Read Kok Borok BUJ THUMNAIROK 9 Bible Online

BUJ THUMNAIROK 9 - Kok Borok bible

BUJ THUMNAIROK 9

¹Jerubalni bwsla Abimelek Sekemo tong bainai bumani sandairokni thani thángwi bebakno hai hwnwi saui kha,

²“Sekemni bororokno hai hwnwi sẃng di, Gideonni khorok snichi bwsarok bai de, eba khe khoroksa borok bai da tẃitherjakma chajak bai?” Muitu khlai di Abimelek norokni bahan-bwthẃi se.

³Bini bumani sandairok bini wngwi Sekemni bororokno o kókno sa kha. Sekemni bororok Abimelekni kók khnanani gosi kha, tamni hwn ba bórok hai hwnwi sa lai kha, “Bo chini’-no takhuk.”

⁴Bórok bono Bal mwtai nokni rukphai dul snichi rw kha, abo bai khe Abimelek bono rwktharnai borok hamyarok tei natharokno narwk kha.

⁵Bo Ophra-o buphani thani thángwi holong dulsa bai borok khorok snichi bini takhukrok, Gideonni bwslasongno buthar kha. Tamo khe Jotham, Gideonni bwsla kusu khe huijagwi tongma bai butharjak li ya.

⁶Hakhe bebak Sekemni tei Bet-milloni bororok thansa wngwi Sekemni uk buphango tháng laiwi Abimelekno habugra chá rw lai kha.

⁷Jotham abono khna khe, bo Gerisim hachukni bokhorogo kasaui bórokno chirigwi hai hwnwi sa kha, “Sekemni bororok, ani kók khna di, hakhe Kaitorbo norokni kók khna anw.”

⁸Salsa-o buphangrok habugra snam lainani bagwi kuthum lai kha. Bórok Olib buphangno hai hwnwi sa lai kha, “Nwng chini habugra wng si di.”

⁹Olib buphang hai hwnwi sa kha, “Norokni bugra chána bagwi ani thok da ma mwthak sinai abo bai se mwtairok tei bororokno bóri lai-o.”

¹⁰Hakhe buphangrok khwichang buphangno hai hwnwi sa kha, “Nwng phaiwi chini habugra wng phai si di.”

¹¹Tamo khe khwichang buphang bórokno hai hwnwi sa kha, “Norokni habugra chána bagwi ani kothok, kwtẃima bwthái da yakarwi ma tháng sinai?”

¹²Hakhe buphangrok angurno hai hwnwi sa lai kha, “Nwng phaiwi chini habugra wng phai si di.”

¹³Tamo khe angur bórokno hai hwnwi sa kha, “Norokni bugra chána bagwi ani chuak da yakarwi ma tháng sinai? Abo bai se mwtairok tei bororok tongthokjago.”

¹⁴Hakhe bebak buphangrok busulwngno hai hwnwi sa lai kha, “Nwng phaiwi chini bugra chá phai si di.”

¹⁵Busulwng buphangrokno hai hwnwi sa kha, “Norok kubui’-no ano norokni bugra chá rwna muchung khe, ani saklomo bathak phai di, wng ya khe busulwngni hór pekhagwi Lebanonni buphangrokno kham rw bainai.”

¹⁶Kaham bai kheno da Abimelekno norok habugra chong lai kha? Norok Gideonni núkhungno muitu khlaiwi, bini núkhungno kaham khe da nai lai kha tei bini manthai tongma jora khw de khlai lai kha?

¹⁷Tamni hwn ba ani apha, bini langmano yago naui norokni bagwi choba nang lai kha tei norokno Midiansarokni yakni phiyók kha.

¹⁸Tabuk norok ani aphani kena ari wngwi bacha lai kha tei bini bwsarokno holong dulsa bai khorok snichino buthar bai kha, Abimelek bini selengjwkni bwsla, norokni sandai wngma bai bono Sekemni habugra snam lai kha.

¹⁹Hakhe norok Gideon bai bini núkhungrokno bwkha kaham bai khlai khe Abimelek bai tongthok lai di tei bonobo norok bai tongthok rw di.

²⁰Wng ya khe Abimelekni hór nongkhorwi Sekem bai Bet-miloni bororokno khampra rw thung tei Sekem bai Bet-milo bororokni hór nongkhorwi Abimelekno kham rwui pái thung.

²¹Hakhe Jotham bini takhuk Abimelekno kirijagwi Biro khárwi thángwi tongwi kha.

²²Abimelek Israilo nokha bisik tham jora tẃiphang wng kha.

²³Kaitor Abimelek bai Sekemni bororokno nai laiwi man ya khlai kha, bórok Abimelekno kebengwi bacha lai kha.

²⁴Abo wngmani khe Gideonni khorok snichi bwsarokno Abimelek butharmani bagwi tei Sekemni bororok abo hai khlai rwnani tóksama bagwi se.

²⁵Sekemni bororok hachuk bokhorogo Abimelekni bagwi borok huijak rwui tong rw kha tei bórok abo lama tẃi himnairokno khok kha, Abimelek a kókno saui man kha.

²⁶Hakhe Ebedni bwsla Gad bini takhuk bai Sekemo phai kha tei Sekemni bororok bono poito chá kha.

²⁷Bórok bebak angur bari-o thángwi angur khak laiwi, abono arak snamwi panda kaisa khlai lai kha, bórokni mwtai nogo tháng laiwi, aro chá lai kha, nung lai kha tei Abimelekno kul lai kha,

²⁸Ebedni bwsla Gal hai hwnwi sa kha, “Abimelek sabo, tei chwng Sekemnirok khe sabo, chwng ba bono monthai wng lang? Gideonni bwsa tei bini ojama Jebul ba Sekemni bupha Hamorni bororokno mon ya da? Hakhe chwng tamni bono mon laina klai?

