Read Kok Borok BUJ THUMNAIROK 6 Bible Online

BUJ THUMNAIROK 6 - Kok Borok bible

BUJ THUMNAIROK 6

¹Israilrok haino hai Subraiyungni mokol bwskango sumsok khlai phi khua. Tei Subraiyung bórokno Midianrokni yago nokha bisi sni jora yaphar kha.

²Midiansarok Israilrokni slái phan gwnang kuk, hakhe Israilrok hachugo hagurung khurwi aro huijagwi ma tong lai kha.

³Israilrok maichwlwi sar khe Midiansarok Amaleksarok bai tei hasing panthorni bororok bai phaiwi bórokno tekto rw phai-o.

⁴Bórok aro batham khlaiwi Gaja jora tei gana ginirogo bebak bórokni mairokno hamya khlaiwi tei bórok merarok, mal-matarok, koraichirkarok, Israilrokni chánani mungsa karwi klang lai li ya.

⁵Bórok kúk kwbángma hai khe bórokni mal-matarok, rínokrok, bai khe phai lai-o, bórok bai bórokni mangingangrok suda lekha baiwi man ya, bórok phai khe hano dera rw phai-o.

⁶Midianrok bai Israilrok belai swklwkjak kha, hakhe Israilrok Subraiyungni thani chubachu sanwi kap lai kha.

⁷Midiansarokni bagwi Israilrok Subraiyungni thani kap lai kha.

⁸Subraiyung Israilrokni thani khoroksa diyari rohorwi hai hwnwi sa kha, “Omo Subraiyung Israilni Kaitor sa-o, ang norokno ha Ijibo seleng tongmani tubu-ui phai kha.”

⁹Ang norokno Ijipni yakni phiyók kha tei o ha-o norok bai choba nang lainairokni yaknibo phiyók kha, norokni bwskango bórokno rwkhlaiwi norokno bórokni hano rw kha.

¹⁰Ang norokno hai hwnwi sa kha, thani rwchapnai thani rwchapnai ‘Ang se Subraiyung, norokni Kaitor; norok tabuk tongma hani Amorsarokni mwtairokno ta khulum di.’ Hai phano norok ani kókno khna li ya.”

¹¹Hakhe Subraiyungni suari Ophra kami-o Abiejer bosongni borok Joasni uk buphang yaphango phaiwi achugwi tong kha. Bini bwsla Gideon Midiansarok nuk ya tẃi khe (thok pherema gana-o) gom nagwi tongo.

¹²Subraiyungni suari bini thani nukjagwi hai hwnwi sa kha, “Subraiyung nwng bai tongo, nwng phan gwnang tei kirima kwrwi borok!”

¹³Gideon bono hai hwnwi sa kha, “Ang nono sẃng ja-o, Subraiyung chwng bai tong khe tamni omo hairok chini saka-o wngna klai?” “Subraiyung chini chuchusongno kwmamsingcha khe ha Ijipni tẃitherwi tubumani kókrok chwngno sa langmani abórok biyang tháng bai kha? Tabuk Subraiyung chwngno yakarwi Midianrokni yago yaphar kha.”

¹⁴Hakhe Subraiyung uphilwi bono hai hwnwi sa kha, “Nini bebak phankrak phan bai khe thángwi Israilrokno Midianni yakni phiyógwi di, ang nono rohoro.”

¹⁵Gideon hai hwnwi sa phi khua, “Ang bahai khe Israilno phiyógwi mannai? Manase bosongni bisingo ani buthupno jotoni slái kebel kuk tei ani núkhúngo ang’-no samungo chúk ya kuk borok.”

¹⁶Subraiyung bono hai hwnwi sa kha, “Ang nwng bai tongnai, hakhe nwng khoroksano sukhrupma hai khe Midiansarokno sukhrubwi mannai.”

¹⁷Gideon hai hwnwi sa phi kha, “Nwng ano hamjak khe omo le Subraiyung kubuino ang bai kók sa-o hwnmani marino phunuk di.

¹⁸Ang nini bagwi chámung yapharmung tubu ya sak oroni ta kutul di.” Bo hai hwnwi sa kha, “Nwng kiphilwi phai ya sak ang arono tongnai.”

¹⁹Hakhe Gideon bini nogo thángwi punsa ratharwi sóng kha tei auan snam kha. Bo kaisa ura-o muihan rwui, aboni bwtwino tei manwi kaisa-o tonwi abórokno uk buphang yaphango Subraiyung tongma-o tubu kha.

²⁰Hakhe Subraiyung bono hai hwnwi sa kha, “O muihan bai auanno o holong saka-o bera di tei bwtwino aboni saka-o lu di.” Hakhe Gideon abo haino khlai kha.

