Read Kok Borok PHUNUKJAKMANI 18 Bible Online

PHUNUKJAKMANI 18 - Kok Borok bible

PHUNUKJAKMANI 18

¹Aboni ulo ang tei khoroksa suarino chuknohani ongkhorwi phaima nuk kha. Bo belai phan gwnang, bo chẃngsacha wngma bai swngchar gwnangwi’-no chẃngsa kha.

²Bo sotonwi hai hwnwi chirikhók kha, “Bái kha! Bái kha! Babilon kotor báiwi tháng kha! Mwtai hamyarok bini aro nok khaui tongo, phola hamyarokbo bini bisingo tongo; bebak selengmasingcha hamya toksa-toktẃirok bini aro tongo.

³Tamni hwn ba bo bebak bororokno bini chuakno khan kha, bini sak uaijamani chuak jailemno khan kha. Swngcharni bugrarok bo bai uaijaui tong bai kha, bo sak motók tẃi tongthok cháthok khe tongma bai swngcharni bepar thwngnairok gwnang wng bai kha.”

⁴Ang aphuru chuknohani tei kók tháisa hai hwnwi sama khna kha, “O ani bororok, phai di, bini bisingni ongkhorwi phai di! Norok bo bai baksa sumsok ta khlai di; norok bo bai baksa birman ta manjak di.

⁵Tamni hwn ba bini sumsok nokha khu-ui kha, bini tongmung hamyano Kaitor saui man kha.

⁶Bo norokno khlaima tẃi’-no norokbo bono khlai di; bini samung khlaima tẃi’-no bono dobol khe su phi di; Bo norokni bagwi chuak khlaima tẃi’-no norok aboni slái teibo kwprap khe bini khuri supungwi rw di.

⁷Bo sakno kotor khlaima tẃi’-no, bo tongthok cháthok tongma tẃi’-no bono sátok di, bono kap rw di. Tamni hwn ba bo khá bising bising hai hwnwi sa máng tongo, ‘Ang oro isiri wngwi achugwi tongo! Ang randi ya, ang uáisa phano ma kap glak!’

⁸Abo baino bo birman nangna hwnmani a birmanrok salsa baino nang phai anw, bo bemukbo manjaknai, mabo ma kapnai, chachararabo nangnai. Bo hór sókjaknai, tamni hwn ba bini buj thumnai Subrai Kaitor bo wng kha kwplaisa.”

⁹Bo bai baksa uaijaui sak tongthok cháthok khe tongnai o swngcharni bugrarokbo khammani hokuno nugwi kap lai-kok lai wngwi kap lai anw.

¹⁰Bórok bono sátokjakma nugwi kirijagwi hakchalo bachaui tongwi hai hwnwi sanai, “Omai-o! Omai-o! O Babilon kwrak! O Babilon kotor! Srapsani bisingo’-no nwng bahai yagul sujak kha!”

¹¹Swngcharni bepar thwngnairokbo bini bagwi muisubuk chaui kap lai anw, tamni hwn ba khoroksa phano bórokni manwirok painai kwrwi kha;

¹²khoroksa phano bórokni rangchak rukphai, moni-muktano painai kwrwi kha; khoroksa phano bórokni lilonni rí, silkerni rí, bórokni rí chak sru-sru rí chak roromrok painai kwrwi kha; khoroksa phano buphang motomrok, mayung buani manwirok, buphang kahamni manwirok, pitolni manwirok, sorni manwirok, marbelni manwirok painai kwrwi kha;

¹³khoroksa phano darchini, elachi, satrai, podrepot belengtwi motomrok painai kwrwi kha; khoroksa phano chuak, thok, ata, gom, musukrok, merarok, korairok, malkhungrok, selengrok tei bororokno painai kwrwi kha.

¹⁴Bepar thwngnairok bono hai hwnwi sanai, “Nwng manna muchungma manwi kahamrok bebak kwma bai kha. Nini rang-mairok tei chẃngsacha-sangsacharok tháng bai kha, nwng abórokno tei nuk glak kha!”

¹⁵A tauno bepar thwngwi gwnang wngnairok bono sátokjakma nugwi kirijagwi hakchalo bachaui tongnai. Bórok muisubuk chaui kabwi

¹⁶hai hwnwi sanai, “Omai-o! Omai-o! A taun kotor bwswk kirimasingcha! Bo lilonni rí, rí chak sru-sru, rí chak rorom kanwi tong tongmani, sak gwnangwi rangchakni gwina-ganthi moni-muktarok kan kanwi tongmani!

¹⁷Bo srapsani bisingo’-no a rang-mairok kwmajak bai kha!” Nabik okrarok, rungtoro kasanairok, nabikrok tei twijlango samung tangwi chánairok bebak’-no hakchalo bachaui tong bai kha;

¹⁸bórok a taun khammani hoku nugwi hai hwnwi chirikhók lai kha, “A taun kotor hai tei bu taun tong?”

¹⁹Bórok bokhorogo hadlwi sar lai kha, bórok muisubuk chaui kap laiwi hai hwnwi sa lai kha, “Omai-o! Omai-o! A taun kotor bwswk kirimasingcha! Bo wng kha a taun bini rang-mairok bai’-no rungtor tẃi bepar thwngnairok gwnang wngmani, srapsani bisingo’-no bini bebak’-no kwmajak bai kha!”

²⁰O chuknoha, a taun báima bai tongthok di! O Kaitorni bororok! O chonghorrok! O diyarirok! Norok tongthok di! Bo norokno khlaima bagwi Kaitor bono yagul su kha!

²¹Aphuru suari phan gwnang khoroksa holongdap kotorma kaisa khochaui twijlango khitarwi hai hwnwi sa kha, “Omo tẃi khe’-no Babilon taun kotor sotonwi khitarwi rohorjaknai, abo tei nukjak glak.

²²Chongpreng khorang, dangdu khorang, sumui khorang, totro khorang nini aro tei khna glak. Samung kwrwng khoroksa phano nini aro tei nuk glak; rwsam-romoni khorang nini aro tei khna glak.

²³Nini aro chati chẃngma tei nuk glak; nini aro hamjwk chamarini khorang tei khna glak. Nini bepar thwngnairok swngcharo jotoni slái kotor wngwi tongmani, phiya nwng dandabaji bai swngcharni bebak bororokno bandi kha!”

²⁴Diyarirokni thẃi bai Kaitorni bororokni thẃi bini aro manjakma bai Babilon yagul sujak kha; I’n, o swngcharo butharjaknai bebakni thẃi’-no aro manjak kha.