Read Kok Borok BUJ THUMNAIROK 3 Bible Online

BUJ THUMNAIROK 3 - Kok Borok bible

BUJ THUMNAIROK 3

¹Hakhe tabuk Kanan ha-o uáisa phano choba manjak ya kho Israilrokno chánaina bagwi Subraiyung karwi klangmani dopharok wng kha omorok;

²Israilni bosongrokni bisingo choba phrwngna bagwi, tei se swkango uáisa phano choba-o tháng ya kho bórokno choba phrwngnani bagwi omo hai khalai-o.

³Omorok wng kha a bosongrok: Philistiani khorokba bugrarok, bebak Kanansarok, Sidonrok tei Bal-Harmonni simi hakchal Hamatni haplam jora Lebanon hachugo tong bainai Hibisarok.

⁴Subraiyung Musini tẃi bórokni chuchusongno dagimarokno Israilrok kaham khe kók da khna khna ya nainani bagwi bórok Israilrokno chánainai.

⁵Aboni bagwi Israilrok Kanansarok, Hitisarok, Amorsarok, Peressarok, Hibisarok tei Jebusrokni bisingono tong kha.

⁶Tei bórok bai’-no kái lai-bór lai wng lai kha tei bórokni mwtairoknobo khulum lai kha.

⁷Israil bororok Subraiyung bórokni Kaitorno pok baiwi bini mokolo chajak ya samung máng khlaiwi Bal tei Asera mwtairokno khulum kha.

⁸Hakhe Subraiyung Israilno belai khe jolijak kha tei Mesopotamiani habugra Kusan-risathaimni yago bono yapharwi rw kha; Israilrok bono nokha bisi char jora ma mon bai kha.

⁹Hakhe Israilrok Subraiyungni thani kap lai kha, Subraiyungni tẃi phiyóknaisa khoroksa rohorwi phiyók kha, abo Kalebni buphayung kusu Kenajni bwsla Othniel.

¹⁰Subraiyungni phola bini saka-o phai kha, hakhe bo Israilrokni buj thumnai wng kha. Bo choba-o tháng khe, Subraiyung bini yago Mesopotamiani habugrano yapharwi mechen kha.

¹¹Hakhe o ha-o nokha bisi brwichi jora kwchang kwchang wng kha, aboni ulo Kenajni bwsla Othniel thwi kha.

¹²Israilni bororok haino hai sumsok khlai phiu kha. Aboni bagwi Moabni habugra Eglonno Israilni slái phan gwnang khlai kha.

¹³Ammonsa tei Amaleksarok bai thansa wng laiwi bo thángwi Israilno mechenwi khe, hakhe Jeriko khajurini buphang kamiyungno segwi na lai kha.

¹⁴Hakhe Israilsarok Moabni habugra Eglonno nokha bisi chichar jora ma mon lai kha.

¹⁵Israilrok Subraiyungni thani chirigwi kap lai khe, Subraiyung bórokno tẃithernai Benjamin bosongni Gerani bwsla Ehud, yaksi yak bórokno rohor kha. Israil bororok Ehudni yak tẃi Moabni habugra Eglonni thani hili rohor lai kha.

¹⁶Ehud sakni bagwi babainwi kubuk 50 sentimitar kolok seng snam rwui, abono bini yagra yaphungo, bini rí bisingo khaui na kha.

¹⁷Hakhe bo hilino Moabni bugra Eglonno yaphar kha. Bo wng kha belai kuphung.

¹⁸Ehud hili yaphar bai khe, hili tẃinai bororokno rwui rohor bai kha.

¹⁹Bini sak Gilgal ganani holongni swijago sógwi khe, uphilwi hai hwnwi sa kha, “O bugra, ang nono kók tháisa tepsa khe sana tongo.” Hakhe bo hai hwnwi dagi kha, “Kisa siringcha wng bai di,” hakhe bebak bini bororok phataro tháng bai kha.

²⁰Nok kwchang dodo núkhungo achugwi tongma-o Ehud bini thani thángwi hai hwnwi sa kha, “Kaitorni kók aroni nono tháisa sana tongo,” hakhe habugra achugwi tongma bacha kha.

²¹Ehud bini yaksi yak bai yagra yaphakni sengno naharwi Eglonni bohogo yórwi rw kha.

²²Bebak seng tei romjaknai habwi tháng khe bupham nang bai khe, bo sengno bohokni kariui na li ya, abo uklogo paui kha.

²³Hakhe Ehud bórokno aro chobwi duglam kholobwi tala phangwi aroni tháng kha.

²⁴Bo tháng bai khe, selengrok phaiwi tala phnangjak nuk phai khe habugra bisingo se lenglaui tongna hwnwi uansuk lai kha.

²⁵Bórok naising lai leng súk kha, hai phano bo dugar phiyok li ya, ulo khe bórok surani naui phiyok lai kha, hakhe aro bórokni bugra ha-o kwthwi klaiwi tong kha.

²⁶Bórok aro naisingwi tongsanino Ehud khárwi thángwi, bo holongni swijakno láiwi Seira-o tháng kha.

²⁷Bo Ephraimni hathái kami-o sók phai khe chobani bagwi Israilrokno ringnani totro sup kha, Israilrok aroni nongkhorwi bono bokhorok snamwi tháng lai kha.

²⁸Bo hai hwnwi sa kha, “Ani uklogo phai bai di, Subraiyung norokni yago norokni kena ari Moabrokno yaphar kha.” Hakhe bórok Ehudni uklogo tháng laiwi Moabrokno Jordan bárna rw lai li ya.

²⁹Aphuru bórok khorok chisai phan gwnang sengkrakrok Moabrokno buthar lai kha, khoroksa phano yógwi man li ya.

³⁰Israilrok Moabrokno mechen khe nokha bisi chichar jora ha-o kwchang kwchang wng kha.

³¹Bini ulo khe Anatni bwsla Samgar, bo khorok dokra Philistiasarokno beresni painjon bai butharwi Israilrokno phiyók kha.