Read Kok Borok 2 JOHON 1 Bible Online

2 JOHON 1 - Kok Borok bible

2 JOHON 1

¹Ang a Okra omono swihoro. Kaitor bai chongjak a bwrwima bai bini bwsarokno omono swihoro. Ang norokno sói khe hamjago. Ang simi’-no norokno hamjak ya, kubuino sinairok bebak’-no norokno hamjago,

²tamni hwn ba chini bwkha-o kubui tongo, phiya a kubui mol brúm brúm’-no chwng bai tong anw.

³Apha Kaitor bai bini Sajla Subrai Jisu Khristo chwngno khairok anw, chwngno maya chá anw, chwngno khá kwchang rw anw; bórok chwngno kubui khe hamjagwi hai’-no khlai anw.

⁴Apha chwngno dagima tẃi khe nini bwsarokni bere baksano kubui khe tongma nugwi ang bwswk se tongthok kha.

⁵Khájani o bwrwima, ang hakhe nono sa-o: Phai di, chwng kiching chwng hamjak lai anw. Ang kwtal khe dagiui omono nono swima ya, ang swimani omo chwng yaphango’-no dagijakma se.

⁶O hamjakmani kók samani khe chwng Kaitorni kók khnaui tongthai hwnwi sama se; yaphangni simi norok khnaui phaimani dagima khe omo: Norok hamjak laiwi tong lai thai.

⁷Lama koró rwnairok kwbángma’-no swngchar gwnangwi ongkhor kha, bórok Jisu Khristono borok wngwi phai kha hwnwi gosi ya; Omo tẃi borok’-no lama koró rwnai, bo Khristoni Kena ari!

⁸Hakhe norok hus wng bai di, hakhe norok manna hwnwi tangmani abono keple yaui man sukna tẃi khe hus wng bai di.

⁹Khristo phrwngma tẃi tong yaui abono khibiui thángnai borok bo Kaitorno man ya kho; a phrwngma tẃi tongnai borok bo Phanobo man kha, Sajlanobo man kha.

¹⁰Khoroksa swk omo tẃi phrwngmungno tubu yaui norokni thani phai khe norok bono nogo ta kasa rw di, bono khá kaham suda ta yaphar di.

¹¹Tamni hwn ba bono khá kaham yapharnai borok bo’-bo a borok bai baksa’-no samung hamyani tangsong wngma klai-o.

¹²Ang norokno kók kwbángma’-no sana tongmani, hai phano ang abono swikang tei swikongtwi bai swi yaui; aboni slái chwng tongthok sukna bagwi ang norokni aro phaiwi dadak-didik khe sa lai anw hwnwi khá khlai-o.

¹³Kaitor bai chongjak nini bukhukni bwsarokbo nono khápang rohoro. Amen.