Read Kok Borok BUJ THUMNAIROK 8 Bible Online

BUJ THUMNAIROK 8 - Kok Borok bible

BUJ THUMNAIROK 8

¹Hakhe Ephraimni borok Gideonno hai hwnwi sa kha, “Nwng tamni Midiansarok bai choba nang laina phuru chwngno ringhor li ya?” Bórok jai kheno bono hwn lai kha.

²Hakhe bo bórokno hai hwnwi sa kha, “Ang norokni slái bwswk tamo khlai man kha ba? Ephraimni angur thummani abo Abiejer angur bwtwi khlaina bagwi thummani aboni slái ham kuk ya diba?

³Kaitor norokni yago Midianni ojamarok Oreb bai Jibno yaphar kha. Ang norokni slái tamo khlai man kha ba?” Bo abo hai sa khe bórokni jolima ham bai kha.

⁴Gideon bai bini pal khorok thamra bororok Jordan twima-o phaiwi bár lai kha; bórok belai khe lengjak kha hai phano kena arirokno riphrik laiwi’-no tongo.

⁵Bo Sukotni bororokno hai hwnwi sa kha, “Ani bororokno kisa chámung rw bai ja gra di, bórok belai lengjak bai kha tei ang Midianni habugrarok Jeba bai Jalmunano riphrigo.”

⁶Phiya Sukotni tẃiphangrok hai hwnwi sa kha, “Tamni chwng nini bororokno chámung rwna klai, nwng Jeba bai Jalmunano nini yago da naui man kha ba?”

⁷Gideon hai hwnwi sa kha, “Do hakhe, Subraiyung Jeba bai Jalmunano ani yago yaphar phuru khe, ang hasing panthorni busu bai swpragwi bahan swkaknai.”

⁸Aroni khe Gideon Penuelo thángwi abo hai kheno koiwi kha, Penuelni bororokbo haino Sukotni bororok sama hai’-no sa lai kha.

⁹Bo Penuelni bororokno hai hwnwi sa kha, “Ang kaham tongwi kiphilwi phaiwi man khe, norokni nok kuchukno swbainai.”

¹⁰Jeba bai Jalmuna khe bórokni sengkrakrok bai pal Karkoro tongo, salka phaisingni bororok khorok 15,000 se karwi klangjak si-o, khorok 1,20,000 sengkrakrok butharjak bai kha.

¹¹Gideon hasing panthorni lama tẃi Noba tei Jogbehani salka bwkhak thángwi achomsa khe sengkrakrokno choprogwi kha.

¹²Jeba bai Jalmuna khár khe bórokno riphrigwi romwi bebak sengkrakrokno urumuru khlai kha.

¹³Hakhe Joasni bwsla Gideon Heresni lama tẃi chobani kiphil kha.

¹⁴Bo Sukotni sikla khoroksano romwi kók sẃng kha. A borok Gideonni bagwi Sukotni khorok snichi sni tẃiphangrokni bumung swiwi rw kha.

¹⁵Hakhe Gideon Sukotni bororokni thani thángwi hai hwnwi sa kha, “Iko nai di Jeba bai Jalmuna, oborokni bagwino norok ano thesra kariui, ‘Chwng tamni nini lengjak sengkrakrokno chámung rwna klai? Jeba bai Jalmuna nini yago da klai kha ba?’ hwnwi hwn laimani.”

¹⁶Hakhe bo hasing panthorni busu bai busu buphang nahorwi Sukotni tẃiphangrokno sátok kha.

¹⁷Bo Penuelni nok kuchukno swbaiwi, kamiyungni bororokno buthar bai kha.

¹⁸Hakhe Gideon Jeba bai Jalmunano hai hwnwi sẃng kha, “Norok Taboro butharmani bororok buro tong bai?” Bórok hai hwnwi sa kha, “Bórok norok bai sol lai-o, borok joto’-no bugrani bwsla hai se.”

¹⁹Gideon hai hwnwi sa kha, “Bórok ani takhukrok, ani amani bwsarok máng, norok bórokno kwthang narwk khe, angbo norokno kwthang narwknai.”

²⁰Hakhe bo bini bwsla okra Jetherno hai hwnwi sa kha, “Bachaui bórokno buthar di.” Phiya ba siklasa bini seng rom li ya, tamni hwn ba bo belai kirijak kha, tamni hwn khe bo belaino chwrai kho bla.

²¹Hakhe Jeba bai Jalmuna hai hwnwi sa kha, “Nwng sakphang bachaui chwngno buthar di, borokno mwchangwi’-no bini phan bo.” Gideon bachaui Jeba bai Jalmunano buthar kha, bórokni mangingangrokni kotogo tongmani madlwirokno na kha.

²²Aboni ulo Israilni bororok Gideonno hai hwnwi sa kha, “Chini saka-o nwng bai nini bosongrok tẃiphang wng si di, tamni hwn ba nwng Midiansarokni yakni chwngno phiyók kha.”

²³Gideon bórokno hai hwnwi sa kha, “Ang tei ani bwsa norokni tẃiphang wng glak, Subraiyung baithang se norokni tẃiphang wngnai.”

²⁴Bo teibo hai hwnwi sa kha, “Norokno koi ja-o, norok borok thwgwi khunjuni manwino ano rw di.” (Midiansarok Ismaelsarok hai khunju-o rangchakni uakhum-toyarok kan lai-o.)

²⁵Bórok hai hwnwi sa kha, “Chwng khá phurwi’-no abórokno nono rw lainai.” Hakhe bórok rí kangsa bo laiwi aro bebak’-no segwi tubuma manwirokni aroni uakhum-toyarok rw lai kha.

²⁶Gideon manmani rangchakni kanjaknai bebagwi kilo 20 wng kha, abo Midianni habugra kanmani rí, madlwi, ganthi tei mangingangrokni kotogo phánmarokno le duljak li ya.

²⁷Gideon rangchakni ephod kaisa snamwi bini kamiyung Ophra-o ton kha. Bebak Israilrok Kaitorno yakarwi aro sak phal laiwi abono khulum lai kha. Abono Gideon bai bini núkhungni bagwi khẃi wng kha.

²⁸Hakhe Midiansarok Israilrok bai mechenjak kha tei bórok bokhorok tisaui se man li ya. Tei Gideon thwi ya sak nokha bisi brwichi jora ha-o kwchang kwchang wng kha.

²⁹Joasni bwsla Jerubal bini nogo kiphilwi thángwi aro tongwi kha.

³⁰Gideonni bwsla khorok snichi tongo, tamni hwn ba bini bihikbo kwbángma’-no tongo.

³¹Sekemo bini bihik kotoi tongo, bo khoroksa bwsa chwla man kha, bini mung Abimelek hwnwi phar kha.

³²Joasni bwsla Gideon chakra wng súgwino thwi kha tei Abiejer bosongni kami kotor Ophra; Joas buphani simalwngo phobjak kha.

³³Gideon thwimani ulo Israilrok haino hai Kaitorno yakarwi Bal mwtaino khulum lai kha.

³⁴Tei Israilni bororok bórokno kitingwi tongnai bebak arirokni yakni phiyóknai Subraiyung Kaitorno muitu man li ya.

³⁵Gideon aswk Israilrokni bagwi samung kaham khlai langma se bini núkhungno bórok kisa phano khairok li ya.