Read Kok Borok PHUNUKJAKMANI 2 Bible Online

PHUNUKJAKMANI 2 - Kok Borok bible

PHUNUKJAKMANI 2

¹“Episni mothani suarino hai hwnwi swihor di: Yagra yago a athukiri kolsnino tẃinai, a rangchakni thopna kaisnini kwcharo himnai a borok o kókno sa-o.

²Nwng khlaimarokno ang saui mano; ang saui mano nwng bwswk samung kwrak khlai kha, nwng bwswk soi kha. Ang saui mano nwng borok hamyarokno soiwi man ya, chonghor wng yaui’-no chwng chonghor hwnwi hwnnairokno nwng potaliui nai kha, hakhe bórokni tatalno rom kha.

³Nwng khá kolok, nwng ani bagwi sátokjak phano yakar ya.

⁴Hai phano ang nono o kók tháisa hwnna tongo, nwng swkango hamjakma hai ano tabuk hamjak tha li ya.

⁵Uansugui nai di, nwng bwswk kwlwk kha! Nini sumsok yakarwi agi khlaima hai khlai phi di. Nwng nini sumsok yakar ya khe ang nini thani phaiwi nini thopnano aroni nornai.

⁶Hai phano omo nini kaham: Nikolaitsong samung khlaimarokno ang naislerma hai’-no nwngbo naislerjago.

⁷“Khunju tong khe ba Phola motharokno samano khna di.” “Kwplai wngnairokno ang Kaitorni Bari-o tongnai mwthangnai buphangni bwthái chá rwnai.”

⁸“Smurnani mothani suarino hai hwnwi swihor di: “Thwiwi kwthang wng phinai a borok o kókno sa-o, bo wng kha yaphang buchuk.

⁹Nwng tekto manmano ang saui mano. Ang saui mano nwng kwrwi, hai phano sói’-no nwng gwnang se. Judai wng yaui’-no chwng Judai hwnwi hwnnairok nono hamya samano ang saui mano; bórok wng kha Soitanni bororok.

¹⁰Nwng sátokjakna naiwi tongmano ta kiri di. Khna di, Soitan norokno amjokna bagwi norokni bere baksano alongo khiklai anw; norok nokha salchi jora tẃi se tekto man anw. Thw phano thwi thung nwng ano poito khlaiwi tong di, hakhe ang nono langmani motok rwnai.

¹¹“Khunju tong khe ba Phola motharokno samano khna di. “Kwplai wngnairok bórok tei uáisa thwinani yakni yóknai.”

¹²“Pergamni mothani suarino hai hwnwi swihor di: “Babai nwnwi seng kubuk tẃijak a borok o kókno sa-o.

¹³Nwng buro tong ang saui mano; Soitanni achukthayung tongmani aro’-no nwng tongo. Nwng ani mung romwi tongo, Soitan tong thani ani bagwi sói sakki wngnai Antipa butharjak phurubo nwng ano poito khlai ya wng ya.

¹⁴Hai phano ang nono kisa hwnna tongo: nini aroni baksa Balam phrwngma tẃi tongnai tongo, a Balam Israilrokno takjak mwtaini thani barokmano chá rwui, buitali-buitala wng rwui sumsogo khiklai di hwnwi Balakno phrwngo.

¹⁵Abo hai’-no norokni bisingobo Nikolaitsong phrwngma tẃi tongnai tongo.

¹⁶Abo baino sumsok yakar di, wng ya khe ang dakti’-no phaiwi ani búkhúkni ongkhorma seng bai a bororok bai choba nang phainai.

¹⁷“Khunju tong khe ba Phola motharokno samano khna di. “Kwplai wngnairokno ang khatiui tonmani mannano rwnai. Ang bórok jotono’-no holong kuphurbo tháisa tháisa rwnai, aro mung kwtal swijak tongo, abono mannai borok simi se saui mano, tei khoroksa phano man ya.”

¹⁸“Thuatirani mothani suarino hai hwnwi swihor di: “Kaitorni Sajla o kókno sa-o, bini mokol hórjlai hai jlai jlai, bini yakung pitol hujak hai kwchẃng.

¹⁹Nwng khlaimarokno ang saui mano. Nwng hamjakmano, nwng kwrak khe tongmano, nwng samung khlaimano, nwng khá lokmano ang saui mano. Ang saui mano nwng swkangni slái tabuk samung khlai kugo.

²⁰Hai phano ang nono o kók tháisa hwnna tongo: Sakno Kaitorni diyarijwk hwnwi hwnnai a bwrwi Jesebelno nwng soi kha. Bo ani selengrokno buitali-buitala wngnani, phiya takjak mwtaini thani barokmano chána phrwngwi lama koró rw-o.

²¹Ang bono sumsok yakarna jora rw kha, hai phano bo buitali tongmungno yakarna nai ya.

²²Aboni bagwi ang bono thongaro khiklainai, phiya bo bai baksa lupcha wngnairokno belai sátoknai. A lupcharok bo bai baksa samung hamya khlaimani yakar ya khe ang tabuk abo hai khlainai.

²³Ang bini bororoknobo butharnai, hai khe se bororok uansukmarok bai muchungmarokno ang saui mano hwnwi bebak motha saui man anw. Ang norokno jotono’-no norok khlai tẃi’-no yagul su anw.

²⁴“Phiya Thuatira-o tongnai norokni bere teirok o hamya phrwngma tẃi tong li ya; a bororok ‘Soitanni bisingni kók’ hwnmano norok srwng li ya. Ang norokno o kókno sa-o, ang norokno tei poja phin li ya.

²⁵Tamo khe ang phai ya sak norokni thani tongmano kwrak khe romwi tong di.

²⁶Thwi ya sak ang muchung tẃi khlaiwi tongnai kwplainairokno ang Aphani thani manmani phanno rwnai. Ang bórokno dopharokni bokhorok snamnai, bórok dopharokno sorni raidang bai kók khna rwnai, phiya hani manwi hai khe bórokno swbainai. Ang bórokno aitorma athukirinobo rwnai.

²⁹“Khunju tong khe ba Phola motharokno samano khna di.”