Read Kok Borok BUJ THUMNAIROK 14 Bible Online

BUJ THUMNAIROK 14 - Kok Borok bible

BUJ THUMNAIROK 14

¹Salsa Samson Timna-o tháng khe bo aro khoroksa Philistiani bwrwino nuk kha.

²Bo nogo kiphilwi thángwi buma bai buphano hai hwnwi saui kha, “Ang Timna-o Philistiani bwrwi khoroksano nuk kha, ang bo bai káijakna muchungo, ano bono naharwi rw phai di.”

³Phiya ba bini buma bai bupha hai hwnwi sa kha, “Chini bosong bisingo tei sakni bororokni bisingo ba bwrwi kwrwi da? Tamni nwng Philistiasarokni aro thángwi ba bwrwi naina klai?” Tamo khe Samson buphano hai hwnwi sa kha, “Bono se nahor di, ang bono hamjago.”

⁴Bini buma bai bupha abo Subraiyungni khlaima hwnwi saui man ya; tamni hwn ba bo Philistiasarok bai choba nang lainani bagwi lama rutugwi tongo. A jora-o Philistiasarok Israilrokno kusubwi tongo.

⁵Hakhe Samson buma tei bupha bai khe Timna-o tháng lai kha, bo angur bari tẃi thángwi tong phuru achomsa singho masa pungma khna kha,

⁶Subraiyungni phan achomsa bini saka-o phai khe, bo mungsa yago kwrwi’-no punsa masano khlaima hai khe singhono swkangwi pái kha. Hai phano bo tamo khlai kha, bini buma bai buphano mungsa sa li ya.

⁷Hakhe bo thángwi bwrwi bai kók sa lai kha, a bwrwibo Samsonno khá phurjak kha.

⁸Sal kisa ulo Samson a bwrwi bai káijakna tháng kha, aphuru bo butharmani singhono naina thángwi nai ba singhoni bisingo piya bumarok bai piya bwtwi nugwi kha.

⁹Bo abono khonogwi yago naui lama him twtwi chá kha, hakhe buma bai buphani thani thángwi bóroknobo rw kha. Bórokbo abono chá kha, phiya ba Samson abono singho kwthwini na-o hwnwi sa li ya.

¹⁰Bini bupha bwrwini nogo nainani tháng khe, Samson aro chámung panda khlai kha. Abo hai khe chwlarok ma khlai-o.

¹¹Philistiasarok bono nuk khe, bo bai tongna bagwi borok khorok thamchi nahor lai kha.

¹²Samson bórokno hai hwnwi sa kha, “Norokno kaisa kók sẃng anw, abo tamo norok pandani salsni bisingo saui man khe, naithokma kaham rí rwnai.

¹³Phiya ba norok abono saui man ya hwn khe ano naithokma kaham rí ma rw bainai.” Bórok bono hai hwnwi sa kha, “Tamono sa di, chwng khna grana.”

¹⁴Bo hai hwnwi sa kha; “Chánairokni bisingni chámung phai-o, phan gwnang bisingni kothok phai-o.” Salthamni bisingobo bórok abo tamo saui man li ya.

¹⁵Sal brwi-o khe bórok Samsonni bihikno hai hwnwi sa lai kha, “Nini nwsaino abo tamo sẃngwi di, wng ya khe chwng nono tei nwphani nokrokno hór bai sógwi páinai. Chwngno phan swbaina bagwi da oro ring?”

¹⁶Samsonni bihik kap twtwi bini thani thángwi hai hwnwi sa kha, “Nwng ano naislerjago, kisa phano hamjakma kwrwi, nwng ani bororokno kók sẃngwi ba ano abo tamo mungsa sa ya.” Bo bini bwrwino hai hwnwi sa kha, “Ang ani apha bai amano suda abo tamo sa ya kho. Tamni ang nono abo sana klai?”

¹⁷Bwrwi, bini bwskango panda páiyasak salsni jora kap kha; tei belai kengaimani bagwi bo abono bono ma sa kha. Hakhe bo bini bororokno abo tamo thángwi saui kha.

¹⁸Salsni salo sal hap ya swkang kamiyungni bororok Samsonno hai hwnwi sa kha; “Piya bwtwini slái tamo kwtẃi tong? Singhoni slái tamo phan gwnang tong?” Samson bórokno hai hwnwi sa kha, “Norok ani musuk bai al chuai ya khe, abo tamo norok saui man glak kha mun.”

¹⁹Aphuru khe Achomsa bini thani Subraiyungni phola phai kha, hakhe bo Askelono tháng kha. Bo kami kotorni borok khorok thamchirokno buthar kha tei bórokni manwi-khwnwi segwi tubu-ui rí naithok naui bini kókno saui mannairokno rw kha. Bo jolijagwi buphani nogo kiphilwi tháng kha.

²⁰Samsonni bihikno bini bayap kaham kukni thani yapharjak kha.