Read Kok Borok BUJ THUMNAIROK 16 Bible Online

BUJ THUMNAIROK 16 - Kok Borok bible

BUJ THUMNAIROK 16

¹Salsa Samson Philistiasarokni kamiyung Gaja-o tháng kha, aro bo khoroksa baliknai bwrwi bai malaiwi bo bai thu kha-chá kha.

²Gajani bororok Samsonno aro nuk kha, hakhe bórok abono kiting laiwi kamiyung duglamo bono hopung naising laiwi tong lai kha, phung jora bono naising laiwi buthar laina, hwnwi bórok sa laiwi hopung siring siring khe naichomwi tong lai kha.

³Tamo khe Samson hor dibor jora se aro tong si-o, aphuru khe bo bachaui kamiyung duglamni dugar, buphang, bebak phuicha baiwi bini bangora-o naui Hebronni hathái saka-o tlang bai kha.

⁴Aboni ulo Samson Sorek harungni Delila hwnwi khoroksa bwrwino hamjak kha.

⁵Philistiani bugrarok thángwi a bwrwino hai hwnwi saui kha, “Bini phan buro tong, bahai khe chwng bono khaui mechen mannai, bono sẃng di, chwng khorok thwgwi nono chisara rukphaini rang belep rwnai.”

⁶Hakhe Delila Samsonno hai hwnwi sẃng kha, “Nini aswk phan buro tong, khoroksa swk nono khaui mechenna hwn khe tamo ma khlaithai?”

⁷Samson bono hai hwnwi sa kha, “Bórok ano chakhla buduk kwtal bai ano kha khe, angbo bui bai baksa phan kwrwi wngwi thángnai.”

⁸Hakhe Philistiani habugrarok kwtal kaisni chakhla buduk bwrwini aro tubu lai kha, a bwrwi abo bai Samsonno khaui rw kha.

⁹Bwrwi bororok tei kubun nok bisingo naising laiwi tong lai-o, bwrwi bono hai hwnwi sa kha, “Samson, Philistiasarok nini saka-o klai kha,” phiya ba bo a chakhla budukno hóro sókjak buduk hai khe sachu-ui rw kha. Bórok bini bisingni phanno saui man ya kho.

¹⁰Delila Samsonno hai hwnwi sẃng kha, “Nwng ano tatal saui bandi kha, nono bahai khe khaui mannai ano sa di,”

¹¹Bo bwrwino hai hwnwi sa kha, “Uáisa phano samungo phnangjak ya kho abo hai buduk kwtal bai ano kha khe ang tei kubun bororok hai phan kwrwi wngnai.”

¹²Hakhe Delila buduk kwtalrok naui bono abo bai khaui hai hwnwi sa kha, “Samson! Philistiasarok nono romna phai kha,” bororok tei khungsa nogo huijagwi tong lai-o, phiya ba bo khutwng sachu tẃi khe budukno bini yakni sachu-ui khibi kha.

¹³Delila Samsonno hai hwnwi sa kha, “Tabukbo nwng ano saui bandi te khua, nwng bahai khe khajaknai ano sa di.” Bo hai hwnwi sa kha, “Nwng ani bokhorokni bwkhnai thup snino naui nini ríno surang bai tak khe ang kubun hai kebel wngnai.”

¹⁴Hakhe bo thu-ui tong phuru Delila bini bokhorokni bwkhnai thupsni naui abono bini rí bai surangno baksa tak kha, Samson, Philistiasarok nono rom kha, hwnwi sa kha, phiya ba bo thu-ui tongmani bachaui bini bokhorokni bwkhnairokno kheng bai kha.

¹⁵Bwrwi bono hai hwnwi sa kha, “Nini bwkha ang bai kwrwi twtwi nwng bahai khe ano hamjago hwnwi saui man de? Nwng ano uáitham bandi kha, nwng tabukbo nini phan buro tong sa ya kho.”

¹⁶Bwrwi sal brúm brúm sẃngwi máng se tong si-o, abo bai bo belai tekto wngjak kha.

