Read Kok Borok PHUNUKJAKMANI 10 Bible Online

PHUNUKJAKMANI 10 - Kok Borok bible

PHUNUKJAKMANI 10

¹Aphuru ang tei khoroksa phan gwnang suarino chuknohani ongkhorwi phaima nuk kha. Bo chumuino kanjak chumjak, bokhorok saka chokhreng twi nungjak; bini bumukhang sal hai; yakung khe hórjlaini thongla hai.

²Bini yago bijap kotoi dolsa phiyokjak. Bo yagra yakung bai twijlango ká kha, yaksi yakung bai hakungo ká kha,

³hakhe singho pungma khorang hai khe chirikhók kha. Bo chirikhók khe’-no phirang tháisni kogwi gurumsa kha.

⁴Abórok gurumsa khe’-no ang swina nai kha, hai phano ang chuknohani hai hwnwi sama khna kha, “O phirang tháisni gurumui samano khogwi ton di; omono ta swi di.”

⁵Aphuru ang twijlang bai hakungo bachajak suarino nokha-o yak tisama nuk kha,

⁶hakhe nokha bai aro tongnai bebakno snamnai, haktor bai aro tongnai bebakno snamnai tei twijlang bai aro tongnai bebakno snamnai, a mol brúm brúm kwthang tongnaisa Kaitorni mungwi bo hai hwnwi swmai tang kha, “Tei ler glak!

⁷Khorokdokni ulni a suari totro tam khe Kaitor bini seleng diyarirokno sama tẃi’-no bisingni chapmano khlaiwi páinai.”

⁸Aphuru ano kók sanai chuknohani a khorang ano hai hwnwi sa khua, “Tháng di, twijlang bai hakungo bachaui tongnai suarini yakni a bijap phiyokjakno naui di.”

⁹Hakhe ang a suarini thani thángwi “A bijap kotoino ano rw di,” hwnwi san kha. Bo ano hai hwnwi sa kha, “Hi’n, omono na di, chá di; abo nini bohokno khá rwnai, hai phano nini búkhúgo khe abo piya modu hai kwtẃi wngnai.”

¹⁰Ang bini yakni a bijap kotoino naui chá kha; abo ani búkhúgo piya modu hai kwtẃi wng kha, phiya monok bai khe abo ani bohokno khá rw kha.

¹¹Hakhe ang hai hwnwi sajak kha, “Nwng hai’-no hai aswk dopharokni bagwi, aswk hani bororokni bagwi, aswk kókni bororokni bagwi tei aswk bugrarokni bagwi Kaitor kók samano ma sanai.”