Read Kok Borok BUJ THUMNAIROK 20 Bible Online

BUJ THUMNAIROK 20 - Kok Borok bible

BUJ THUMNAIROK 20

¹Hakhe bebak Israilrok bororok Danni simi Birseba jora tei ha Giliadni bororok thansa khe Subraiyungni thani Mijpa-o kuthum lai kha,

²Israil bosongni bebak bokhorokrok Kaitorni bororok kuthum laima-o phai bai kha, aro bebagwi khorok 400,000 yakung bai himnai sengkrakrok wng kha.

³Benjaminsarok bebak Israilni bororok Mijpa-o kuthum lai kha hwnwi khna kha. Israilrok hai hwnwi sẃng kha, “Chwngno sa di bahai khe abo hai samung hamya khlaijak kha?”

⁴Bwrwi thwijaknai Lebi hai hwnwi sa kha, “Ang bai ani bwrwi Benjaminrokni amchoi Gibea-o horo tongnani tháng lai kha.

⁵Gibeani bororok horo phaiwi nok kitingwi kasu lai phai kha, bórok ano butharna naiwi ani bwrwino tlangwi phan khe thu lai kha tong lai kha hakhe bo thwi kha,

⁶hakhe ani bwrwino tlangwi bono helebwi bebak Israil tong baima-o rohor kha, o bororok chini bisingo belai samung hamya khlai kha.

⁷Hakhe tabuk oro tong bainai Israil bororok, tamo khlaima cha sa bai di.”

⁸Bebak bororok bachaui hai hwnwi sa lai kha, “Chini bisingo khoroksa phano nogo kiphil lai glak.

⁹Hakhe chwng abo hai Gibeano khlainai, patkar rwi naiwi choprok lainai.

¹⁰Chwng bebak Israil bosongrokni bisingni khorok sara-o khorok 1,000 tei khorok 1,000-o khorok 10,000 bororok sengkrakrokno chámung ma chá rwnai tei kubunrok khe thángwi Gibeano omo hai samung hamya khlaimani bagwi sátoknai.”

¹¹Hakhe bebak Israilrok kamiyungno choprok lainani thansa khe kuthum lai kha.

¹²Israilni bosongrok Benjamin bosongrokni thani tẃitun rohorwi “Abo tamo norok samung hamya khlai kha?” hwnwi sa hor kha.

¹³Aboni bagwi a borok cha yarokno chini thani yaphar di, hakhe chwng bórokno butharwi Israilni abo hai samung hamyano nornai. Tamo khe Benjamin bosongni bororok tei kubun Israilrok samani kókno khna li ya.

¹⁴Benjaminsarok Israilrok bai choba nang laina bagwi kamiyungni Gibea-o nongkhorwi phai lai kha.

¹⁵Benjaminsarok khorok 26,000 kamiyung sengkrakrokno tiyar khlai kha tei bo Gibeani khorok 700 saiwi najak bororokbo tongo.

¹⁶Abórokni bisingo saiwi najak khorok 700 sengkrakrok wng kha yaksi yak mannairok, bórok khorok thwgwi koró ya khe bwkhnai-o holong bai badukhung kogwi mano.

¹⁷Tei bebak Israilrok khorok 400,000 phrwngjak sengkrakrokno thum lai kha.

¹⁸Israil bororok bachaui Bethelo thángwi Kaitorno hai hwnwi sẃng lai kha, “Sabo Benjaminsarok bai choba nang lainani swkang thángnai?” Subraiyung hai hwnwi sa kha, “Judani bosong swkang ma thángnai.”

¹⁹Hakhe Israil bororok phung aidrobo bachaui Gibea-o batham kha lai kha.

²⁰Hakhe Israilrok Benjamin bai nang laina nongkhorwi tháng lai kha tei Israilrok Gibea bwkhak naharwi bacha lai kha.

²¹Benjaminsarok kamiyungni nongkhorwi phaiwi sal hap yasni swkang khorok 22,000 Israilni sengkrakrokno buthar kha.

²²Israil bororok tei uáisa phan tisa laiwi swkango sengkrakrok bacha lai phi kha.

²³Israilrok Subraiyungni bwskango thángwi sanja wng ya sak kap lai kha, bórok bono hai hwnwi sẃng kha, “Chwng takhuk Benjaminsarok bai tei uáisa choba nang lai phinai da?” Subraiyung hai hwnwi sa kha, “I’n, nang lai phi di.”

²⁴Israil bororok tei uáisa Benjaminsarok bai nang lainani phai lai kha.