²⁹O bororok ani yago wng khe, ang Abimelekno nor kha mun. Ang Abimelekno hai hwnwi sa kha mun, ‘Nini sengkrakrok báng rwui, ang bai choba nang lainani phai di.’ ”

³⁰Kamiyungni tẃiphang Jebul Gal samani kókno khna khe belai jolijak kha.

³¹Bo Aruma-o Abimelekni thani tẃitun rohorwi hai hwnwi sa hor kha, “Ebedni bwsla Gal tei bini takhukrok Sekemo phaiwi, bórok nono kebengwi kamiyung tungphla rwui tong kha.

³²Hakhe tabuk, nwng bai nini bororok horo thángwi panthoro huijagwi ton lai di.

³³Khwna phungo sal pasa drobo bachaui achomsa kamiyungno choprok di, Gal bai bini bororok nini bagwi phai lai khe, nini muchung tẃi’-no bórokno khlai di.”

³⁴Hakhe Abimelek bai bini bebak bororok horo bachaui tháng laiwi bodol kaibrwi khe Sekemni phataro huijagwi tong lai kha.

³⁵Abimelek bai bini bororok Ebedni bwsla Galno kamiyung duglamo phaiwi bachama nuk khe huijagwi tongmani bacha lai kha.

³⁶Gal bórokno nuk khe, Jebulno hai hwnwi sa kha, “Nahar di hachuk sakani bororok nongkhorwi phai lai kha!” “Nwng hachukni sampilino se borok hai nuk khna,” hwnwi Jebul sa kha.

³⁷Gal haino hai hwnwi sa phi kha, “Nahar di, bororok kwchar hani se phai khlaiwi tong lai-o, kaisa bodol khe kaham hamya sanai uk buphangni phai lai-o.”

³⁸Aphuru khe Jebul bono hai hwnwi sa kha, “Buko sla nwng ‘Abimelek sabo, bono chwng monnani?’ hwnwi aswk kók kotor sa te mani? O sengkrak bodolrokno’-no nwng helengsasa wngjakmani ya diba? Tabuk thángwi bórok bai choba nang lai si di.”

³⁹Gal Sekemni bororokno tlangwi Abimelek bai choba nang lai kha.

⁴⁰Gal khár khe Abimelek bono riphrik kha, borok kwbángma kamiyung duglam jora dera lai bai kha.

⁴¹Abimelek Aruma-o tong kha, Jebul Gal bini takhukrokno Sekemno rwkhlai rohor bai kha, bórok aro tei tongwi se man li ya.

⁴²Teini salo Sekemni bororok panthoro tháng laina chong lai tongmano Abimelek saui man kha;

⁴³bo bini bororokno tlangwi, bodol kaitham khe khagwi panthoro huijagwi naising laiwi tong lai kha, bo kamiyungni bororokno nongkhorwi phaima nuhur kha, bo achomsa bachaui bórokno buthar bai kha.

⁴⁴Abimelek bai bini bodolrok kamiyung duglamo doui thángwi tongwi la kha tei bodol kainwirok khe panthoro tongnairokno choprogwi buthar bai kha.

⁴⁵Sapung nang laiwi Abimelek kamiyungno yago naui man kha, aro tongnai bororokno buthar bai kha, bebak swbai baiwi ha-o sóm sarwi rw lai kha.

⁴⁶Sekemni nok kuchugo tong bainai bororok abono khna khe, bórok Elbritni nok kwrago hap lai kha.

⁴⁷Bebak nok kuchukni bororok thupsa wng lai kha hwnwi Abimelek sajak khe,

⁴⁸Abimelek bini bororok bai Salmon hachugo kasaui tháng lai kha, bo kaisa rua naui buphang bebak tanwi bini bangora-o na kha. Bo bini bororokno abo khe dakti khlai di hwnwi sa kha.

⁴⁹Hakhe jotono buphang bedek tan laiwi Abimelekno rwkthar lai kha, nok kwrak saka-o abono rúngwi rw lai kha, bórok hakhe hór phnangwi rw lai kha, bebak bororok khorok 1,000 chwla bai bwrwi thwi bai kha.

⁵⁰Aboni ulo Abimelek Thebeso thángwi kamiyungno gerepsa kha tei choprogwi abono bini khlai kha,

⁵¹kamiyung bisingo khungsa nok kuchuk tongo, aro kamiyungni bebak bwrwi chwla khárwi tháng baiwi, dugar berebwi núkhúng saka-o kasaui tháng lai kha.

⁵²Abimelek nok kuchuk nogo phaiwi hór bai sógwi páinani dugaro tháng kha.

⁵³Bwrwi khoroksa gom pheremani holong bai Abimelekni bokhorokno naiwi khitar khe, bini khorok chárá kukhrup kha.

⁵⁴Hakhe bo dakti bini seng tẃinai sikla khoroksano ringwi hai hwnwi sa kha, “Nini seng naui ano buthar di, wng ya khe bororok, ‘Bwrwi khoroksa se bono butharo’ hwnwi sa lai anw.” Hakhe bini sikla khoroksa seng bai yór khe bo thwi kha.

⁵⁵Israilrok Abimelekno kwthwi nuk khe, bebak nogo kiphilwi tháng lai bai kha.

⁵⁶Abo tẃi khe Kaitor Abimelekno, buphano kebengwi bachanai khorok snichi takhukrokno butharmani yagul su kha.

⁵⁷Kaitor bebak Sekemni bororokno bórokni cha ya sakni bokhorogo klai rw kha. Gideonni bwsla Jothamni swraimung bórokni saka-o klai kha.