Read Kok Borok PHUNUKJAKMANI 21 Bible Online

PHUNUKJAKMANI 21 - Kok Borok bible

PHUNUKJAKMANI 21

¹Aphuru ang ha kwtal bai nokha kwtal nuk kha. Swkangni ha bai swkangni nokha kwmaui tháng kha, twijlangbo kwrwi kha.

²Ang Jerusalem Kwtal Taun Kwtharno chuknohani Kaitorni aroni ongkhorwi phaima nuk kha, hamjwk kwtal hai khe kanwi chumui tiyar wngwi bwsai bai malaina phaima hai khe ongkhorwi phaima nuk kha.

³Ang achukthayungni sotonwi hai hwnwi sama khna kha, “Tabuk Kaitor borok bai tongo. Bo bórok bai tongnai, phiya bórok bini borok wngnai. Kaitor sakphang’-no bórok bai tongnai, bo bórokni Kaitor wngnai.

⁴Bo bórokni mokolni bebak muktwi hu-ui rwnai. Bórok tei thwina nang glak, muisubuk chaui kapna nang glak, bwsakrok sajakna nang glak. Agi tongmani bebak’-no kwma bai kha.”

⁵Aphuru achukthayungo achugwi tongnai hai hwnwi sa kha, “Tabuk ang bebakno kwtal khlainai.” Bo ano hai hwnwibo sa kha, “O kókno swi di, tamni hwn ba o kókrok kubui, poitobo khlaiwi mano.”

⁶Bo teibo sa kha, “Pái súk kha! Angno Alpha, angno Omega, angno Yaphang, angno Buchuk. Twi kangjaknai borokno ang mwthangnai twimukni twino ahaino khannai.

⁷Kwplai wngnai borok bo ani thani omono mannai; ang bini Kaitor wngnai, bo ani angsa wngnai.

⁸Tamo khe kirinairok, poito kwrwirok, selengmasingcha samung khlainairok, borok butharnairok, buitali-buitala wngnairok, dandabaji phunuknairok, takjak mwtaino khulumnairok tei bebak tatalrok hwn khe bórok hór bai gwndwkni liko ma tongnai, abo’-no tei uáisa thwimani.”

⁹Páithakni birman kaisni twk tháisni kupulung tẃijak suari khoroksnini bere khoroksa ani thani phaiwi hai hwnwi sa kha, “Phai di, ang nono Mera bwsani bihik, a Hamjwk kwtalno phunuk anw.”

¹⁰Ang Phola bai koboljak kha, hakhe a suari ano hathái kuchukni buchugo tlang kha, a hathái belai kotor. Bo ano Jerusalem a Taun Kwtharno chuknohani Kaitorni aroni ongkhorwi phaima phunuk kha,

¹¹abo Kaitorni chẃngsacha bai chẃngsajak. A taun moni hai kwchẃng, jaspar holong hai kwchẃng, aina hai kwchẃng.

¹²Abo duglam chiknwi gwnang, chokdeual kotorma kuchuk khe rwjak, suari chiknwirok a duglamo bacha laijak. Duglam mathe’-no Israilrokni chiknwi bosongni mung swijak.

¹³Babai brúm brúm’-no duglam lamtham lamtham, salkabai-o lamtham, salsibai-o lamtham, salgrabai-o lamtham, salthángbai-o lamtham.

¹⁴Taunni chokdeual holongdap chiknwi saka tisajak, holongdap mathe’-no Mera bwsani chonghor chiknwini mung swijak tongo.

¹⁵Ang bai kók sanai suarini yago a taunno sunani, duglamrokno sunani tei chokdeualno sunani bagwi rangchakni sujaknai raidang kongsa tongo.

¹⁶A taun busup subrwi, kebeng kosong thansa’-no. A suari bini sujaknai raidang bai a taunno su kha; abo mail 2,500 kolok, kebengbo aswkno, kuchukbo aswkno.

¹⁷A suari chokdeualnobo su kha, abo muk 144 kuchuk, a suari sumano rwgwi borokni yak baino aswk ká-o.

¹⁸A chokdeual jaspar holong bai snamjak, taun khe aina hai kwchẃng rangchak kaham bai snamjak.

¹⁹A taunni chokdeual holongdap saka tisajak, holongdap podrepot monirok khopjak, kaisa holongdap khe jasparni, tei kaisa khe sapirni, tei kaisa khe agatni, tei kaisa khe emarladni,

²⁰tei kaisa khe oniksni, tei kaisa khe karnilianni, tei kaisa khe kormo kuatsni, tei kaisa khe berilni, tei kaisa khe topasni, tei kaisa khe khalsedonini, tei kaisa khe turkoisni, tei kaisa khe ametisni.

²¹Duglam chiknwi khe muktani; joto duglam’-no mukta kolsa kolsa bai snamjak. Taunni lama khe rangchak kaham bai snamjak, abo aina hai kwchẃng.

²²Ang a tauno nokthar khungsa phano nuk li ya, tamni hwn ba aboni nokthar wng kha Kwplaisa Subrai Kaitor bai Mera bwsa.

²³A taunno salbo kasana nang ya, talbo pirna nang ya, tamni hwn ba Kaitorni chẃngsacha’-no aro chẃngwi tongo, Mera bwsa’-no aroni chati.

²⁴Swngcharni bororok aboni pohor bai himnai, swngcharni bugrarok bórokni rang-mairok aro tubunai.

²⁵Taunni duglamrok sapung phiyokjak máng tongnai, abórok uáisa phano sojak glak, tamni hwn ba aro hor wng glak.

²⁶Dopharokni chẃngsacha-sangsacha bai rang-mairok a tauno tubujaknai.

²⁷Hai phano mungsa hamya phano a tauno sitokjak glak, selengmasingcha samung khlainairok eba khe tatal sanairok khoroksa phano aro ma hap glak. Mera bwsani Langma Bijabo mung tisajakrok simi se aro ma hapnai.