Read Kok Borok 2 PITOR 1 Bible Online

2 PITOR 1 - Kok Borok bible

2 PITOR 1

¹Ang Jisu Khristoni seleng bai chonghor Simon Pitor omono swihoro. Chwngno Mwthangnai Kaitor Jisu Khristoni sói samungni bising tẃi chwng hai kaham khe poito khlaiwi rwjaknairokno omono swihoro.

²Norok Kaitor bai chini Subrai Jisuno saui manma bising tẃi belai khe khairokjak thung, belai khe khá kwchang rwjak thung.

³Chwngno bo bai baksa chẃngsacha khlaina bagwi, kotor khlainai bagwi ringnai a borokno saui manma bising tẃi Kaitorno suriui tongna tẃi khe Kaitor bini phankrak bai chwngno bebak nangmano rw kha.

⁴Omo tẃi khe norok o swngcharni bororokno hamya khlainai sak motókni yakni yógwi Kaitor hai khe tongwi manna tẃi khe bo chwngno belai kaham khe kók rw kha.

⁵Aboni bagwi’-no norok poito khlai kha hwn khe kaham khe tongna nai di; kaham khe tong kha hwn khe sina nai di;

⁶si kha hwn khe sak soina nai di; sak soi kha hwn khe khá lokna nai di; khá lok kha hwn khe Kaitorno surina nai di;

⁷Kaitorno suri kha hwn khe takhukrokno hamjakna nai di; takhukrokno hamjak kha hwn khe jotono hamjakna nai di.

⁸Omo tẃi’-no norok wngthai; norok omo hai wng súk khe norok abo bai chini Subrai Jisu Khristono saui manẃi samungo nang yaui tong glak, samungo chúk yaui tong glak.

⁹Omo tẃi wng ya khe a borok kaham khe nuk ya mokol phula, bini swkangni sumsok súchajakmano bo pok kha.

¹⁰Hakhe takhukrok, Kaitor norokno chongwi ring kha ba omo hai khe teibo tongna nai di; omo hai tong khe norok lama koró glak.

¹¹Omo tẃi kheno norok chwngno Mwthangnai Subrai Jisu Khristoni tong phlainai a ha-o ahai’-no habwi man súk anw.

¹²Aboni bagwi’-no norok o kókrokno saui man bai phano, norok khnama kók kubuino kwrak khe romwi tong phano, ang norokno o kókrokno muitu khlaiwi rwui máng tongnai.

¹³Ang o swngcharo tong lang sak norokno o kókrokno muitu khlaiwi rwthai hwnwi khá ka-o.

¹⁴Ang saui mano chini Subrai Jisu Khristo ano srai-srai khe sama tẃi’-no ang dakti’-no o mang thwiblangno ma khibinai.

¹⁵Hakhe ang thwi bai khe norok sal brúm brúm o kókrokno muitu khlaina tẃi khe lama khlaiwi rwna nainai.

¹⁶Chini Subrai Jisu Khristo phankrak khe phaimano norokno si rwna bagwi borok banokma kerang kothomarok bai chwng sana nang ya. Chwng mokol baithangno bono kwplai khe nuk kha.

¹⁷Bupha Kaitor bono chẃngsacha khe kotor khlai phuru chwng aro tongo. “Omo ani khájani Sajla, bono’-no ang belai hamjago,” hwnwi Chẃngsachani Yaphangni aroni bono kók sa phuru chwng aro tongo.

¹⁸Chwng bo bai a hathái kwtharo tong phuru khunju baithang chuknohani o kók samano khna kha.

¹⁹Aboni bagwi diyarirok sa langmani a kókno chwng teibo poito khlai kugo. Norok a kókno khunju kai khe teibo hamo, tamni hwn ba a Sal kasa ya sak, phiya a aitorma norokni khá-o ka ya sak abo wng kha mwnakma-o chẃngwi tongnai chati hai.

²⁰Kók kotor khe hai, o kókno si di: Elembakni kók diyarino khoroksa phano saichung saichung swbaiwi saui man ya.

²¹Kók diyari tháisa phano borokni muchung tẃi sajakma ya, tamo khe borok Phola Kwthar bai koboljagwi se Kaitorni aroni kók sa-o.