Read Kok Borok BUJ THUMNAIROK 5 Bible Online

BUJ THUMNAIROK 5 - Kok Borok bible

BUJ THUMNAIROK 5

¹Hakhe a salo Debora bai Abinoamni bwsla Barak omo hai khe rwchap lai kha;

²Subraiyungno lob di, Israilni tẃiphangrok tẃither bai kha; bororok muchungwino sakno yaphar bai kha.

³Khna di, o habugrarok! khunju kaichom di, o tẃiphangrok! Ang, Israilni Kaitorni thani rwchapnai, ang Subraiyungni thani tammung tamnai.

⁴Subraiyung nwng Seir hachukni tháng khe, Idom amchoini nongkhorwi tháng khe ha ma kwlwi-o tei nokhani uatwi ua-o, kubuino chumuini uatwi klai-o.

⁵Sinaini Subraiyungni bwskango, Subraiyung Israilni Kaitorni bwskango hachukrok ma kwlwi bai-o.

⁶Anatni bwsla Samgarni jora-o, Jaelni jora-o, bepar thwngnairok thak bai kha, tei berainairok kubun lama tẃi him bai kha.

⁷Israilni kamirok kwma súk bai kha, ang, Debora, Israilni buma hai bacha ya sak abórok kwma súk bai kha.

⁸Israilrok mwtai kwtalrokno khulum khe ha gwnangwi choba nangwi phai-o, borok brwichisai Israilrokni thani seng yago tẃima da nukjak?

⁹Ani bwkha Israilni sengkrak bokhorok bai tei muchungwi sakno yapharnai bororok bai pal tongo. Subraiyungno lob di.

¹⁰Koraichirka kuphuro kasanairok, achukthai kahamo[3] achuknairok lama botok himnairok norok abono sa di.

¹¹Twi lu thani tamnairokni khorang bai, bórok Subraiyung kwplai wngmano tei Israilrok kwplai wngmano sa lai-o. Hakhe Subraiyungni bororok kamiyungni nongkhorwi himgurung lai-o.

¹²Bacha di, bacha di, Debora, bacha di, bacha di, rwchap si di, bacha di, Abinoamni bwsla Barak nini khajakrokno tlang si di.

¹³Hakhe sói bororok tẃiphangni thani nongkhorwi phai lai-o; Subraiyungni bororok choba nang laina tiyar wng laiwi phai lai-o.

¹⁴Bórok Ephraimni harungo[4] phai lai-o, Benjamin bai bini bororokni uklogo sengkrak bokhorokrok Makirni phai lai-o,[5] tẃiphangrok Jebulunni phai lai-o.

¹⁵Isakarni tẃiphangrok Debora bai phai lai-o, Isakar bai Barakbo phai lai-o, bini uklogo harung jora bórok tháng lai-o, Rubenni bosongni bisingo bórok tamo khlainai chongwi man lai li ya.

¹⁶Tamni bórok merarokni uklogo tong kha? Merarokno ringhormani khorang khnana bagwi da? Rubenni bosongrokni bisingo bórok tamo khlainai chongwi se man lai li ya.

¹⁷Gadni bosongrok khe tong kha Jordanni salka bwkhago. Dan khe tong kha bini merarok bai; Aser khe tong kha achugwi twijlang rukungo, bórok arono tong phlai kha.

¹⁸Jebulun bai Naptalini bororok khe choba-o nongkhor lai kha.

¹⁹Habugrarok phaiwi choba nang lai kha. Tanakni Megido twisa rukungo, Kananni habugrarokbo choba nang lai kha, phiya ba bórok man li ya mungsa rukphairok tlangwi.

²⁰Athukirirok nokhani nang lai horo, bórok yang yang himgurung laiwi Sisera bai choba nang lai-o.

²¹Kisonni twi kotor bai bórokno kochok rwui tlang kha, kochokjak twi tur gwnang Kison twima bai. Ani bwkha phan sochaui nwng swkangwi tháng di!

²²Hakhe korairok khabrumwi phai lai-o bórokni yakung bai ha-o kádulwi.

²³“Merosno swrai di,” hwnwi Subraiyungni suari sa-o, aro tongnairokno swrai di, bórok Subraiyungno chubanani, phan gwnang bai nang laina phai li ya.

²⁴Bwrwirokni bisingo hamchajak kuk khe Jael Kenisa Heberni bihik, ríni nogo tongnaino hamchajak kuk bwrwi.

²⁵Sisera bono twi sanma se, bo dut se khan si-o, naithok dangai-o bini banta doi tubu kha.

²⁶Babaisa yago khili kotorma tei babaisa khe sorni tokphung naui Siserano togwi bini bokhorokno sukhrup kha, bo bini bokhorogo sorni tokphung surwi rw kha.

²⁷Bo kongwi ma klai kha, bini yakung yaphango ma klai kha, hakhe bo arono thwi kha.

²⁸“Siserani buma tailam tẃi naikhlai kha, tailamni rí keseng swngjak tẃi naihorwi ‘Tamni bini korai malkhung ba aswk phaina ler kha, tamni bini korairok ba aswk ler lang?’ hwnwi sa kha.

²⁹Bini Elem gwnang kuk bwrwi sa kha, ao, bo sak sakno hai hwnwi saui tong kha:

³⁰‘Bórok mechenwi manwirok segwi manmano se bórokni bisingo banta khe tong lai khna; chwla khoroksani banta bwrwi khoroksa khoroknwi khe tei Siserani banta mereng-marang kanmung chummungrok, kotok kitingjak khum bwthái kholjak rí-chumrok omorokno ba bórok segwi man ya da wng khna ba?’

³¹“O Subraiyung, nini kena arirok abo hai khe ma gaija bai thung! Tamo khe nono hamjaknairok khe sal kasama hai khe phan gwnang khe kasa thung.” Hakhe ha nokha bisi brwichi jora lengla kha.