Read Kok Borok JUDA 1 Bible Online

JUDA 1 - Kok Borok bible

JUDA 1

¹Ang Jisu Khristoni seleng, Jakobni takhuk Juda omono swihoro. Ang Kaitor bai ringjaknairokno omono swihoro, bórok Apha Kaitor bai hamjago, Jisu Khristo bai narwgwi tonjago.

²Norok belai khe maya chájak thung, belai khe khá kwchang rwjak thung, belai khe hamjagwi tongjak thung.

³Khájani takhukrok, chwng joto’-no mwthangjakmani kókno ang norokno swina belai khe muchungo, aphuru’-no Kaitor uáisa baino bini bororokno rwmani a poito khlaijaknai kókno narwkna bagwi choba khlai ja di hwnwi swi thai hwnwi ang uansugo.

⁴Kaitorno kiri ya khoroknwi khoroktham borok chini bisingo tepsa khe hap phai kha, bórok sak tongthok tẃi tongwi manna tẃi khe chini Kaitor khairokma kókno juda khe sa-o, bórok Jisu Khristonobo gosi ya, bo simi se Hoda bai Subrai. Bórok majra berjakmani abo agi phuruno Elembago sajak kha.

⁵Subrai bahai khe Israilrokno ha Ijipni phiyók kha, ulo khe poito khlai yarokno sokomor kha, norok omorokno saui man phano ang norokno muitu khlaiwi rwna nai-o.

⁶Suarirokni bere baksanobo naisigwi nai di: bórok tongna nangma tẃi’-no tong yaui sakni tongthai khibiui tháng kha; bórok ha tolani mwnakma-o cho phlai ya sorni dwkhwi bai khajagwi tongo; Kaitor aro bórokno jerani a Sal kotorni bagwi ton kha.

⁷Sodom bai Gomora tei gana-ginini taunroknobo naisigwi nai di: Aro tongnairok a suarirok hai’-no tong kha, bórok buitali-buitala wng kha, phiya chwla bai chwla tongmung sitra tong kha; buino phunugui hus khlaiwi rwna bagwi bórok thwi phlai ya hór bai sátokjak kha.

⁸Omo tẃi khe’-no o bororokbo bórokni bwsakno sumsogo khiklainai omo tẃi imang nugo; bórok Kaitorni phanno sak nang ya, bórok chuknoha-o chẃngsacha tongnairokno hamya sa-o.

⁹Suari bokhorok Mikail suda omo hai sa ya. Musini mangno sabo mannai abono tẃiwi Soitan bai kók bángwi uálai tong lai phuru Mikail kók hamya saui Soitanno majra ber rak ya. Hai sa yaui bo “Subrai nono hwn thung!” hwnwi simi se sa-o.

¹⁰O bororok khe si yaui hamya sa-o; bórok uak-tokrok hai hai’-no simani abono bórok’-no pái rw-o.

¹¹Bórok bwswk hamya sitrano! Bórok Kain himmani a lama-o him kha. Bórok rang manna bagwi Balam hai’-no samung cha ya-o sakno yaphar kha. Bórok Kora hai’-no kók khna ya wngwi bo hai khe’-no sokomorjak bai kha.

¹²Norok bai baksa bórok lachi ya khe nungmani chámani abo tisumu hai. Bórok sakni kaham simi se nai-o. Bórok wng kha uatwi ua ya nokbar bai sibchaui tlangjak chumui hai. Bórok tháina jora sók phaiwi suda bwthái thái ya buphang hai, phuichajak buphang hai bórok thwi súkjak.

¹³Bórok twijlangni twi aphal kobor hai, bórokni lachimasingcha samungrok twi aphalni phena kasama hai. Bórok kwrẃngsa-o tong ya athukiri hai, Kaitor bórokni banta belai mwnakma-o mol brúm brúmni bagwi tongthai khatiui ton kha.

¹⁴Adamni simi piri kaisnini borok Enok agi phuru bórokni bagwi hai hwnwi kók diyari sa kha, “Nai di, Subrai bini suari kwthar chisai kwbángmano tubu-ui phainai,

¹⁵hakhe bo bebak bororokni buj thumnai, Kaitorno kiri ya sumsok gwnangrok bebak samung hamya khlaimani, phiya a Kaitorno kiri yarok, Kaitorno bebak belai kók hamya samani aboni bagwi majra bernai.”

¹⁶O bororok hunu-hanai máng sa lai tongo, buino cha ya hwn lai máng tongo; bórok sak motók tẃi’-no tongo; bórok kók kotor sa-o, bórok bórokni samung cha rwna bagwi buini yakung pugo.

¹⁷Hai phano khájani takhukrok, chini Subrai Jisu Khristoni chonghorrok norokno swkango samarokno muitu khlaiwi nai di.

¹⁸Bórok norokno hai hwnwi sa kha, “O mol páina nai phuru norokno mwnwinai bororok phai anw, bórok Kaitorno kiri yaui sak motók tẃi tong anw.”

¹⁹Omo tẃirok’-no kak lai-phui lai khlainairok, bórok’-no sak muchung tẃi tongnairok, bórok’-no Phola Kwtharno man yarok.

²⁰Hai phano khájani takhukrok, norok poito khlaimani a kók kwtharrok bai sak sakno rak rwui tong di. Phola Kwtharni phan bai suri san di.

²¹Chini Subrai Jisu Khristo khairogwi norokno mwthang phlainani salno naising twtwi Kaitor bai hamjakna tẃi khe tong di.

²²Bwkha udru mudru wngnairokno maya chá di;

²³bórokno hórni segwi mwthang di. Tei baksano kiri twtwi maya chá di, bórok sak motók tẃi tongma bai bórokni ríno suda seleng di.

²⁴Norokno klainani yakni kati rwui mannai, norokno majra kwrwi khe tongthok rwui bo chẃngsacha wngwi tong thani bacha rwui mannai,

²⁵chini Subrai Jisu Khristoni bising tẃi chwngno Mwthangnai a kaisa susuk Kaitor, bo thángnai molni simi, tabukni o molo, phiya mol brúm brúm’-no chẃngsacha wng thung, kotor wng thung, kwplai wng thung, bokhorok wng thung! Amen.