Read Kok Borok PHUNUKJAKMANI 13 Bible Online

PHUNUKJAKMANI 13 - Kok Borok bible

PHUNUKJAKMANI 13

¹Aphuru ang twijlangni yabrwi masano kasaui phaima nuk kha. Bini bokorong kongchi, bokhorok tháisni, bokorong mathe’-no motok kaisa kaisa tongo, bokhorokrogo mung hamya swijak.

²Ang nukmani a yabrwi mwsa khukutai hai, yakung khe gong yakung hai, búkhúk khe singho búkhúk hai. A dragon a yabrwini yago bini phan, bini achukthayung tei bini suar kotor rw kha.

³A yabrwini bokhorok tháisa butharjak hai, phiya a kwsa kotor hamjak. Swngcharni bebak bororok a yabrwino mwlang chaui bono rwkthar bai kha.

⁴A dragon a yabrwini yago bini suar rwma bai bebak bororok dragonno khulum bai kha. Bórok yabrwinobo hai hwnwi saui khulum bai kha, “O yabrwi hai sabo tong? Bo bai choba nang lai mannai sabo tong?”

⁵A yabrwi kók kotor bai kók hamya sanani búkhúk rwjak kha, bo nokha tal brwichinwi jora phan rwjak kha.

⁶Bo Kaitorno hamya sacha kha, bini mungnobo, bini tongthainobo tei chuknoha-o tongnai bebaknobo hamya sacha kha.

⁷Bo Kaitorni bororok bai choba nang laiwi kwplai khlaijak kha. Joto bosongno, joto dophano, joto kókni bororokno tei joto hani bororokno bini yago rwjak kha.

⁸Swngcharo tongnai bebak bororok bono khulumnai, kók khe hai, o swngchar snamjak ya sini’-no butharjaknai Mera bwsani Langma bijabo mung tisajak yarok bono khulumnai.

⁹“Khunju tong khe ba o kókno khna di.

¹⁰Khajak thotok hwn khe ba bo khajaknai’-no, seng bai butharjak thotok hwn khe ba bo seng bai butharjaknai’-no. Oro’-no Kaitorni bororok khá ma loknai, poitobo ma khlainai.”

¹¹Aphuru ang yabrwi tei masano hani kasaui phaima nuk kha. Mera bwsa hai bini bokorong kongnwi, phiya bo dragon pungma hai khe kók sa-o.

¹²Bo swkango phainai a yabrwini suar kotor bai bini bwskango samung khlai kha. Bo swngchar bai swngcharo bebak tongnairokno kwsa kotor hamjak swkango phainai a yabrwino khulum rw kha.

¹³Ulo phainai a yabrwi soidomni samung kotorrok phunuk kha; bo bebak bororokni bwskango nokhani hórno ha-o tikhlaiwi tubu kha.

¹⁴Bo swkango phainai yabrwini bwskango soidomni samung phunukna rwjakma bai swngcharo tongnairok bebakno lama koró rw kha. Bo seng bai tanjagwi suda thangwi tongnai a yabrwini mungwi bini mangtang hai tak di hwnwi swngcharni bebak bororokno hwn kha.

¹⁵Swkango phainai yabrwini a mangtang kók saui manna tẃi khe, phiya bono khulum yarokno butharwi manna tẃi khe ulo phainai yabrwi a mangtangno mwthangnani phan rwjak kha.

¹⁶A yabrwi kusu kotor, kwrwi gwnang, seleng seleng ya, jotono’-no yagra yago eba khe talikha-o mari bu-ui rw kha.

¹⁷A mari kwrwi khe kebo phano paiwibo man ya, phalwibo man ya; a mari wng kha yabrwini bumung eba khe bumungni bagwi lombor.

¹⁸Oro’-no sina nango. Sinai borok bo a yabrwini lombor lekhaui saui mano, tamni hwn ba a lombor wng kha borok khoroksani mung. Bumungni lombor wng kha 666.