Read Kok Borok BUJ THUMNAIROK 2 Bible Online

BUJ THUMNAIROK 2 - Kok Borok bible

BUJ THUMNAIROK 2

¹Subraiyungni Suari Gilgalni Bokimo thángwi Israilrokno hai hwnwi sa kha, “Ang norokno ha Ijipni tubu-ui norokni chuchusongni thani swmai tangmani ha-o tubu kha.” Ang hai hwnwi sa kha, “Ang norok bai ani kók kha laimano swbai glak.

²Norok o ha-o tong bainai bororok bai tei mungsa kók kha laiwi man glak, norok bórokni háyárokno ma swbai bainai, tamo khe norok ani kók se khna li ya. Nai di norok tamo wngma klai!

³Hakhe ang tabuk norokno sa-o, ‘Ang bórokno norokni bwskangni rwkhlaiwi rohor glak; tamo khe, bórok norokni kena ari[1] wngnai tei bórokni mwtairok khe norokni khẃi wngnai.’ ”

⁴Subraiyungni suari bebak Israilrokni thani o kókno sa khe, bórok chirigwi kap lai kha.

⁵Aboni bagwi bórok a thaino Bokim[2] hwnwi phar kha tei aro Subraiyungno yaphar lai kha.

⁶Hakhe Josua bebak borokno yakarwi rohor bai khe, sak sakni manmani ha-o tháng bai kha.

⁷Phiya Josua kwthang tong sak tei Subraiyung aswk samung kotorma Israilrokni bagwi khlaimarokno nuknai tẃiphangrok kwthang tong lang sak bororok Subraiyungno mon lai kha.

⁸Subraiyung seleng Nunni bwsla Josua nokha bisi sara chi-o thwi kha.

⁹Hakhe bórok bono Ephraimni hathái kami, Gas hachukni salsibai bwkhak bini ha Timnat-hereso phob kha.

¹⁰Bebak bosongno thwi bai kha, Bórokni ulo tei kaisa bosong bacha kha, bórok Subraiyungnobo saui man ya tei aswk Israilni bagwi samung khlaimabo saui man ya.

¹¹Hakhe Israilni bororok Subraiyungni mokolo chajak ya samung khlaiwi Bal mwtaino monnani cheng lai kha.

¹²Bórok ha Ijipni tubunai tei bórokni chuchusongni Kaitor Subraiyungno yakarwi, bórokno kitingwi tong bainai bororokni mwtaini thani tháng lai kha; abórokno khulumui Subraiyungno joli rw lai kha.

¹³Hakhe bórok Subraiyungno pogwi Bal mwtai bai Astarteno monwi khulum lai kha.

¹⁴Hakhe Subraiyung Israilno belai khe jolijagwi bórokno sekpronairokni yago yaphar kha, bórok phaiwi bebakno tlang bai kha, bono kitingwi tong bainai bórokni arirokni thani phalwi rw bai kha tei Israilrok bórokni arirokno mechenwi man li ya.

¹⁵Subraiyung bórokno abo hai wngnai hwnwi sama haino bórok choba-o tháng brúmno Subraiyung bórokno kebeng kha. Bórok belai khe khá báijak bai kha.

¹⁶Hakhe Subraiyung buj thumnairokno bacha rwui bórokni sekpronairokni yakni mwthang kha.

¹⁷Hai phano bórok buj thumnairokni kókno khna li ya, bórok kubun mwtairok bai tong laiwi abórokno khulum lai kha, bórokni chuchusong Subraiyungni kók khnaui tongmani a lamani daktino uslu bai kha.

¹⁸Hakhe Subraiyung bórokni bagwi buj thumnairokno bacha rw kha tei Subraiyung buj thumnairok bai baksa tongwi bórokni jora-o, bórokni arirokni yakni phiyógo, tamni hwn ba Subraiyung bórokno sátokjakma nugwi khairogo.

¹⁹Phiya buj thumnai thwi khe bórok uphilwi bórokni chuchusongni slái se hamya wngwi kubun mwtaini thani thángwi monwi khulum kha tei bórokni samung hamyano yakar li ya.

²⁰Hakhe Subraiyung Israilrokno belai jolijagwi hai hwnwi sa kha, “Ang bórokni chuchusongno dagiui kók khamano swbaiwi o bororok sumsok khlai kha tei ani khorangno khna li ya.

²¹Josua thwi phuru karwi klangmani dopharokno ang bórokni bwskangni tei rwkhlaiwi rohor glak.

²²Bórokni chuchusong hai Subraiyungni lama-o hida him, him ya ang Israilrokno bo chánaiwi nainai.”

²³Hakhe Subraiyung a dopharokno o ha-o tong rw kha, bórokno Josua bo mechen li ya tei rwkhlaiwibo rohor li ya.