Read Kok Borok BUJ THUMNAIROK 10 Bible Online

BUJ THUMNAIROK 10 - Kok Borok bible

BUJ THUMNAIROK 10

¹Abimelek thwimani ulo Puani bwsla Tola, Dodoni busuk Israilno phiyóknani bagwi phai kha. Bo hathái kami Ephraimni Samiro tongnai Isakar bosongni borok.

²Bo Israilni nokha bisik nwichitham jora tẃiphang tong kha, hakhe bo thwi kha tei Samiro phobjak kha.

³Tola thwimani ulo Giliadni Jair phai kha. Bo Israilrokno nokha bisi nwichinwi tẃither kha.

⁴Bini bwsla khorok thamchi tongo, bórok koraichirka mak thamchi-o kasa lai-o; bórokni khungthamchi kamiyungrok tongo, abórok wng kha Giliad ha-o, abórok tabuksak jora Habot-jair hwnwi hwnjago.

⁵Jair thwi khe Kanano phobjak kha.

⁶Israilrok haino hai Subraiyungni bwskango sumsok khlaiwi Bal mwtai bai Astartesno tei Siriyani, Sidonni, Moabni, Ammonni tei Philistiani mwtairokno khulum lai kha. Bórok Subraiyungno yakarwi tei bono mon lai li ya.

⁷Hakhe Subraiyung Israilrokno belai khe jolijagwi, bórokno Philistiasa bai Ammonsarokni yago yapharwi rw kha.

⁸Bórok Jordan twimani salka phaising ha Amorni Giliado tong bainai Israilrokno nokha bisi chichar jora sátok kha tei kusup kha.

⁹Ammonsarok Juda, Benjamin, Ephraimni bosongrok bai choba nang lainani bagwi Jordan twima bárwi phai lai kha. Israilrok belai ámang-chímang wng bai kha.

¹⁰Hakhe Israilni bororok Subraiyungni thani chirigwi hai hwnwi kap lai kha, “Chwng nini bwskango sumsok khlai kha, tamni hwn ba chwng chini Kaitorno yakarwi Bal mwtairokno khulum kha.”

¹¹Subraiyung Israilrokno hai hwnwi sa kha, “Ijipsarok, Ammonsarok, Amorsarok, Philistiasarok,

¹²Sidonsarok, Amaleksarok, Maonsarok norokno sátok phuru, norok ani thani kap lai khe ang norokno bórokni yakni phiyók yaui da tong?”

¹³Hai phano norok ano yakarwi Bal mwtaino khulum lai-o. Aboni bagwi ang tei norokno phiyók glak.

¹⁴Tháng di, norok chongmani mwtairokni thani kap laiwi di, norok leng phuru bórok phiyók phai thung.

¹⁵Phiya Israilni bororok Subraiyungno hai hwnwi sa lai kha, “Chwng sumsok khlai kha, nini muchung tẃi’-no khlai di, chwngno tabuk phiyók ja di.”

¹⁶Hakhe bórok bebak buini hani mwtairokno khibiui rohorwi Subraiyungno khulum lai kha, hakhe bo Israilrok lengma nugwi belai bwkha khamjak kha.

¹⁷Hakhe Ammonni sengkrakrok chobani bagwi tiyar wng laiwi, Giliado sengkrakrok batham khlai kha. Israilni bororok thansa khe phai laiwi Mijpa-o kuthum lai kha.

¹⁸Aro bororok bai tẃiphangrok khoroksa tei khoroksa hai hwnwi sẃng lai kha, “Sabo Ammonsarok bai nang lainani tẃithernai? Bono Giliado tong bainairokni bokhorok wngnai.”