¹⁷Páithago khe bo bwrwino hai hwnwi kók kubui saui rw kha, “Ani bwkhnai uáisa phano siljak ya kho, tamni hwn ba ang amani ok bisingni simi’-no Kaitorni thani Najarit hwnwi yapharjak. Ani bwkhnai siljak khe ani phan nongkhorwi thángnai tei kubun borok hai phan kwrwi wngnai.”

¹⁸Delilabo kubui kók sa kha hwnwi saui man khe Philistiasarokni bugrarokno tẃitun rohorwi hai hwnwi sa hor kha, “Tabuk tei uáisa phai bai di, bo ano kubui kók saui rw kha.” Hakhe bórok rang tubu laiwi bwrwini aro phai lai kha.

¹⁹Delila Samsonno bini yakung yaphungo kobong rwui muthu kha; hakhe bo borok ringhorwi bini bwkhnai chopsni khatrojakno sil kha. Aphuru khe bwrwi bono tekto rwna cheng kha, tamni hwn ba bini phan kwrwi kha ba.

²⁰Hakhe bwrwi sa kha, Samson, Philistiasarok nono rom phai kha. Bo thumani bachaui hai hwnwi uansuk kha, “Ang swkang phuruni hai khe yógwi thángnai.” Subraiyung bono yakarwi thángma bo saui man ya kho.

²¹Philistiasarok bono romwi bini mokol kheregwi khibi bai kha tei bono pitolni sikol bai khaui Gaja-o tubu lai kha, bo along bisingo mai súkjaknai samung ma khlai kha.

²²Tamo khe bini bokhorokni bwkhnai haino hai loksa phi kha.

²³Philistiani habugrarok bórokni mwtai Dagonni thani sógwi yapharmung yapharna bagwi tei tongthok laina bagwi kuthum laiwi hai hwnwi sa lai kha, “Chini mwtai chini kena ari Samsonno chini yago yaphar kha.”

²⁴Bororok bono nuk khe, bórokni mwtaino lob laiwi hai hwnwi sa lai kha, “Chini mwtai chini kena arino yaphar kha, chini hano sátoknai tei borok kwbángma butharnai.”

²⁵Bórok belai tongthok laiwi hai hwnwi sa lai kha, “Samsonno ring di, bo chwngno mwnwi rw phai thung.” Hakhe bórok Samsonno alongni tubu lai kha, bo bórokno ma tongthok rw kha. Bórok bono thongla kainwi kwcharo bacha rw kha,

²⁶Samson bono yak tolwi tubunai chwraino hai hwnwi sa kha, “Ang swndarwi tongwi manna tẃi khe nokni thonglano ano tang rw di.”

²⁷Nok bisingo bwrwi bai chwlarok kupulung, Philistiasarokni habugra khorokbarok aro tong bai-o tei núkhúng saka-o khorok 3,000 swk bwrwi chwlarok tong bai-o, Samson bórokno mwnwi rwui tongmano nai lai bai-o.

²⁸Samson Subraiyungni thani hai hwnwi suri kha, “O Kaitor, ani mokol kolnwini bagwi Philistiasarokno uáisa bai yagul su-ui manna tẃi khe ano muitu khlai ja di, ang suri ja-o, tabuk uáisa ano phan rw ja di.”

²⁹Hakhe Samson nokno sungchai tnnai kwcharni thongla kongnwino romwi abórokno yasa yagra tei yasa khe yaksi babai-o swndar kha.

³⁰Hakhe Samson hai hwnwi sa kha, “Philistiasarok bai baksa angbo thwinai.” Aphuru khe bo bini bebak phan bai dagar kha; a nok bugrarok tei bebak bisingo tong bainai bororokni saka-o klai kha. Samson bo kwthang tong phuruni slái thwima jora-o se borok kwbáng kuk buthar si-o.

³¹Bini takhuksong tei bebak bini núkhungni bororok bini mangno na phaina phai lai kha. Bórok bono tlangwi Jora bai Estaolni kwcharo bupha Manoani simalwngo phob lai kha, bo Israilrokno nokha bisik nwichi jora tẃither kha.