Read Kok Borok PHUNUKJAKMANI 16 Bible Online

PHUNUKJAKMANI 16 - Kok Borok bible

PHUNUKJAKMANI 16

¹Aphuru ang a suari khoroksnino noktharni sotonwi hai hwnwi sama khna kha, “Tháng di, Kaitorni yagul sujaknai manwi kupulung twk tháisnino ha-o lukhlaiwi rw di!”

²Suarirokni bere khoroksa thángwi bini twkno ha-o lukhlaiwi rw kha. Hakhe yabrwini mari bujaknairok tei bini mangtangno khulumnairok kirimasingcha kwsa hamya man kha.

³Aboni ulo khoroksani ulni a suari bini twkno twijlango lukhlaiwi rw kha. Twijlangni twi borok kwthwini thẃi hai wng bai kha, hakhe twi-o tongnairok bebak’-no thwi bai kha.

⁴Aboni ulo khoroknwini ulni a suari bini twkno twimarok bai twimukrogo lukhlaiwi rw kha, hakhe abórok thẃi wng bai kha.

⁵Ang twirokni barja berjak a suarino hai hwnwi sama khna kha, “O Kaitor Kwthar, nwng tabukno tongo, agibo tongo! Nwng o yagul sumani omo sói khe’-no su kha.

⁶Bórok Kaitorni bororokni thẃi kochok rw kha, diyarirokni thẃibo kochok rw kha, aboni bagwi nwng bórokno thẃi khan kha. Bórok khlaima tẃi’-no abo hai wng kha!”

⁷Ang aphuru háyáni hai hwnwi samano khna kha, “O Subrai Kwplaisa Kaitor, nwng sói kubui khe’-no yagul sunai!”

⁸Aboni ulo khorokthamni ulni a suari bini twkno salo lukhlaiwi rw kha, hakhe bo bini hór kutung bai bororokno sók di hwnjak kha.

⁹Bini hór kutung bai bororok sókjak bai kha, hakhe bórok omo tẃi birmanrokno phnangnai Kaitorno hamya sa lai kha, hai phano bórok bórokni sumsok yakarwi Kaitorno kotor hwnwi lob li ya.

¹⁰Aboni ulo khorokbrwini ulni a suari bini twkno a yabrwini achukthayungo lukhlaiwi rw kha. A yabrwini ha mwnak kha, phiya bororok sajakma bai bwslai uár bai kha.

¹¹Bórok sakrupmani bagwi tei kwsani bagwi chuknohani Kaitorno hamya sa lai kha, hai phano bórok samung hamyarok yakar ya.

¹²Aboni ulo khorokbani ulni a suari bini twkno Uphratis twima kotoro lukhlaiwi rw kha. Salkabaini phainai bugrarokno lama rwna bagwi a twima ran kha.

¹³Ang aphuru a dragonni búkhúkni, a yabrwini búkhúkni tei a diyari phatrani búkhúkni yongla hai mwtai hamya makthamno ongkhorwi phaima nuk kha.

¹⁴Abórok wng kha soidomni samung khlainai mwtai hamyarok. A mwtai hamya makthamrok bebak hani bugrarokno Kwplaisa Kaitorni Salo choba khlaina bagwi kwrẃngsa khe thumnani tháng kha.

¹⁵“Khna di, ang sikhok hai khe phai-o! Sichaui tongwi bini rírok kaham khe naiwi tongnai borok bo hamchajak, hakhe bo rí kwrwi khe buini bwskango lachimasingcha khe tongna nang glak.”

¹⁶Aphuru mwtai hamyarok Hibru kók bai Armagedon hwnwi kwrẃngsa-o bugrarokno thum kha.

¹⁷Aboni ulo khorokdokni ulni a suari bini twkno nokha-o lukhlaiwi rw kha. Hakhe noktharni achukthayungni hai hwnwi sotonwi sajak kha, “Pái súk kha!”

¹⁸Hakhe nokha philik kha, gurum kha, phirang kok kha, koromsaui bangla phai kha. Borok snamjakmani ulo omo hai khe uáisa phano bangla phai ya kho, abo jotoni slái bangla kotor.

¹⁹A taun kotor khaktham khe khakjak kha, phiya bebak hani taunrokbo báiwi tháng kha. Kaitor Babilon kotormano pok yaui bini khurini chuak khan kha, bo yagul sujaknai chuak jailemno khan kha.

²⁰Twi kwcharni bebak harok kwmaui tháng bai kha, hatháirokbo nukjak li ya.

²¹Nokhani kothor kotorma kotorma bororokni saka klai kha, dulsa dulsa kilo 50 ká thotok. Bororok a kothorni birmanni bagwi Kaitorno hamya sa lai kha, tamni hwn ba abo wng kha belai kirimasingcha.