Read Kok Borok PHUNUKJAKMANI 11 Bible Online

PHUNUKJAKMANI 11 - Kok Borok bible

PHUNUKJAKMANI 11

¹Ang aphuru raidang hai sujaknai kongsa rwjagwi hai hwnwi sajak kha, “Bacha di, Kaitorni noktharno su di, háyánobo su di, noktharo surinairoknobo lekha di.

²Hai phano noktharni nokhlano ta su di. Abono ta su di, tamni hwn ba abo buini bororokni yago rwjak kha, bórok nokha tal brwichinwi jora taun kwtharno kádul anw.

³Ani bagwi kók sanai pudri kanjak khoroknwino ang rohor anw; bórok nokha sal 1,260 jora Kaitorni kók sa anw.”

⁴A kók sanai khoroknwirok wng kha swngcharni Subraini bwskango tongnai tháistwi buphang phangnwi bai thopna kwnwi.

⁵Khoroksa swk phano bórokno hamya khlaina nai kha hwn khe bórokni búkhúkni hór ongkhorwi phaiwi a kena arirokno sokomornai; omo tẃi khe’-no bórokno hamya khlaina nainai borokbo butharjaknai.

⁶Bórok Kaitorni kók sa phuru uatwi ua ya tẃi khe bórok nokhano kholobwi mano. Twimukrokbo bórokni yago’-no, hakhe twimukroknobo bórok thẃi khlaiwi mano; bórokni muchung tẃi’-no podrepot birman phnangwi haktorno thwngwi tongwi mano.

⁷Bórok kók saui pái khe’-no hakhorni ongkhorwi phainai a yabrwi bórok bai choba nang lainai. Bo bórokno mechenwi butharnai,

⁸hakhe bórokni Subrai kruso kanta bujakmani a taun kotorni lama-o bórokni mang klai tongnai. Sodom eba Ijip hwnwi sa khe bororok a taunno’-no wngna hwnwi romo.

⁹Joto dophani bororok, joto bosongni bororok, joto kókni bororok tei joto hani bororok bórokni mangno nokha saltham kwchar nainai, hakhe bórokno phob rw glak.

¹⁰A khoroknwi thwima bai swngcharni bororok tongthokjaknai. Bórok khá srangwi tongthok lainai, khoroksa tei khoroksano hili rohor lainai, tamni hwn ba a diyari khoroknwi swngcharni bororokno belai tekto manjak rw kha.

¹¹Nokha saltham kwchar tong khe Kaitorni aroni mwthangnai hama phaiwi bórokni bisingo hap phai kha, hakhe bórok bacha lai kha; bórokno nuknai joto’-no belai khe kirijak lai kha.

¹²Aphuru a diyari khoroknwi chuknohani sotonwi hai hwnwi sama khna kha, “Oro kasaui phai di!” Hakhe bórokni kena arirokni mokol bwskango bórok chuknoha-o chumui-o khe kasaui tháng kha.

¹³Aphuru’-no bangla kotor phai-o; taunni khakchini khaksa sokomorjak kha, borok khorok snisai bangla bai butharjak kha. Tei bororok belai khe kirijagwi “Chuknohani Kaitor se kotor,” hwnwi lob lai kha.

¹⁴Kaisani ulni a kirimasingcha pái kha; hai phano nai di, kwnwini ulni a kirimasingcha dakti’-no phainai.

¹⁵Aphuru khorokdokni ulni a suari bini totro tam kha, hakhe chuknoha-o sotonwi hai hwnwi sajak kha, “Chini Subrai bai bini Masia tabuk o swngcharni bugra chá rwjak kha, hakhe bo mol brúm brúm bugra wngwi tongnai.”

¹⁶Hakhe Kaitorni bwskango sak sakni achukthayungo achuk laijak okra kholpebrwirok pwtapsa klai laiwi hai hwnwi saui Kaitorno khulum lai kha, “O Subrai Kwplaisa Kaitor, nwng tabukbo tongo, agibo tongo! Nwng nini phan kwrakno samungo phnangwi bugra wngma bai chwng nono hambai rw-o.

¹⁸Poito kwrwirok jolijak súk kha, tamni hwn ba tabuk nwng jolijagwi yagul suna jora, tabuk kwthwirok buj thumjakna jora. Tabuk nini seleng diyarirokno sokat rwna jora nini bebak bororokno, nono kirinairokno, tamo borok kotor, tamo borok kusu, bórokno sokat rwna jora. Tabuk swngchar sokomornairokno sokomorna jora!”

¹⁹Chuknohani Kaitorni nokthar phiyokjak kha, hakhe bini noktharo swmaini a swndwk nukjak kha. Aphuru nokha philik kha, gurum kha, phirang kok kha, bangla phai kha tei belai khe kothor klai kha.