Read Kok Borok PHUNUKJAKMANI 20 Bible Online

PHUNUKJAKMANI 20 - Kok Borok bible

PHUNUKJAKMANI 20

¹Aphuru ang suari khoroksano chuknohani ongkhorwi phaima nuk kha; bini yago hakhorni surani bai sorni dwkhwi kotorma tẃijak.

²Bo a dragonno romwi nokha bisi sasaini bagwi kha kha, a dragon wng kha agini a chibuk, bono Debilbo hwno, Soitanbo hwno.

³Nokha bisi sasai lái ya sak bo dopharokno tei lama koró rwui man ya tẃi khe a suari bono hakhoro khiklaiwi tala rwui sil bu-ui rw kha. Nokha bisi sasai lái khe bo srapsani bagwi khengwi ma rwjaknai.

⁴Aphuru ang achukthayungrok nuk kha, aro achugwi tongnairoknobo nuk kha; bórok buj thumna bagwi berjak kha. Kaitorni kók tei Jisu si rwmani kók pírma bai bokhorok tanjaknairokni pholanobo ang nuk kha. Bórok a yabrwino khulum ya, bini mangtangnobo khulum ya, bórok talikha-o eba yago bini marinobo bujak ya. Bórok thangcha kha, hakhe Khristo bai baksa nokha bisi sasaini bagwi bugra wngwi tong kha.

⁵(Tei kwthwi tongnairok nokha bisi sasai lái ya sak thangcha glak.) Abono puila kwthwirokno mwthangwi tisa gramani.

⁶Swkang mwthangwi tisajaknairokni bisingo khopjaknairok bórok hamchajak, bórok Kaitorni borok se. Bórok tei thwina nang glak kha; bórok Kaitor bai Khristoni ochai wngnai, bórok nokha bisi sasai bo bai baksa bugra wngwi tongnai.

⁷Nokha bisi sasai lái khe Soitan chobwi tongmani phiyókjaknai,

⁸hakhe bo swngchar gwnangwi tongnai dopharokno lama koró rwna bagwi ongkhorwi thángnai, abo wng kha Gok bai Magok. Soitan bórok bebakno chobani bagwi kwrẃngsa-o thumnai, bórok twijlang rukungni hasing swk báng anw.

⁹Bórok haktor gwnangwi pírjagwi Kaitorni bororok tongthai tei Kaitor hamjakmani a taunno chorsa khe khobwi pái kha. Tamo khe Kaitorni aroni chuknohani hór ongkhorwi phaiwi bórokno sógwi sokomor kha.

¹⁰Hakhe bórokno lama koró rwnai Soitan a yabrwi bai a diyari phatra khiklaijakmani a hór bai gwndwkni liko khiklaiwi rwjak kha, aro bórok mol brúm brúm hopung sapung sátokjak phlai máng tongnai.

¹¹Ang aphuru achukthayung kuphur kotorma kaisano nuk kha, aro achugwi tongnainobo nuk kha. Ha bai nokha bini bwskangni khár kha, hakhe tei nukjak li ya.

¹²Ang achukthayungni bwskango kwthwirokno, tamo kusu tamo kotor, jotono’-no Kaitorni bwskango bachajak nuk kha. Bijaprok pheheljak kha, ulo tei kangsa bijapbo pheheljak kha, abo wng kha Langma Bijap. Kwthwirok bórok samung khlaima tẃi’-no buj thumjak kha, bijaprogo swijak tongma tẃi’-no buj thumjak kha.

¹³Hakhe twijlang bini aroni kwthwirokno yapharwi rw kha. Kwthwirokni hani bugra bini ha-o tonmani kwthwirokno yapharwi rw kha. Hakhe jotono samung khlaima tẃi’-no buj thumjak kha.

¹⁴Hakhe kwthwirokni hani bugra bini ha bai baksa hórni liko khiklaiwi rwjak kha. (O hórni liko khiklaijakmani abo’-no tei uáisa thwimani.)

¹⁵Langma Bijabo bumung kwrwirok bórok hórni liko khiklaiwi rwjak kha.