norok khá bisingo Khristono Subrai hwnwi bini thani bomwi tong di. Norok tamono khatung hwnwi sẃngnairokno sana bagwi tiyar wngwi tong di.

¹⁶Phiya kwchang kwchang khe koiwi sa di. Khá sutrang khe tong di, hakhe norok kuljak khe norokni Khristan tongmung kahamno hamya hwnwi sanairok bórok ma lachi anw.

¹⁷Kaitor muchung khe samung hamya khlaiwi sátokjakmani slái samung kaham khlaiwi sátokjakmani ham kugo.

¹⁸Tamni hwn ba Khristo sak baithang’-no norokni bagwi thwi kha, uáisa bai’-no bo sumsokni bagwi thwiwi pái kha, bo borok kaham, norokno Kaitorni thani tubuna hwnwi bo borok hamyarokni bagwi thwiwi pái kha. Bo o swngcharo butharjak kha, phiya phola wngwi mwthangjak kha;

¹⁹omo tẃi khe bo chopjak pholarokni thani thángwi pírwi kha.

²⁰A pholarok wng kha Noa a rungtorno tang phuru Kaitor khá lok phano bini kók khna yarokni phola. A rungtoro kisicha borok tongnai bebagwi khorokchar se twi bai mwthangjak si-o;

²¹abo wng kha tabuk norokno mwthangnai baptismani kókno swkang baira phunukmani se. Omo bwsakni simbuk súmani ya, tamo khe khá sutrang khe Kaitorni thani kók rwmani se. Abo norokno Jisu Khristo mwthangwi tisajakma bising tẃi se mwthango;

²²bo chuknoha-o tháng kha, bo Kaitorni yagra bwkhak tongo, bo bebak suarirok tei chuknohani bokhorokrok bai mwtairokno kók khna rwui tongo.