²⁵Phiya ba Benjaminrok Gibeani thángwi salnwi nongkhorwi tháng laiwi Israilni khorok 18,000 phrwngjak sengkrakrokno buthar lai kha

²⁶Hakhe Israil bororok Bethelo thángwi kap lai kha, bórok Subraiyungni bwskango sanja jora chá ya nung ya khe achuk laiwi tong lai kha, Subraiyungni thani khakchangma sókmung sógwi yapharmung yaphar lai kha.

²⁷Israil bororok Subraiyungno sẃng lai kha, tamni hwn ba a jora-o Kaitorni swmai bokhok aro tongo.

²⁸Tei Phinehas Eliasarni bwsla, Aronni busuk aphuru-o barja tongo. “Chwng takhuk Benjaminsa bai choba nang lainani tháng phinai da?” hwnwi sẃng khe, Subraiyung hai hwnwi sa kha, “Khwna tháng di, ang bórokno norokni yago yapharnai.”

²⁹Hakhe Israilrok baksa sengkrakrokno Gibea-o kitingwi huijak rwui tong rw kha.

³⁰Israil bororok saltham o Benjaminsarok bai nang laina thángwi, swkango khlaimani hai khe Gibea bwkhak naharwi sengkrakrokno tong rw kha.

³¹Benjaminrok nang lainani kamiyungni nongkhor thángwi kamiyung bai hakchalo tubujak kha, swkang phuruni hai khe bórok Israilni khorok thamchi borokno Bethel bai Gibea-o thángmani haphar kami-o buthar kha.

³²Hakhe Benjaminsarok hai hwnwi sa kha, “Swkang phuruni hai chwng bórokno mechen kha.” Tamo khe Israilrok hai hwnwi sa lai kha, “Pha di chwng khárwi bórokno kamiyungni tlangwi lama kotoro tlang lai anw.”

³³Bebak Israilrok bórok tongmani kisa kutulwi, Bal-tamaro phaiwi Gibeani saka-o dakti khe hap lai kha.

³⁴Israilni saiwi najak khorok 10,000 bororok Gibeano choprogwi choba jai kheno nang lai kha. Benjaminsarok sokomorjakna naimani saui man lai ya man ya.

³⁵Subraiyung Benjaminrokno Israilrokni bwskango mechen kha, Israilrok a salo khorok 25,100 Benjaminrokni sengkrakrokno buthar lai kha.

³⁶Benjaminsarok bórok mechenjak súk kha hwnwi saui man kha. Israil Benjaminrokno lama khlaiwi rw kha, tamo khe bórok Gibea bwkhago huijak rwui tonmani bororokno bwkha beraui poito chá súgo.

³⁷Huijak tong bainai bororok achomsa bachaui Gibea-o dakti khe habwi kamiyungo tong bainai bebakno buthar bai kha.

³⁸Israil bororok bai huijagwi tong bainairokni bisingo kaisa mari chong lai kha, bórok hoku kwbángma kamiyungni kasama nuk khe,

³⁹Israilrok choba-o nongkhorma kiphil bai kha. Tamo khe Benjaminrok nang laiwi khorok thamchi borokno buthar kha tei bórok, “Swkangni hai bórok chensuknai,” hwnwi uansuk kha.

⁴⁰Bórokni mari kamiyungni hoku bodol kasa khe, Benjaminsarok uphilwi nahar lai ba, bebak kamiyung hoku bai kupulung nuk lai kha.

⁴¹Hakhe Israilrok uphil khe, Benjaminsarok belai kirijak bai kha, bórok sokomorjaknai kha hwnwi saui man kha.

⁴²Bórok Israilrokni bwskangni uphilwi hasinglwng phaisingo khár lai kha, phiya ba bórok sói sengkrakrok bai romjak bai kha, kamiyungni nongkhorwi phaiwi sengkrakrok bórokno aro buthar bai kha.

⁴³Bórok Benjaminsarokno gerepsaui bórokno Gibeani salka jora riphrigwi buthar bai kha.

⁴⁴Benjaminni kaham kuk khorok 18,000 sengkrakrok butharjak bai kha.

⁴⁵Baksa khe uphilwi hasing panthorni Rimonni holong besero khár bai kha. Bórok khorok 5,000 lama-o butharjak bai kha, bórok teibo Gidom jora riphrigwi khorok 2,000 bororokno buthar kha.

⁴⁶A salo Benjaminni khorok 25,000 phan gwnang sengkrakrok butharjak bai kha.

⁴⁷phiya ba khorok 600 borok khe hasing panthorni Rimon holong besero khárwi yók bai kha, bórok aro nokha tal brwi ma tong bai kha.

⁴⁸Israilrok uphilwi Benjaminsarokno chwla, bwrwi, mal-matarok bebak tong kwrwi butharwi kamiyung nukmarokno bebak hór bai sógwi pái lai kha.