Read Kok Borok BUJ THUMNAIROK 4 Bible Online

BUJ THUMNAIROK 4 - Kok Borok bible

BUJ THUMNAIROK 4

¹Ehud thwimani yagulo Israilrok haino hai Subraiyungni mokolo chajak ya abo hai samung hamyano khlai phiu kha.

²Hakhe Subraiyung Hajoro habugra cháui tongnai Kananni habugra Jabinni yago bórokno yapharwi rw kha. Bini sengkrak bokhorok wng kha Haroseto tongnai Sisera.

³Jabinni khung chuku-ra sorni korai malkhung tongo, bo Israilrokno belai sátogwi nokha bisi nwichi jora kusup kha, hakhe Israilrok Subraiyungni thani chirigwi kap lai kha.

⁴A jora-o Debora hwnwi diyarijwk Lapidotni bihik Israilrokni bisingo buj thumnai samung khlai-o.

⁵Bo Ephraim hathái kamini Rama bai Bethel kwcharni khajuri buphang yaphango achugo; Israil bororok aro bini thani thángwi sẃng lai-o.

⁶Bo salsa Naptalini kamiyung Kadeso tongnai Abinoamni bwsla Barakno naharwi hai hwnwi sa kha, “Subraiyung Israilni Kaitor nono hai hwnwi dagi-o,” Naptali bai Jebulun bosongni khorok chisai bororokno thumwi hachuk Taboro tháng di.

⁷Ang, Jabinni sengkrak bokhorok Siserano, bini korai malkhungrokno, tei sengkrakrokno Kison twima-o norok bai nang lainani tubunai tei bono nini yago yapharnai.

⁸Barak a bwrwino hai hwnwi sa kha, “Nwng ang bai tháng khe angbo thángnai, nwng ang bai tháng ya hwn khe angbo tháng glak.”

⁹Bwrwi hai hwnwi sa kha, “Ang nwng bai kubuino thángnai hai phano nini mungsa kaham wng glak, tamni hwn ba Subraiyung Siserano bwrwi khoroksani yago yapharnai.” Hakhe Debora bachaui Barak bai Kadeso tháng kha.

¹⁰Barak Jebulun bai Naptalini bosongrokno Kadeso ring kha, borok khorok chisai bini uklogo tháng kha, Deborabo bo bai tháng kha.

¹¹Aphuru khe Keni tei kubunni Kenisarok bai kak kha, abo wng kha, Musini bwkra Hobabni bosongrok, bórok hakchalma Elonbejananimo batham kha lai kha, abo wng kha Kedesni gana-o.

¹²Sisera Abinoamni bwsla Barak tabuk hachugo tháng kha hwnwi saui man khe

¹³bini khung chuku-ra sorni korai malkhungrok tei bebak bini bororokno Haroset-hagoimni Kison twima-o rohor kha.

¹⁴Debora Barakno hai hwnwi sa kha, “Tháng di, tini’-no Subraiyung Siserano nini yago yaphar kha.” Hakhe Barak bini khorok chisai bororok bai khe Tabor hachukni nongkhorwi tháng kha.

¹⁵Subraiyung Sisera bini korai malkhungrok tei Sengkrakrok bai baksa bwkha udru mudru khlai rw kha, Sisera bini korai malkhungni nongkhorwi yakung bai khárwi tháng kha.

¹⁶Barak korai malkhungrok tei sengkrakrokno Haroset jora riphrigwi Siserani bebak sengkrakrokno buthar kha, khoroksa phano yók li ya.

¹⁷Kenisa Heberni bihik Sisera, Jaelni ríni nogo khárwi tháng kha; tamni hwn khe Hajorni habugra Jabin bai Heberni núkhung kwchang kwchang wng lai kha.

¹⁸Jael Sisera bai malaina thángwi bono hai hwnwi sa kha, “Phai di, bisingo hap phai di, ta kiri di,” hakhe bo bisingo hap khe, tei a bwrwi bono rí bengki kotono huiwi ton kha.

¹⁹Bo bwrwino hai hwnwi sa kha, “Ano kisa twi khan di, ang belai twi kang kha,” hakhe bwrwi mui bukur solani dut khanwi huiwi ton phi kha.

²⁰Bo bwrwino hai hwnwi sa kha, “Duglamo bachaui tong di, khoroksa swk phaiwi oro borok khoroksa da tong hwnwi sẃng phai khe, kwrwi hwnwi sa di.”

²¹Sisera belai khe lengjakma bagwi daktino muktrwi tháng kha, hakhe Heberni bihik Jael mukur tei rínok swngma khili kotor kaisa naui tepsa khe bini thani thángwi khunjuthabo khili buui ha-o khur rwui káiwi buthar kha.

²²Aphuru Barak Siserano naitugwi phai khe Jael bo bai malaiwi bono hai hwnwi sa kha, “Phai di, ang nwng naitukmani a borokno ang nono phunuk anw.” Hakhe bo rínok bisingo habwi thángwi nai ba Siserani bokhorogo khili bai yórjak kwthwi khe khlaijak nugwi kha.

²³A salo Subraiyung Kananni habugra Jabinno Israilrokni yago mechen kha.

²⁴Israil bororok Kananni habugra Jabinno sokomor súk ya sak tekto rw rwrwk wng kha.