Read Kok Borok BUJ THUMNAIROK 19 Bible Online

BUJ THUMNAIROK 19 - Kok Borok bible

BUJ THUMNAIROK 19

¹A jora-o, Israilni habugra kwrwi phuru, Ephraimni hathái kami-o khoroksa Lebi tongo. Bo Judani Betlehemo tongnai bwrwi khoroksano hik kotoi na kha.

²Tamo khe bini hik kotoi bono jolijagwi bini aroni Betlehemo buphani nogo thángwi nokha tal brwi tongwi kha.

³Hakhe bini bwsai thángwi bwrwino kók kaham saui kiphil rwui tubunani chong kha. Bo seleng khoroksa tei koraichirka maknwi tlang kha, aro sógwi khe bwrwi nok bisingo tlang kha, bwrwini bupha bono nuk khe bwkha bai yachak sok kha.

⁴Bini bwkra bono tong di hwn khe, bo aro saltham jora tongwi chá lai kha, nung lai kha;

⁵salbrwini salo bórok phung aidrobo bachaui thángnani tiyar wng kha, tamo khe bwkra chamarino hai hwnwi sa kha, “Kisa chámung cháui tháng di.”

⁶Hakhe bórok khoroknwi achugwi chá lai kha, nung lai kha, aboni ulo bupha bono, “Tini horo tongwi lengla di tei sakno tongthok khe tong di,” hwnwi sa kha.

⁷Lebi bachaui thángna nai khe bwkra bono tong di hwnwi sa phi khe, hakhe bo aro tei horsa tong phi khua.

⁸Salbani phung aidrobo bachaui thángna nai khe bwrwini bupha hai hwnwi sa kha, “Mai cháui sarigo tháng di.” Hakhe bórok khoroknwino chá lai kha.

⁹Bo bini hik kotoi tei seleng khe tháng laina nai khe bwrwini bupha hai hwnwi sa kha, “Nai di sanja wngna kasu kha, tini horo tongwi khwna aidrobo bachaui tháng lai si di.”

¹⁰A borok aro tei horsa phano tongna muchungjak li ya; hakhe bini logi-o jorsa koraichirka phikungo achukthai gwnango bini hik kotoi bai bo aroni Jebusni (abo khe Jerusalem) tei babaisa bwkhak sók phai kha.

¹¹Bórok Jebus gana-o phai khe sal tháng súk kha, hakhe seleng bugrano hai hwnwi sa kha, “Phai di, chwng Jebusrokni kamiyungo bathagwi tini horo tong lai si anw.”

¹²Tamo khe bini bugra hai hwnwi sa kha, “Bórok Israilrok buya, buini hani kami-o chwng bathak lai glak, tamo khe tei kisa hakchalo thángwi Gibea-o tong lai si anw.”

¹³Bo teibo hai hwnwi sa kha, “Phai di, chwng o kamiyungno lái thángwi Gibea wng ya khe Rama-o horo tong lai anw.”

¹⁴Hakhe bórok Jebus láiwi tháng lai kha, bórok Benjaminni Gibea-o sók phai khe sal hap kha.

¹⁵Bórok Gibea-o horo tongnani bathak lai kha. Bórok kamiyungo thángwi dupasa kuaro achuk lai kha, khoroksa phano bórokno horo tong rwna tlang li ya.

¹⁶Sanja-o khe khoroksa chakra borok panthoro samung tangma kiphil kha, bo wng kha Ephraim hathái kamini borok, tabuk Gibea-o tongo (aroni bororok wng kha Benjaminsarok).

¹⁷Bo bórokno kamiyungni haphar kuaro nuk, “Norok buroni phai? Biyango thángnai?” hwnwi sẃng kha.

¹⁸Lebi hai hwnwi sa kha, “Chwng Judani Betlehemo tongmani, tabuk Ephraimni hathái kami-o thángnai, khoroksabo chwngno nogo kasa rw li ya.

¹⁹Chini koraichirkani chámung chwkap, ani bwrwi, seleng tei sakni bagwi auang bai arak tongo, mungsani phano biyal kwrwi.”

²⁰U chakra borok hai hwnwi sa kha, “Norok ani nogo phai di, ang norokno naikolnai, oro norok ta tong di.”

²¹Hakhe bo bórokno bini nogo tlang kha, koraichirkarokno chá rw kha, bórok yakungrok sú laiwi chá lai kha, nung lai kha.

²²Bórok abo hai khe tongthok laiwi tong lai phuru, achomsa khe kamiyungni uaijanai bororok phai laiwi, nokno kiting laiwi dugaro bu lai kha. Bórok a okra borokno hai hwnwi sa kha, “nini nogo phainairokno tikhlaiwi tubu di, chwng bo bai thu lai-chá lai anw.”

²³Nok bugra nongkhorwi thángwi bórokno hai hwnwi sa kha, “Hai ya takhukrok, abo hai samung hamya ta khlai bai ja di, bo ani nograi se.

²⁴Nai di, bo hik kotoi se, oro ani sajwk sikla tongo, ang bono phataro kariui tubunai. Norokni muchung tẃi bono khlai di, tamo khe a bororokni mungsa hamya ta khlai di.”

²⁵Phiya ba bórok bini kók khna li ya. Hakhe Lebi bini bwrwino phataro tlangwi bórokni thani rwui kha, bórok bwrwi bai thu lai kha, phung aiyasak jora hopung bo bai tong lai kha.

²⁶Aichugo khe bwrwino phiyógwi rohor lai kha, bwrwi phaiwi bwsai tongmani nok duglamo, sal pa ya sak klaiwi tong phai kha.

²⁷Bini bwsai phungo bachaui thángna bagwi dugar phiyok phai kha hwn khe, bini bwrwi duglamo klaijak tei bini yak phologwi dugaro romjak khe nuk kha.

²⁸Bo bwrwino hai hwnwi sa kha, “Bacha di, tháng lai si anw.” Phiya ba mungsa khorang se kwrwi kha. Hakhe bo bwrwini mangno koraichirka saka-o boksaui, bini nogo tháng kha.

²⁹Tei bini nogo sók phai khe, bo sengsa kongsa naui bini hik kotoini mangno khak chinwi khe bokocho bokhocho khlaiwi abono Israilni bebak amchoirogo rohor kha.

³⁰Abono nuknairok hai hwnwi sa kha, “Omo hai uáisa phano Israil bororok ha Ijipni nongkhorwi phaimani ulo wng ya kho, uansuk di, tamo khlaina nangnai.”