Read Kok Borok BUJ THUMNAIROK 13 Bible Online

BUJ THUMNAIROK 13 - Kok Borok bible

BUJ THUMNAIROK 13

¹Israilrok haino hai Subraiyungni thani sumsok khlai phi khua. Subraiyung bórokno Philistiasarokni yago nokha bisi brwichi jora yaphar kha.

²A jora-o kami kotor Jorani borok khoroksa Manoa hwnwi tongo, bo Dan bosongni borok, bini bihik bwsa man ya banji se.

³Subraiyungni suari bwrwimani thani nukjagwi hai hwnwi sa kha, “Nai di, nwng bwsa man ya banji se, phiya ba nwng tabuk bwsa chwla khoroksa mannai.

⁴Aboni bagwi hus khe tong di, chuak tei arak ta nung di tei chámung selengmasingcha manwirok ta chá di,

⁵nai di, nwng sakderiya wngwi chwla bwsa khoroksa banai. Bini bokhrok ta sil di, tamni hwn ba bini achaima salni simi’-no bo Kaitorni thani Najarit wngnai; phiya bo Israilsongno Philistiasarokni yakni phiyókna chengnai.”

⁶Hakhe bihik bwsaini thani phaiwi hai hwnwi sa kha, “Kaitorni borok Khoroksa ani thani phai kha, bo kirimasingcha Kaitorni suari hai se nukjago, ang bono buroni phai hwnwi sẃngjak li ya tei bo bini mungbo ano sa lang li ya.

⁷Phiya ba bo ano bwsa chwla khoroksa mannai hwnwi sa kha, bo ano chuak tei arak tei selengmasingcha manwirok ta chá di hwnwi dagi lang kha, tamni hwn ba chwrai kwthang tong lang sak Kaitorni thani Najarit hwnwi mung pharjaknai.”

⁸Hakhe Manoa Subraiyungni thani hai hwnwi suri kha, “O Subraiyung nwng rohormani Kaitorni borok chini thani phaiwi chwla chwrai achai khe chwng tamo khlaima nangno sa phai thung.”

⁹Kaitor Manoa surimano khna kha, Kaitorni suari tei uáisa bwrwini thani panthoro achugwi tongma jora-o phai kha, phiya ba bwsai Manoa aro kwrwi,

¹⁰bwrwima khachigwi thángwi bwsaino hai hwnwi saui kha, “Ani aro uáisa phainai borok haino hai phai phi kha.”

¹¹Manoa bachaui bihikni uklogo tháng kha, bo a borokni thani thángwi hai hwnwi sẃng kha, “Nwng da ani bwrwi bai kók sanai?” “Ang’-no” hwnwi bo sa kha.

¹²Hakhe Manoa hai hwnwi sẃng kha, “Nini kók nang phai phuru khe, a chwraisa tamo khlainai? Bo bahai khe tongna nangnai?”

¹³Subraiyungni suari Manoano hai hwnwi sa kha, “Ang nini bwrwino samani haino bo hus khe ma tongnai.

¹⁴Bo angur barini manmani manwino ma chá glak, bo angur bwtwi eba pheknai nungmung tei chámung kusumrok ta chá thung, ang samani kókrokno bo kaham kheno ma khlai bainai.”

¹⁵Manoa Subraiyungni suarino hai hwnwi sa kha, “Kisa tong ja gra di, chwng nini bagwi punsa masa sóng gra anw.”

¹⁶Subraiyungni suari hai hwnwi sa kha; “Ang tong phano norokni chámungno chá glak, tamo khe sógwi yapharna bagwi tiyar khlai khe, Subraiyungni thani se abono yaphar di.” (Tamni hwn ba Manoa bono Subraiyungni suari hwnwi sini li ya.)

¹⁷Manoa hai hwnwi sa kha, “Nini mung tamo? hai khe se nini kók nang phai phuru chwng nono bóriui mannai.”

¹⁸Tamo khe Suari hai hwnwi sa kha, “Nwng tamni ani mung sẃng? Abo kwmamsingcha se.”

¹⁹Hakhe Manoa punsa masa tei maichlam naui abono holongni háyá-o, kwmamsingcha khlainai Kaitorni thani yaphar kha.

²⁰Háyáni hoku saka kasa phuru Manoa bai bini bihik Subraiyungni suari hoku bising tẃi khe chuknoha-o thángma nuk khe, bórokni mwkhang ha-o bomkhlai lai kha.

²¹Subraiyungni suari Manoa tei bini bihik bai nukjak li ya. Manoa saui man kha abo Subraiyungni suari se hwnwi.

²²Manoa bini bihikno hai hwnwi sa kha, “Chwng kubui’-no ma thwi sinai laha, tamni hwn ba chwng Kaitorno nuk kha.”

²³Tamo khe bihik hai hwnwi sa kha, “Subraiyung chwngno butharna muchung khe chini yapharmungrokno yachak glak kha mun, bo chwngno abórokno phunuk glak kha mun tei aswk kók sa glak kha mun.”

²⁴Bwrwima bwsa chwla man khe, bini mung Samson hwnwi phar kha. Chwrai tor khe lok khe Subraiyung bono hamari rw kha.

²⁵Subraiyungni phola Jora bai Estaolni kwchar Dano tong phuru phan rw kha.