Read Kok Borok BUJ THUMNAIROK 17 Bible Online

BUJ THUMNAIROK 17 - Kok Borok bible

BUJ THUMNAIROK 17

¹Ephraimni hathái kami-o borok khoroksa tongo. Bini mung wng kha Mika.

²Bo bini bumano hai hwnwi sa kha, “Nini chisara, rukphaini rang belep khokjak phuru nwng sikhokno swraimani abo ang khna kha, abo tabuk ani yago se,” abo ang se na-o, tamo khe tabuk ang nono kiphilwi rw-o. Bini buma hai hwnwi sa kha, “Angsla, Subraiyung nono hamari rw thung.”

³Bo bini bumano rukphaini rang sasai-sa kiphilwi rw kha tei buma hai hwnwi sa kha, “Ang rukphaini belepno sajlani bagwi Subraiyungni thani yaphar kha, abo rukphai khopjak buphangni mwtai snamjaknai. Abo bai’-no ang tabuk rukphaino kiphilwi rw kha.”

⁴Bo bumano rang kiphilwi rw khe, bini buma rukphai naui, taknaino rw kha, bo abo bai mwtai snamwi, rukphai khopjak buphangni mwtai snam kha, abo Mikani nogo tong kha.

⁵Mikani mwtai khulumma háyá tongo. Bo mwtairok tei ephod snamo tei bini sajla khoroksa ochai wng kha.

⁶Aphuruni jora-o Israilo habugra kwrwi, sak sak muchung tẃi se khlai bai-o.

⁷A jora-o Judani Betlehem kami kotoro khoroksa Lebi sikla tongo.

⁸Bo kubunni thai-o tongnani bagwi Betlehemno yakarwi tháng kha, bo bini samung khlaina bagwi Ephraimni hathái kami Mikani nogo sók phai kha,

⁹Mika bono hai hwnwi sẃng kha, “Nwng buroni phai?” Bo hai hwnwi sa kha, “Ang Judani Betlehemo tongnai Lebi se. Ang kwrẃngsa swgo tongna rutugwi tongo.”

¹⁰Mika bono hai hwnwi sa kha, “Ang bai tong di, ani apha tei ochai wng di, ang nono nokha bisi sa-o rukphai belep lep chi rwnai tei rírok bai chána rwnai.”

¹¹Sikla Lebi Mika bai tongna gosi kha, bo bini khoroksa bwsla hai se wng si-o.

¹²Mika bono ochai snam kha tei Mikani nogo tong kha.

¹³Mika hai hwnwi sa kha, “Ani Lebini ochai tongmani bai Subraiyung tabuk ano hamcha rwnai.”