Read Kok Borok BUJ THUMNAIROK 21 Bible Online

BUJ THUMNAIROK 21 - Kok Borok bible

BUJ THUMNAIROK 21

¹Israilrok Mijpa-o kuthum laiwi hai hwnwi swmai tang lai kha, “Khoroksa phano chini bisingni sajwksongno Benjamin bosong bai káiwi man glak.”

²Tamo khe bororok Bethelo phaiwi sanja jora Subraiyungni bwskango achugwi jai kheno hai hwnwi chirigwi kap lai kha;

³“O Subraiyung, omo hai bahai wng kha? Israilo kaisa bosong bahai kwmana wng kha?”

⁴Teini phung aidrobo bororok dakti khe bachaui aro kaisa háyá tang laiwi, sógwi khakchangma yapharmung yaphar lai kha.

⁵Bórok hai hwnwi sẃng kha, “Subraiyungni bwskango kuthum laima-o phai ya bosong da tong?” Mijpa-o Subraiyungni bwskango phai yano buthar lainai hwnwi bórok swmai tang lai kha.

⁶Israil bororok bórokni takhuk Benjaminno khairogwi hai hwnwi sa lai kha, “Tini Israil bosong kaisano kwma kha.

⁷Benjaminni yógwi tong rwknai takhukni bagwi chwng buro bwrwi mannai, chwngbo Subraiyungni bwskango chini sajwkrokno bórok bai kái lai glak hwnwi swmai le tang lai kha.”

⁸Bórok hai hwnwi sa kha, “Israil bosongo kaisa swk Mijpa-o Subraiyungni bwskango phai ya da tong?” Bórok Jabes Giliadni khoroksabo phai ya nuk kha.

⁹Bórok lekhaui nai lai phuru khe Jabes Giliadni kebo phano aro kwrwi kha.

¹⁰Hakhe lukurok khorok 12,000 kiri ya kuk bororokno hai hwnwi saui rohor lai kha, “Tháng di, Jabes Giliadni bebak borok bwrwi chwrai bebakno buthar bai di.

¹¹Norok sikla ya bwrwi chwla jotono buthar bai di.”

¹²Bórok Jabes khorok 400 bwrwi sikla nuk kha, bórokno Kanan ha-o Siloni bathamo tubu lai kha.

¹³Hakhe lukurok Rimonni holong besero tong bainai Benjaminsarokno choba mwthakma kókno sa hor kha.

¹⁴Benjaminrok kiphilwi phai khe, buthar ya khe Jabes Giliadni bwrwi tubujaknairokno bórokni thani yaphar kha, phiya ba aswk bai bórok thwk lai li ya.

¹⁵Lukurok Benjaminrokni bagwi belai khá dukhu wng bai kha, tamni hwn ba Subraiyung Israilni bosongni bisingo kwtha laima kwrwi khlai kha.

¹⁶Hakhe kuthum laima-o okrarok hai hwnwi sa kha, “Benjaminni bwrwirok butharjak bai kha, chwng tabuk karwi klangjaknairokni bagwi bwrwi buro mannai?”

¹⁷Bórok hai hwnwi sa kha, “Benjaminni yakchu ma se ma tongnai, bosongbo Israilni kwmaui man glak.

¹⁸Hai phano chini sajwksong bai bórokno káiwi man glak.” Tamni hwn ba Israilrok hai hwnwi swmai tang lai kha, “Benjamin bai bwsajwksongno káinai bini thani swraimung klainai.”

¹⁹Hakhe bórok hai hwnwi uansuk lai kha, “Silo-o nokha bisi sani Subraiyungni panda daktino wngnai, Silo wng kha Bethelni salsibai-o, Lebonani salgrabai-o, Bethel bai Sekemo thángma lamani salka-o.”

²⁰Bórok Benjaminsarokno sa kha, “Norok angur bari-o thángwi huijagwi tongwi di,

²¹tei naichomwi tongwi di, Siloni bwrwirok a panda-o mwsanani bagwi phai khe, angur barini nongkhorwi phaiwi, Siloni bwrwirokno phan khe romwi Benjamin ha-o tlang bai di.

²²Bórokni bupharok bai takhukrok chini thani kók silwi sana phai khe, chwng bórokno hai hwnwi sa anw, ‘Bórokno chwngno rw di; tamni hwn ba norokni aroni chwng bórokno choba-o chini hik snamna bagwi tlang ya. Hakhe norok bórokno chwngno yaphar li ya, norok kók rwmano narwk ya wngmani abo norokni cha ya ya.’ ”

²³Benjaminsarok abo haino khlai kha, khorok thwgwino bwrwi saiwi Silo-o mwsana phainairokno tlang lai kha, hakhe bórok tongma amchoi-o kiphil lai kha; kami kotor tang laiwi aro tong lai kha.

²⁴Aphuru Israilrokbo aroni tháng bai kha, borok jotono sakni bosong, núkhung tei sakni ha-o tháng lai kha.

²⁵Aphuru Israilo habugra kwrwi; bebak borok sak sak muchung tẃi máng khlai bai-o.