Read Kok Borok PHUNUKJAKMANI 14 Bible Online

PHUNUKJAKMANI 14 - Kok Borok bible

PHUNUKJAKMANI 14

¹Aphuru ang naisigwi nai ba Siyon Hathái-o Mera bwsa bachajak, bo bai khorok 1,44,000 borok tongo, a bororokni talikha-o Mera bwsani bumung bai Buphani bumung swijak.

²Ang chuknohani kók samano khna kha, abo twi bwdam bwdam kutukma hai, phirang kogwi gurumma hai, ang khnamani a kók chongpreng tamnairok chongpreng tamma hai.

³A khorok 1,44,000 borok achukthayungni bwskango, makbrwirokni bwskango tei okrarokni bwskango bachaui tongo. Bórok rwchapmung kwtal rwchabo, swngcharni bororokni bere bórok paiwi phiyókjak kha ba bórok simi se abono srwngwi mano.

⁴Bórok wng kha bwrwirok bai gwdal yaui kwthar khe tongjak bororok; bórok chwrai kwthar. Mera bwsa tháng thani’-no bórokbo thángo, swngcharni bororokni bere bórok paiwi phiyókjak kha, hakhe Kaitor bai Mera bwsani bagwi bórok tháiskangni bwthái hai.

⁵Tatal tamono hwn bórok saui man ya; bórok majra kwrwi.

⁶Ang aphuru tei khoroksa suarino nokha-o birwi tongma nuk kha, swngcharni bebak bororokni thani, bebak hani bororok, bebak bosong, bebak kókni bororok tei bebak dophani thani sakhlaina bagwi bini thani pái phlai ya Kothoma Kaham tongo.

⁷Bo sotonwi hai hwnwi sa kha, “Kaitorno kiri di, bono kotor hwnwi lob di! Bo swngcharni buj thumna jora sók phai kha. Chuknoha, haktor, twijlang tei twimukrokno snamnaisano khulum di!”

⁸Tei khoroksa suari hai hwnwi sa twtwi rwktharjak, “Bái kha! Bái kha! Babilon kotor bái kha! Bo bebak bororokno bini chuakno khan kha, bini sak uaijama chuakno khan kha!”

⁹Tei khoroksa suari a swkang phainai khoroknwi suarirokno hai hwnwi sotonwi sa twtwi rwktharjak, “A yabrwi bai bini mangtangno khulumui bini mari talikha-o eba khe yago bujaknai borok bo

¹⁰Kaitorni jolima chuakno nungnai, abono Kaitor bini yagul sujaknai khuri-o mungsa dalok yaui lukhlaiwi rw kha. Abo tẃi bororok suari kwtharrok bai Mera bwsani bwskango gwndwk bai hóro sátokjaknai.

¹¹Bórokno sátokmani a hórni hoku mol brúm brúm kasa máng tongnai. A yabrwi bai bini mangtangno khulumnairok, bini mungni mari bujaknairok bórok sátokjakmani abo hor sal tei thak phlai glak.”

¹²Oro’-no Kaitorni bororok khá lokna nango, Kaitor dagima tẃi tongnairok, phiya Jisuno yakar yarok khá lokna nango.

¹³Aphuru ang chuknohani hai hwnwi samano khna kha, “O kókno swi di: Tabukni simi Subraini samung khlaiwi thwinairok bórok hamchajak!” Phola hai hwnwi sa kha, “I’n, abo haino! Bórokni samung bórok bai baksa thángma bai bórok samung kwrak tangmani ma lenglanai.”

¹⁴Aphuru ang naisigwi nai ba chumui kuphur dulsa. A chumui saka borok hai khoroksa achukjak, bini bokhorogo rangchakni motok, bini yago chekhra kubuk khungsa.

¹⁵Aphuru tei khoroksa suari noktharni ongkhorwi a chumui saka achukjakno sotonwi hai hwnwi sa hor kha, “Chekhra phnang di, mai ra di, rana jora wng kha; swngchar munui rana wngwi tong kha!”

¹⁶Hakhe a chumui-o achugwi tongnai bo swngcharo chekhra phnang kha, hakhe swngcharni mai rajak kha.

¹⁷Aphuru ang tei khoroksa suarino chuknohani noktharni ongkhorwi phaima nuk kha, bini yagobo chekhra kubuk khungsa tongo.

¹⁸Aphuru tei khoroksa suari háyáni ongkhorwi phai kha, bo háyáni hórni bagwi barja berjak. Bo chekhra kubuk tẃijak a suarino sotonwi hai hwnwi sa hor kha, “Nini chekhra phnang di, swngcharni angur barini angur rakhlai di, angurrok mun bai kha!”

¹⁹Hakhe a suari swngcharo chekhra phnang kha, angur buphangni angurrok raui angur sepjaknai hakhoro khiklaiwi rw kha, hakhe Kaitor jolijagwi abono sep kha,

²⁰Taunni phatarni a hakhoro angurrok sepjak kha, hakhe a hakhorni thẃi kochogwi ongkhor kha, abo mail nwira jora kochok kha, muktham thuk kha.