Read Kok Borok BUJ THUMNAIROK 15 Bible Online

BUJ THUMNAIROK 15 - Kok Borok bible

BUJ THUMNAIROK 15

¹Sal kisa ulo Samson gom thumna jora-o bini bihikni aro tháng phuru punsa masa tlang kha. Bo bwrwini buphano hai hwnwi sẃng kha. “Ang ani bwrwini nok bisingo thángnai.” Phiya ba bwrwini bupha bono bisingo hap rw li ya.

²Bo Samsonno hai hwnwi sa kha, “Nwng bono naisler kha hwnwi khá chongwi ang bono nini kichingno rw kha. Bini hanok bini slái’-bo ham kugo. Nwng bono na si di.”

³Samson hai hwnwi sa kha, “Tabuk ang Philistiasarokno hamya khlai phano ani mungsa cha ya tong glak.”

⁴Hakhe Samson thángwi siyal mak thamrarokno romwi kha, bo abórokno maknwi maknwi khe khitungo khaui rw kha tei homchangbo khaui rw kha.

⁵Bo homchango hór phnangwi siyalrokno Philistiasarokni mai panthoro phiyógwi rwi kha. Abo tẃi khe bo mairok tei angur barirok bai olibrok hór bai sógwi pái kha.

⁶Hakhe Philistiasarok abo khnaui, “Abo sabo khlai kha?” hwnwi sẃng lai kha tei bórok hai hwnwi sa kha, “Samson se khlai-o, tamni hwn ba Timnitsani chamari Samsonni bihikno bikichingsongno rw kha.” Hakhe Philistiasarok thángwi bwrwi bai buphani nokrok bebak hór bai sógwi pái lai kha.

⁷Samson bórokno hai hwnwi sa kha, “Norok abo hai khlai khe, ang yagul su bai ya sak tei bathak glak.”

⁸Bo bórokno tanthar-súthar khe buthar bai kha, hakhe bo Itamni ha gurung besero tongwi kha.

⁹Hakhe Philistiasarok phaiwi Juda-o batham kha laiwi kami kotor Lehino koson lai kha.

¹⁰Judiani bororok bórokno hai hwnwi sẃng kha, “Tamni chwngno kebengwi phai lai?” Hakhe bórok hai hwnwi sa kha; “Chwng Samsonno khanani tei chwngno bo khlaimani hai bonobo khlainani se phai-o.”

¹¹Hakhe Judani bororok khorok 3,000 Etamni hagurung holong besero Samsonni aro thángwi hai hwnwi sa lai kha, “Philistiasarok chini bugra wngmani nwng saui man ya da? Nwng chwngno tamo khlai kha?” Bo hai hwnwi sa kha, “Bórok ano khlaima haino angbo bórokno khlai kha.”

¹²Bórok hai hwnwi sa kha, “Chwng nono khaui tlangwi Philistiasarokni yago yapharna se phai lai-o.” Samson hai hwnwi sa kha, “Norok ano buthar glak hwnwi swmai tang di.”

¹³Bórok hai hwnwi sa kha, “In’-hi, chwng nono khaui bórokni yago se yapharnai, chwng nono buthar glak.” Hakhe bórok bono buduk twngnwi kwtal bai hagurungni bono khaui tubu lai kha.

¹⁴Bo Lehi-o sók phai khe Philistiasarok bini bwkhak chirigwi khachigwi phai lai kha; hakhe Subraiyungni Phola bono achomsa phan rw phai khe bini sak bai yago khajak tongmani abo chwkabo hór nangma hai wng kha, tei choui tháng kha.

¹⁵Hakhe bo aro kaisa koraichirkani thwi dropni bekreng manẃi abo bai borok 1,000 rokno buthar kha.

¹⁶Samson hai hwnwi sa kha; “Koraichirkani chenglaini bekreng bai ang borok khorok 1,000 no buthar kha; koraichirkani chenglaini bekreng bai ang bórokno rúngma saka rúng kha.”

¹⁷Aboni ulo bo bekrengno khibiui rohor kha, a jagano Ramat-lehi mung pharjak kha.

¹⁸Hakhe Samson belai khe twi kangjak kha tei Subraiyungno ringwi hai hwnwi sa kha, “Tabuk ang twi kangwi da ma thwinai, nwng nini selengni yak tẃi kotor khe kwplai khlai kha tei Philistiasarokni yago da ma klai phi sinai?”

¹⁹Hakhe aro Lehi-o hakhor pekhagwi twi phai rw kha, Samson twi nungwi phan man phi kha. Abono Enhakore hwnwi mung pharjak kha. Abo tabuk jora Lehi-o tong kho.

²⁰Philistiasarokni molo Samson Israilno nokha bisik nwichi jora buj thum kha.