²¹Subraiyungni Suari bini yago tongmani lathano phologwi aboni buchuk bai muihan bai auanno phnang kha; aro holongni hórjlai nongkhorwi muihan bai auanno cháui phai kha. Hakhe Subraiyungni Suari kwmaui tháng kha.

²²Aswk kheno Gideon omo Subraiyungni suari hwnwi saui man kha, hakhe bo hai hwnwi sa kha, “O Subraiyung Kaitor, ang mokol baithang’-no Subraiyungni suarino nuk kha.”

²³Subraiyung bono hai hwnwi sa kha, “Khakchang di, ta kiri di, nwng thwi glak.”

²⁴Gideon aro Subraiyungni bagwi khungsa háyá tangwi, “Subraiyung wng kha khakchang”[6] hwnwi mung phar kha (abo tabuk bo Ophra-o tong kho, abo Abiejer bosongni klai-o.)

²⁵Aboni horo Subraiyung Gideonno hai hwnwi sa kha, “Nwphani musuk masa tei nokha bisi kaisnini musuk naui, nwphani Bal mwtaini háyáno swbaiwi tei aboni gana-o tongnai Aser mwtaijwkno tan bai di,

²⁶aboni saka-o Subraiyung nini Kaitorni bagwi háyá khungsa tang di, hakhe tei masa musuk naui abono nwng tanmani Aser mwtaijwkni mangtang bai sógwi yapharmung yaphar di.”

²⁷Hakhe Gideon bini khorokchi selengrokno tlangwi Subraiyung sama haino khlai kha, tamo khe bo salo núkhungni tei kami kotorni bororokno kirimani bai horo se khlai si-o.

²⁸Kami kotorni bororok phung aisirisiri bachaui Bal mwtaini háyá nuk kha tei aboni gana-o Aserani háyá tansujak tei háyá takjak saka-o tei masa musuk sógwi yapharjak nuk kha.

²⁹Bórok khoroksa bai tei khoroksa hai hwnwi sa lai kha, “Omo hai sabo khlai kha?” Bórok jai kheno cherwi na lai khe Joasni bwsla Gideon se khlai-o hwnwi saui man lai kha.

³⁰Hakhe bórok Joasno hai hwnwi sa kha, “Nini nwslano butharnani oro kariui tubu di! Tamni hwn ba bo Bal mwtaini háyáno swbaiwi, aboni gana-o Aserani mangtangno tanwi pái kha.”

³¹Tamo khe Joas bini bwskango phainairokno hai hwnwi sa kha, “Norok Balni wngwi da bacha lai? Norok bono da kati rwna nai lai? Bini bagwi bachanai borok khwna phungo’-no ma thwinai. Bal kubui’-no mwtai wng khe bini sakno kati rw thung, tamni hwn ba bini háyá swbaijak kha ba.”

³²Aphuruni simi khe Gideon Jerubal hwnwi ringjak kha, tamni hwn ba Joas hai hwnwi sa kha, “Bal bini sakno kati rw thung, tamni hwn ba bini háyá swbaijak kha.”

³³Hakhe bebak Midiansarok, Amaleksarok, hasing panthoro tongnairok kuthum laiwi, Jordan twima bárwi Jejril harungo batham khlai kha.

³⁴Tamo khe Subraiyungni phola Gideonni saka-o phai khe, bo totro kotorma khorang khlaiwi Abiejersarokno ringhor kha.

³⁵Bo bebak Manase-o tẃitun rohorwi bini pal wngnani sahorjak kha. Tei bo Aser, Jebulun, Naptali-o tẃitun rohor khe bórok kuthumui malaina tháng lai kha.

³⁶Hakhe Gideon Kaitorno hai hwnwi sa kha, “Nwng sama hai Israilno ani yak bai phiyóknai hwn khe,

³⁷nai di, chwng gom nakthani ang mera buikhumu kisa ha-o beraui ton kha, khwna aiwi ha-o kwrwi khe mera buikhumu-o simi pantwi nuk khe nwng Israilrokno ani yak bai phiyók bainai hwnwi saui mannai.”

³⁸Abo haino wng kha. Gideon teini phungo bachaui khulno sebwi nai khe dangai-o twi kwbángma man kha.

³⁹Hakhe Gideon Kaitorno hai hwnwi sa kha, “Ano ta joli di, ang tei tháisa kók sa anw.” Ang tei uáisa mera buikhumu bai amjogwi nai anw. Tabuk khe mera buikhumu-o wng yaui ha-o pantwi wng thung.

⁴⁰Kaitor a horo haino khlai kha teini phungo mera buikhumu khe kwran tei ha-o khe pantwi wng kha.