Read Kok Borok BUJ THUMNAIROK 11 Bible Online

BUJ THUMNAIROK 11 - Kok Borok bible

BUJ THUMNAIROK 11

¹Giliadsa Jepta, phan gwnang sengkrak khoroksa baliknai bwrwini bwsla. Bini bupha wng kha Giliad.

²Bini bihik bai teibo bwsa man kha, Bórok tor bai khe Jeptano nokni rwkhlai kha. Bórok bono hai hwnwi sa kha, “Nwng chini aphani thani mungsa banta mannani kwrwi, nwng tei khoroksa bwrwini bwsla se.”

³Jepta bini takhukrokni nokni khárwi thángwi Tob ha-o tongwi kha. Aro borok hamyarok thumwi bórok bai tong kha.

⁴Ammonsarok Israil bai choba nang laimani kisa ulo

⁵Ammonsarok Israil bai choba nang lai phai khe, Giliadni tẃiphangrok Jeptano ha Tobni tubunani tháng lai kha.

⁶Bórok Jeptano hai hwnwi sa kha, “Phai di, chini bokhorok wng phai di, hakhe chwng Ammonsarok bai choba nang laiwi man anw.”

⁷Tamo khe Jepta Giliadni tẃiphangrokno hai hwnwi sa kha, “Norok ano naislerwi aphani nokni rwkhlaiwi rohor lai ya da? Norok tamni tekto man phuru khe ba ani thani phai lai?”

⁸Giliadni tẃiphangrok Jeptano hai hwnwi sa lai kha, “Tabuk nono chini palo tlangna bagwi chwng uphil kha, Ammonsarok bai choba nang lainani bagwi nwng se Giliadni bororokno tẃither phai si di.”

⁹Jepta bórokno hai hwnwi sa kha, “Ammonsarok bai choba nang lainani bagwi norok ano nogo kiphil rwui tlangwi, Subraiyung bórokno ani yago yaphar khe, ang norokni bokhorok wngnai.”

¹⁰Giliadni okrarok hai hwnwi sa kha, “Subraiyung se chini sakki wngnai, nwng sama hai’-no chwng khlainai.”

¹¹Hakhe Jepta bórok bai pal tháng kha, bororok bono tẃiphang tei bokhorok snam lai kha, Jepta Mijpa-o Subraiyungni bwskango bebak bini kókrok sa kha.

¹²Hakhe Jepta Ammonsarokni habugrani thani tẃitun rohorwi hai hwnwi sa hor kha, “Nwng bai tamo khek laima tongwi chini ha bai choba nang laina phai?”

¹³Ammonsarokni habugra Jeptani tẃitunno hai hwnwi sa kha, “Israilrok ha Ijipni yógwi phai phuru ani ha Arnon twimani simi, Jabok twima tei Jordan twimano na kha. Nwng tabuk abono kwchang kwchang khe kiphilwi rw di.”

¹⁴Jepta haino hai Ammonsarokni habugrani thani tẃitun rohor phi kha.

¹⁵Bo hai hwnwi sa kha, “Omo Jepta sa-o, Israilrok Moab ha bai Ammonsarokni hano segwi na ya.

¹⁶Bórok ha Ijipni phai phuru, Israilrok hasing panthor tẃi khe Twijlang Kwchak wngwi Kadeso phai lai kha.

¹⁷Hakhe Israilni bororok Idomni habugrani thani ‘Chwngno nini ha tẃi thángnani rw ja di’ hwnwi tẃitun rohorwi sa hor kha; phiya ba Idomni habugra abono khna li ya; bórok Moabni habugranobo san lai kha, bo’-bo bórokno bini ha tẃi thángna rw li ya. Hakhe Israilrok Kadeso’-no tong lai kha.

¹⁸Hakhe bórok hasing panthoro him laiwi Moab hani salka phaising sók phai ya sak Idom bai Moab hano kiting laiwi Arnonni tei babaisa bwkhak batham kha lai kha, bórok Arnonno bárwi tháng lai li ya, tamni hwn ba Moabni ha ari klai-o.

¹⁹Hakhe Israilrok Amorni habugra Sihon tei Hesbonni habugrani thani tẃitun rohorwi ‘chwngno norokni ha tẃi chini ha-o thángnani rw ja di,’ hwnwi sa hor kha.

²⁰Tamo khe Sihon Israilrokno bini ha tẃi thángna rw li ya. Sihon bini bororokno thumwi Jahaso batham kha laiwi Israilrok bai choba nang lai kha.

