Read Kok Borok BUJ THUMNAIROK 18 Bible Online

BUJ THUMNAIROK 18 - Kok Borok bible

BUJ THUMNAIROK 18

¹A jora-o Israilo habugra kwrwi. Aphuru Danni bosongrok ha banta manthai naituk laiwi tong lai-o, tamni hwn ba bórok Israilrokni aro kisa phano ha man lai ya kho.

²Hakhe Danni bororok bórokni bisingni khorokba borok saiwi ha nainani bagwi Jora bai Estaolni hai hwnwi saui rohor lai kha, “Thángwi ha nai lai di,” Bórok Ephraimni hathái kami-o phaiwi Mikani nogo tong lai phai kha.

³Bórok Mikani nogo tong lai phuru, khoroksa Lebini khorang romwi man kha, bórok bini thani thángwi hai hwnwi sẃng lai kha, “Nwng oro tamo khlai? Sabo nono aro tubu lang?”

⁴Bo bórokno hai hwnwi sa kha, “Mika ano bini nogo tong rwui ang bini ochai wng kha.”

⁵Hakhe bórok bono hai hwnwi sa kha, “Chwng phaimani samung chanai da cha ya, Kaitorno sẃngwi nai di.”

⁶Ochai hai hwnwi sa kha, “Khakchangwi tháng di, Subraiyung norokni yaprino naichomwi tongo.”

⁷Hakhe borok khorokbarok aroni phai lai khe tei Laiso sók phai kha, bórok nai lai kha, aroni bororok Sidonni bororok hai khe, kirithai kwrwi kwchang tei khek laima kwrwi, ha saka-o mungsani biyal kwrwi, bórok Sidonrok bai hakchalo tong lai-o, kebo bai kwrwng laima kwrwi.

⁸Hakhe bórok Jora bai Estaolo kiphilwi phai khe bórokni takhukrok tamo tamo nuk lai kha hwnwi sẃng lai kha.

⁹Bórok hai hwnwi sa kha, “Phai di, chwng Laisno thángwi na lai anw, abo belai ha kaham nuk kha.” Oro mungsa khlai yaui ta tong lai si di, dakti thángwi na lai sinai.

¹⁰Norok aro tháng khe bororok mungsa khek laima kwrwi nuknai, abo wng kha belai ha kotor, o ha-o mungsani biyal se kwrwi, Kaitor abono norokni yago yaphar kha.

¹¹Khorok dokra Dan bosongni bororok da-seng tẃiwi choba nang laina bagwi Jora bai Estaolo tháng lai kha.

¹²Bórok thángwi Judani Kiriatjearimo batham kha lai kha. Aboni bagwi abo tabuk jora Mahanedan hwnjago.

¹³Bórok aroni khe hathái kami Ephraim Mikani nogo phai lai kha.

¹⁴Hakhe khorokba Laiso naichomna thángnairok bórokni palrokno hai hwnwi sa phai kha, “O nok bisingo rukphai bai khopjak buphangni mwtairok bai ephodni mwtai tongma norok saui da man?” Tabuk norok tamo khlainai chong lai di.

¹⁵Bórok Lebi tongma Mikani nogo phai laiwi bono kaham kwrwng da tong sẃng lai kha.

¹⁶Chobani bagwi tiyar wng laijak Danni khorok dok-ra bororok duglamo bachaui tong lai kha.

¹⁷Borok khorokba naichomna phainairok nok bisingo habwi rukphai khopjak buphangni mwtai tei kubun mwtairok bai ephod na lai kha. Aphuru tei ochairok khorok dok-ra bororok bai duglamo bacha laiwi tongo.

¹⁸Bórok Mikani nok bisingo habwi rukphai khopjak buphangni mwtaino, ephod tei kubun mwtairokno na khe ochai bórokno “Norok tamo khlai?” hwnwi sẃng kha.

¹⁹Bórok bono hai hwnwi sa kha, “Siringcha wng di, kók ta sa di, chwng bai phaiwi chini bupha tei ochai wng phai di, khoroksa borokni ochai wngma slái, Israil bosongni ochai wngma cha kuk ya diba?”

²⁰Abo bai ochai belai tongthokjagwi, mwtairok bai ephod tlangwi bórok bai pal khe Dano tháng kha.

²¹Hakhe bórok uphilwi chwrairok, mal matarok, bebak tongmano swkango khe tháng lai kha.

²²Bórok Mikani kisa hakchalo tháng khe, Mikani nok gana-o tong bainairok ring laiwi Danrokno rom laiwi

²³Danrokno naiwi chirik lai khe bórok uphilwi Mikano hai hwnwi sẃng kha, “Tamo wngwi aswk bodol khaui phai lai?”

²⁴Mika hai hwnwi sa kha, “Norok ani ochai tei mwtairok tlangwi suda tamo wng kha hwnwi sa lai-o?”

²⁵Danni bororok bono hai hwnwi sa kha, “Kók kwbáng ta sa di, wng ya khe, joli khe nwng bai nini bebak núkhung thwinai.”

²⁶Hakhe bórok tháng kha, Mika nai ba bórok belai phan gwnang hakhe bo uphilwi nogo kiphilwi tháng kha.

²⁷Mika ochai snammani bini manwirokno Laiso tongnai Dansarok tlangwi tháng bai kha, bórok aroni tong kosong tongnai kwchang kwchang bororokno khe seng bai buthar kha, phiya kamiyungno hór bai sógwi pái lai kha.

²⁸Abo Sidon bai belai hakchal tei bui bai kwtha yani bagwi bórokno kebo mwthangnai se kwrwi kha. Abo Bethrehob harungo klai-o. Danni bororok kamiyung tangwi aro tong lai kha.

²⁹Aboni mung sláiwi Laisno Jakobni bosong Danni mung tẃi khe khlai lai kha.

³⁰Danrok bórok sakni bagwi mwtai song lai kha, Musini busuk, Gersomni bwsla Jonathan, Danrokni ochai wng kha tei bini bosongrok Israilrok hani rwkhlaijakma jora ochai wng kha.

³¹Kaitorni nok Silo-o tong sak bórok Mikani mwtaino aro ton kha.