Read Kok Borok BUJ THUMNAIROK 7 Bible Online

BUJ THUMNAIROK 7 - Kok Borok bible

BUJ THUMNAIROK 7

¹Salsa Jerubal (abo khe Gideon) bai bini bebak bororok phung aidrobo bachaui Harod twisa rukungo batham khlai kha, Midiansarokni batham khe bórokni salsibai bwkhak More hatháini harungo.

²Subraiyung Gideonno hai hwnwi sa kha, “Nini logi belai borok báng kha, hakhe Midiansarokno bórokni yago yaphar khe Israilsarok ‘Chini yak bai se chwng mecheno hwnwi chongwi ano sak nang ya wngnai.’

³Bórokno sa di, ‘Norokni bisingo kirinairok, khithoprok nogo kiphilwi tháng bai di.’ ” Gideon bórokno amjogwi nai kha, khorok nwichinwisai kiphil bai khe tei khorok chisai se tong rwk si-o.

⁴Subraiyung Gideonno hai hwnwi sa kha, “Norok belaino borok báng kho, bórokno twi-o tlang di, ang aro nini bagwi bórokno chánainai, ang samani a borok nwng bai ma thángnai hwn khe bo ma thángnai, nwng bai ma tháng glak hwn khe bo ma tháng glak.”

⁵Hakhe bo bororokno twi-o tubu kha, Subraiyung Gideonno hai hwnwi sa kha, “Sẃi hai khe sakni bwslai bai twi swlaknai bai tei yáskú sungwi nungnaino nwng khak di.”

⁶Hakhe sakni yapha bai twi khókchaui nungnai borok khorok 300 wng kha tei bebak nungnani bagwi yáskú sung kha.

⁷Subraiyung Gideonno hai hwnwi sa kha, “Twi khókchaui nungnai borok khorok thamrarok bai ang nono phiyóknai tei Midiansarokno nini yago yapharnai tei bebak bororok sak sakni nogo tháng bai thung.”

⁸Hakhe Gideon bororokni yakni golarok bai totrorok na bai kha tei borok khorok thamrarokno karwi bebak Israilrokno sak sakni nogo rohor kha. Midiansarokni batham khe bórokni slái hache kuk harungo.

⁹Aboni horo Subraiyung Gideonno hai hwnwi sa kha, “Bacha di, thángwi bathamno swprak di, ang abono nini yago yaphar kha.

¹⁰Nwng nongkhorwi thángna kiri khe, nini seleng Pura bai bathamo tháng di,

¹¹hakhe bórok tamo sa lai khna anw tei aboni ulo nwng bathamno swpraknani phan man anw.” Hakhe Gideon bini seleng Pura bai arirokni bathamo tháng lai kha.

¹²Midiansarok, Amaleksarok tei bebak salkani bororok harungo kúkrok hai khe pírjak bai kha, bórokni mangingangrok twijlang rukungni hasingsa hai kwbángma.

¹³Gideon aro sók phai khe, borok khoroksa bini kichingno imangni kókno saui tongma khna kha; bo hai hwnwi sa kha, “Nai di, ang imango kaisa barlini auan chini bathamo goirogwi ríni nogo klaiwi, abono khiklaiwi rwma nuk kha. Abo bai ríni nok hamya wngwi ha-o burungsa wng kha.”

¹⁴Bikiching hai hwnwi sa kha, “Omo Joasni bwsla Gideon, Israilni borokni sengno karwi tei mungsa buya; bini yago Kaitor Midiansarokno tei bebak sengkrakrokno yaphar kha.”

¹⁵Gideon imangni kókno tei aboni gujokno sa lai tongma khna khe, bo Kaitorno baju kha. Hakhe bo Israilni bathamo kiphilwi thángwi hai hwnwi saui kha, “Bacha di; tamni hwn ba Subraiyung norokni yago Midianni sengkrarokno yaphar kha.”

¹⁶Bo borok khorok thamrarokno bodol kaitham khe swkagwi bórok bebakni yago totrorok bai gola bukcha bisingo homchangrok ton kha.

¹⁷Bo bórokno hai hwnwi sa kha, “Ano nai di, batham gana-o sók phai khe ang khlaima haino khlai bai di.

¹⁸Chwng totro sup khe, norokbo bebak batham bwkhago totro sup lai di tei hai hwnwi chirik di, ‘Subraiyungni bagwi tei Gideonni bagwi.’ ”

¹⁹Hakhe Gideon bai tei khorok sara borok hor diborni mwrwknai slái drobo batham gana-o sók phai khe totro subwi bórokni yakni golano sukhrup kha.

²⁰Tei kubun bodol kainwirokbo abo haino khlai kha, totro subwi gola sukhrubwi, yaksi bwkhago homchang naui, yagra yago totro naui hai hwnwi chirik lai kha, “Subraiyungni bagwi tei Gideonni bagwi seng.”

²¹Bebakno batham kitingwi tong lai kha tei bebak sengkrak arirok chirik laiwi khár lai kha.

²²Bórok kong thamra totro sup khe Subraiyung arirokno sak bai sak nang lai rw kha. Bórok Jerera bwkhakni Bet-Sitta tei Tabat ganani Abel-mehola kami kotor jora khár lai kha.

²³Hakhe Israilni bororok Naptali, Aser tei Manaseni ringjak bai kha, phiya bórok Midiansarokno riphrik lai kha.

²⁴Gideon bebak hathái kami Ephraimo sanani bagwi tẃitun hai hwnwi rohor kha; “Phai di, Midiansarok bai choba nang lainani, Midiansarok Jordan twima bárwi man ya tẃi khe abono segwi na di.” Hakhe Ephraimni bororok thansa khe ringjak bai kha, bórok Jordan twima bai Betbara jora twisano segwi na lai kha.

²⁵Bórok Midianni ojama khoroknwi Oreb bai Jibno rom lai kha. Bórok Oreb holongo Orebno buthar lai kha tei Jibno khe chuak sepmani Jibo buthar kha. Bórok teibo Midiansarokno riphrik baiwi Oreb bai Jibni bokhorokno Gideonni thani tubu kha, abo tabuk Jordanni salka phaising klai-o.