Read Kok Borok BUJ THUMNAIROK 1 Bible Online

BUJ THUMNAIROK 1 - Kok Borok bible

BUJ THUMNAIROK 1

¹Josua thwi bai khe Israilni bororok Subraiyungno hai hwnwi sẃng lai kha, “Sabo chini bagwi Kanansarok bai choba nang lainani bagwi swkang ma thángnai?”

²Subraiyung hai hwnwi sa kha, “Judarok swkang ma thángnai, ang o hano bini yago yaphar kha.”

³Juda bini takhuk Simionno hai hwnwi sa kha, “Ang bai baksa ani amchoi-o phai di, hakhe chwng Kanansarok bai choba nang lai man anw, abo hai khe angbo nini amchoi-o tháng anw.” Hakhe Simion bai Juda pal khe tháng lai kha.

⁴Judabo choba-o thansa khe tháng lai kha. Subraiyung bórokni yago Kananrokno, Peressarokno, yaphar kha, bórok Bejego borok khorok chisaino mechen kha.

⁵Bórok Adonibejekni Bejego phai lai kha, hakhe bo bai choba nang lai kha tei Kanansarok bai Peressarokno mechen kha.

⁶Hakhe Adonibejek khár kha, bórok bono riphrigwi rom kha, bini yasima bai yakungni yasimano rasu-ui khibi kha.

⁷Hakhe Adonibejek hai hwnwi sa kha, “Khoroksnichi habugrarokni yasima bai yakungni yasimarok tansu-ui ani songphang yaphango tonjak kha. Kaitor bórokno khlaima haino anobo khlai kha.” Bórok bono Jerusalemo tubu kha, arono bo thwi kha.

⁸Hakhe Judani bororok Jerusalem bai choba nang laiwi, abono segwi na kha, aroni bororokno buthar baiwi kamiyungno hór phnangwi rw lai kha.

⁹Aboni ulo khe Judani borokrok hathái kami Kananrok tei hathái yaphango Negebo tong bainairok bai choba nang lainani tháng lai kha.

¹⁰Bórok Hebron kamiyungo tongnai Kanansarokno choba nang laina tháng kha; (abo swkango Kiriat-Arba hwnjago); bórok Sesai, Ahiman tei Talmaino mechen kha.

¹¹Aroni khe Judani bororok Debir bwkhak tháng lai kha, swkango abo Kiriat-Sepher hwnjago.

¹²Hakhe Kaleb hai hwnwi sa kha, “Kiriat Sepherno mechenwi mannai borokno ani sajwk Aksa bai káinai,”

¹³Kalebni buphayung kusu Kenajni bwsla, Othniel a kamiyungno mechen khe, hakhe Kaleb bini bwsajwk Aksa bai bono kái kha.

¹⁴Káilai pandani salo khe Othniel bini bwrwino buphani thani ha san di hwnwi kobok kha. Bo bini koraichirka sakani nongkhor khe Kaleb bono, “Nwng tamo nai?” hwnwi sẃng kha.

¹⁵Bo hai hwnwi sa kha, “Ano hili kaisa rw di, nwng rwmani wng kha twi kwran ha, anobo twimuk yorjak hano rw di.” Hakhe Kaleb bini ha kuchuk bai ha yaphangni twimukrokno rw kha.

¹⁶Musini bwkra, Kenini bosongrok Judani bororok bai baksa, Jerikoni khajuri kamiyung hasing panthor ha Judani Negebo Aradni gana-o tháng kha. Bórok aro Amaleksarok bai tongwi kha.

¹⁷Hakhe Judani bororok Simionni bororok bai baksa thansa khe thángwi Sephato tong bainai Kananrokno mechenwi sokomor súk kha, hakhe abono Horma hwnwi mung phar lai kha.

¹⁸Judarok Gaja, Askelon, Ekron tei abórokni amchoiroknobo segwi na bai kha.

¹⁹Subraiyung Juda bai tong kha tei bo hathái hachukrokno naui achuk kha, hai phano bo ha panthoro tongnairokno rwkhlaiwi rohorwi man li ya, tamni hwn ba bórokni sorni korai malkhungrok tong bai-o.

²⁰Musi sama haino Kalebni thani ha Hebronno yapharjak kha tei bo kamiyungni Anakni bwsla khorokthamrokno rwkhlaiwi rohor kha.

²¹Tamni hwn ba Benjamin bosongni bororok Jerusalemo tong bainai Jebusrokno rwkhlaiwi rohor li ya, abo bai Jebusrok Benjaminsarok bai baksa Jerusalemo tabuk jorabo tong bai-o.

²²Josepni bosongrok Bethel bai nang laina tháng kha tei Subraiyung bórok bai pal tongo.

²³Bórok kamiyung Bethelno naichomnani borok rohor kha (a kamiyungno swkango Luj hwnjago).

²⁴Naichomnairok khoroksano kamiyungni nongkhorwi phaima nuk khe bono hai hwnwi sẃng kha, “Kamiyung bisingo thángjaknai lama chwngno phunuk di, chwng nono mungsa khlai glak.”

²⁵Hakhe bo bórokno lama phunuk kha, bórok kamiyung bisingo tong bainai bebak bororokno buthar bai kha, phiya ba bórok a borok bai bini núkhungno mungsabo khlai li ya.

²⁶Ulo bo Hitisarokni ha-o thángwi kamiyung tang kha, abono Luj hwnwi mung phar kha, tabuk jora a mung’-no tong kho.

²⁷Manaseni bosongrok Bethsean, Tanak, Dor, Ibliam tei Megido kamiyung tei aboni gana gini tong bainai bororokno rwkhlaiwi rohor li ya; Kanansarok arono tongwi tong phi bai kha.

²⁸Israilrok báng rwrwk khe Kanansarokno selengni samung tang rw kha, phiya ba bórokno bebakno rwkhlaiwi rohor li ya.

²⁹Tei Ephraimni bosongrok Gejer kamiyungo tong bainai Kananrokno rwkhlaiwi rohor li ya, hakhe Kanansarok bórok bai’-no aro tong bai kha.

³⁰Jebulunni bosongrok Kitron bai Nahalolo tong bainai bororokno rwkhlai rohor li ya, Kanansarok aro bórok bai’-no tong kha, hakhe bórok sikiri-sokoro khlaijagwi samung ma tang bai kha.

³¹Aser bosongrok Ako, Sidon, Alab, Akjib Helba, Aphik tei Rehob kamiyungrogo tong bainai bororokno rwkhlaiwi rohor li ya.

³²Aserni bororok Kananrok bai’-no tong lai kha, tamni hwn ba bórok a bororokno rwkhlaiwi rohor li ya.

³³Naptali bosongrok Bet-semes bai Bethanat kamiyungo tong bainai bororokno rwkhlaiwi rohor li ya, tamo khe Kananrok bai baksa pal tong lai kha tei bórokno sikiri-sokoro khlaiwi samung tang rw bai kha.

³⁴Amorsarok hathái kamini Dan bosongni bororokno ha panthoro phainani rw li ya.

³⁵Amorsarok Aijalono, Salbimo tei hachuk Harhereso tong kha, tamo khe Josepni núkhungni bororok bórokni saka-o kosonwi tong kha tei phan khe samung tang rw kha.

³⁶Amorsarokni ha ari wng kha, Akrabimni simi toksaui, tei Selani simi teibo saka bwkhak.