Read Kok Borok 1 JOHON 5 Bible Online

1 JOHON 5 - Kok Borok bible

1 JOHON 5

¹Jisuno Masia hwnwi poito khlainai borok bo wng kha Kaitorni bwsa, Phano hamjaknai borok bo bwslanobo hamjago.

²Chwng Kaitorni bwsarokno hamjago hwnwi omo tẃi khe saui mano, chwng Kaitorno hamjagwi bini kók khnama bai se omono saui mano.

³Chwng Kaitorno hamjakma wng kha bini kók khnama se. Bini kók khnaui tongnani abo chini thani belai kuthuk ya,

⁴tamni hwn ba Kaitorni bwsarok jotono o swngcharno mecheno. Tei omo’-no chwng poito khlaima bising tẃi swngcharno mechenmani.

⁵O swngcharno mechennai le sabo sla? Bo wng kha Jisuno Kaitorni Sajla hwnwi poito chánai borok bo simi se mecheno.

⁶Jisu Khristo’-no wng kha phainaisa a borok; bo twi baibo phai kha, thẃi baibo phai kha. Abo Phola sakphang’-no a kókno kubui hwnwi sa-o, tamni hwn ba Phola wng kha kubui.

⁷Phiya chuknoha-o sakki kwtham tongo, abórok khe: Pha, Kók tei Phola kwthar; o kwtham thamni’-no kaisa se.

⁸Hakhe o ha-o sakki kwtham tongo; abórok khe: phola kaisa, twi kaisa tei thẃi kaisa, o kwtham thamni’-no kók tháisa.

⁹Tumung chwng bororok sakki rwmano poito khlai khe, Kaitor sakki rwmano teibo poito khlaithai, phiya bini Sajlani bagwi Kaitor omo hai khe sakki rw kha.

¹⁰Kaitorni Sajlano poito khlainai borok bini bwkha-o o sakkini kók tongo. Phiya Kaitorno poito khlai ya borok khe bo Kaitorno tatal hwnma klai-o, tamni hwn ba Kaitor bini Sajlani bagwi sakki rwmanobo poito khlai ya.

¹¹Hakhe omo’-no a sakki rwmani: Kaitor chwngno mwthang phlai kha, phiya abo bini Sajlani thani se tongo.

¹²Sajlano mannai borok bo o langmano man kha; Kaitorni Sajlano man ya borok bo o langmano man ya.

¹³Norok mwthangjak phlai kha hwnwi saui man thung hwnwi se ang omono norokni thani swi-o, norok Kaitorni Sajlani mungno poito khlainairok saui man thung hwnwi se ang swi-o.

¹⁴Omo se chwng bini thani bwkha ragwi tongmani, tamni hwn ba chwng bini muchung tẃi mungsa swk san khe bo chini sanmano khna-o hwnwi chwng saui mano.

¹⁵Chwng bono san khe bo khna-o hwnwi saui mano, hakhe chwng san tẃi’-no bo chwngno rw-o hwnwibo saui mano.

¹⁶Tumung khoroksa swk bini takhukno thwinani lama-o tlang ya abo tẃi sumsok khlaima nuk khe bo Kaitorno san thung, hakhe Kaitor a takhukno mwthang anw. Thwinani lama-o tlang ya abo tẃi sumsogo simi se omo chúgo. Thwinani lama-o tlangnai abo tẃi sumsokbo tongo, ang aboni bagwi Kaitorno san di hwn ya.

¹⁷Bebak samung hamya’-no sumsok klai-o, hai phano thwinani lama-o tlang ya abo tẃi sumsokbo tongo.

¹⁸Chwng saui mano Kaitorni bwsarok bórok tei sumsok khlai li ya, tamo khe Kaitorni Sajla bórokno kati rwui tono, hakhe Soitan bórokno tangwi man ya.

¹⁹Chwng le Kaitorni bwsarok se hwnwi chwng saui mano tei bebak swngchar khe Soitanni yago klaijak.

²⁰Chwng saui mano Kaitorni Sajla phai kha, hakhe chwngno sói Kaitorno sinina tẃi khe saui man rw kha. Chwng sói Kaitorni bisingo tongo, bini Sajla Jisu Khristoni bisingo tongo. Bo se sói Kaitor, bo’-no mwthang phlainai.

²¹Angsarok, norok mwtai mang takjakrok bai hus khe tong di.