Read Kok Borok 2 PITOR 2 Bible Online

2 PITOR 2 - Kok Borok bible

2 PITOR 2

¹Agi phuru bororokni bisingo diyari phatrarok bacha kha, abo tẃi kheno norokni bisingobo kók cha ya phrwngnairok bachanai. Bórok komorna lama tanna bagwi bising bising kók cha ya sanai, bórok bórokno paiwi phiyóknai Bugrano gosi glak, hakhe bórok achomsa komor bainai.

²Hai phano borok kwbángma’-no bórok sak tongthok tongmano srwngnai; hakhe bórokni bagwi bororok lama kubuino hamya sanai.

³O kók cha ya phrwngnairok rangno mokol chẃngma bai norokno kerang kothoma saui rang kwbángma khanai. Agini simi bórokni Buj Thumnai tiyar’-no tongo, bórokno sokomornaibo sichaui’-no tongo.

⁴Kaitor sumsok khlainai suarirokno maya chá yaui morke-o khiklai kha, aro Jerani Salni bagwi bórok khaui mwnakma hakhoro tonjago.

⁵Kaitor swngcharni agini bororokno maya chá yaui bono kiri ya a swngcharni bagwi twi tor rw kha; kaham khe tong di hwnwi pírnai Noa bai tei khoroksnirokno simi se bo narwk si-o.

⁶Kaitor Sodom bai Gomora taunno hór bai sokomorwi yagul su kha, hakhe Kaitorno kiri yarokni tamo wngno phunuk kha.

⁷Sak tongthok khe tongnai borok hamyarokni bagwi bwkha tekto mannai borok kaham Lutno simi bo phiyók si-o.

⁸A borok kaham bórok bai tongwi sal brúm brúm bórokni samung hamya khlaimano siui nugwi bini khá kahamo belai khe yórjago.

⁹Hakhe Kaitor bono surinairokno potalijakmani yakni bahai khe phiyóknai abo saui mano, phiya borok hamyarokno Jerani Salni bagwi bahai khe sátogwi tonnai abobo saui mano,

¹⁰aboni bere se sak motók tẃi tongmung sitra tongwi Kaitorni phanno sak nang ya wngnairokno bahai khe sátogwi tonnai abobo saui mano. O kók cha ya phrwngnairok mungsa kiri yaui borok torwi tongo, bórok chuknoha-o chẃngsacha tongnairokno sak nang ya, hamya se sa-o.

¹¹O kók cha ya phrwngnairokni slái phan gwnang kwrak kuk suarirok suda Subraini bwskango bórokno hamya saui majra ber ya.

¹²Romwi butharjakna hwnwi achainai bolongni uak-tok hai o bororok si yaui ahai’-no tongo; bórok si yaui hamya sa-o. Bórok bolongni uak-tokrok hai khe’-no pái rwjak bainai;

¹³bórok buino sátokma tẃi’-no bórok sátokjaknai. Sal kwthang kwthang bórok nung laiwi-chá laiwi tongthok lainano hamjago. Bórok lama koróui tongthok twtwi norok bai nung lai-chá laimani abo lachimasingcha tisumu hai.

¹⁴Bórok tongmung sitra bwrwirokno simi’-no naisigo; bórok sumsok khlainano akaijak ya. Bórok borok helengrokno belogo. Bórok khámai máng tongo. Bórok Kaitor bai swraijago!

¹⁵Bórok lama keplengno karwi lama koró kha; bórok Beorni bwsla Balam himmani a lama-o him kha; a Balam samung hamya tangwi rang mannano hamjago,

¹⁶hakhe bo bini sumsokni bagwi hwnjak kha. Kók man ya korai borok hai khe kók saui a khá kobor diyarino thak rw kha.

¹⁷O bororok twimuk ranjak hai, nokbar kotor bai sibchaui tlangjak chumui hai; Kaitor bórokni bagwi belai mwnakma-o tongthai kwrẃngsa khatiui ton kha.

¹⁸Bórok borok torwi kók nang ya sa-o, phiya borok cha yarokni bisingni yók droprokno sakni tongthok cháthok bai belogo.

¹⁹Bórok tongmung hamyani yago tong twtwi “Chwng norokno phiyógwi mano,” hwnwi kók rw-o, tamni hwn ba mungsa swk bai mechenjak khe a borok aboni yago ma tongo.

²⁰Bororok chwngno Mwthangnai Subrai Jisu Khristono saui manma bai o swngcharni hamya khlainairokni yakni yógwi haino hai romjagwi abórokni yago klai phi khe a bororok swkangni slái teibo hamya wng kugo.

²¹Bórok lama kahamno saui manẃi bórokno kók kwthar rwmani aroni kiphilwi thángmani slái a lamano si yaui tong khe se ham kugo.

²²“Sẃi bini kwbatwino chá phiro,” phiya “Uak tuku rwjak phano haino hai harpego tuku phiro,” hwnwi kógo sajakmani o kók bórokni thani nang phai-o.