²¹Tamo khe Subraiyung Israilni Kaitor Sihon bai bini bororokno Israilrokni yago yaphar kha. Hakhe Israilrok Amorsarok tongmani amchoino na bai kha.

²²Bórok bebak Amorsarokni amchoirokno salgrabaini Arnonni simi salsibaini Jabok jora tei hasing panthorni salkani salthángni Jordan jora harokno naui pái kha.

²³Hakhe nai di Subraiyung Israilni Kaitor se Amorsarokno bini borok Israilrokni kahamni bagwi mecheno. Nwng ba sakno da bórokni jidolo tonna muchung?

²⁴Hakhe ba norok abono da kiphilwi manna chaitok? Norokni mwtai Kemos norokno rwmano’-no noroknibo manthai. Tamo khe Subraiyung, chini Kaitor chini bwskangni rwkhlaiwi rohormani a bororokni’-no se naui pái si-o.

²⁵Moabni habugra Jiporni bwsla Balakni slái norok ha da ham kuk ba? Bo Israilrokno da batai? Bo chwngno kebengwi choba-o tha da tháng?

²⁶Tamo khe nokha bisi thamra jora Israilrok Hesbon, Aroer tei abono kitingwi tong bainai kami kotorrok tei Arnon twima rukungo tong bainai kamiyungrokno yago na bai kha. Tamni norok a jora-o abórokno kiphilwi na lai man ya ba?

²⁷Aboni bagwi ang mungsa hamya khlai ya, nwng se choba phnangwi hamya khlai-o. Subraiyung se buj thumnai, bo se tini Israilrok bai Ammonsarokni bagwi chongnai.”

²⁸Phiya ba Ammonsarokni habugra Jepta sa hormani kókno khunju kan li ya.

²⁹Hakhe Subraiyungni phola Jeptani aro phai kha, bo Giliad bai Manaseni tẃi thángwi Giliadni Mijpa wngwi Ammono tháng kha.

³⁰Jepta Subraiyungni thani hai hwnwi swmai tang kha, “Nwng Ammonsarokno ani yago yaphar khe,

³¹ang Ammonsarokno mechenwi kwplai wngwi kiphilwi phai phuru ani nok bisingni swkang ang bai malaina phainai borokno nini thani sógwi yapharmung yapharnai.”

³²Hakhe Jepta Ammonsarok bai choba nang lainani twima bárwi tháng kha tei Subraiyung bórokno bini yago yaphar kha.

³³Bo Bórokno Aroerni simi ganani amchoi Minnit tei Abel Keramim jora bebagwi kamiyung nwichini bororokno tanthar-súthar khlaiwi kwbángma buthar bai kha, hakhe Israilrok Ammonsarokno mechen kha.

³⁴Jepta bini nok Mijpa-o kiphilwi tháng khe, bini bwsajwk bukurni tamjaknai tamwi, mwsaui bo bai malaina phai kha. Bini bwsa khoroksa susukno tong jamani.

³⁵Bo bono nuk khe bini rí sichigwi hai hwnwi sa kha, “O ani sajwkma nwng ani bwkha kham rwui kirimasingcha khlai kha, tamni hwn ba ang Subraiyungni thani kók rwmani tei kiphilwi naui man glak.”

³⁶Hakhe bo hai hwnwi sa kha, “Ani apha, nwng Subraiyungni thani kók rw khe, nini búkhúkni nongkhormani haino khlai di, tabuk Subraiyung nini kena ari Ammonsarokno yagul su-ui nono kwplai khlai kha.”

³⁷Phiya ba bwrwi buphano hai hwnwi sa kha, “Ani bagwi samung kaisa khlai di, ano saichung khe talnwini bagwi yakarwi klang di, ang ani bayaprok bai hachugo thángwi himgurungwi kabwinai tamni hwn ba ang tei ma káijak glak.”

³⁸Bo talnwini bagwi tháng di hwnwi rohor kha. Bo bini bayaprok bai hachugo thángwi kap lai kha, tamni hwn ba bo káijak ya khe ma thwi sinai.

³⁹Talnwini ulo bo buphani thani kiphilwi phai kha. Bo Subraiyungni thani khúk perma haino khlai kha, bo káijak yaui ma thwi kha. Abo se Israil hodani raida wng si-o.

⁴⁰Israil bwrwi siklarok bisi brúm Giliadsa Jeptani bwsajwkno muitu khlaiwi salbrwi jora kap lai-o.