Read Kok Borok PHUNUKJAKMANI 22 Bible Online

PHUNUKJAKMANI 22 - Kok Borok bible

PHUNUKJAKMANI 22

¹A suari ano twimanobo phunuk kha, a twimani twino bororokno mwthangnai, abo aina hai kwchẃng. A twima Kaitor bai Mera Bwsani achukthayungni ongkhorwi phaiwi

²Taunni lama kwchar tẃi boui tháng kha. A twimani twi rukung babai nwnwi’-no mwthangnai buphang tongo, abo bisi brúm brúm uái chiknwi khe thái-o, tal brúm brúm uáisa khe thái-o; aboni bwláirok dopharokno ham rwna bagwi se.

³A tauno Kaitorni swraimung nangjak mungsa phano tong glak. Kaitor bai Mera Bwsani achukthayung a tauno tongnai, phiya bini selengrok bono surinai.

⁴Bórok bini mwkhang nuknai, phiya bórokni talikha-o bini mung swijak tongnai.

⁵Aro tei hor wng phlai glak, bórok aro chatini samung nang glak, salni samungbo nang glak, tamni hwn ba Subrai Kaitor bórokni pohor wngnai, bórok bugra wngwi tong phlainai.

⁶Aphuru a suari ano hai hwnwi sa kha, “O kókrok kubui’-no, poitobo khlaiwi mano. Diyarirokni thani bini Pholano rwnai Subrai Kaitor dakti’-no tamo tamo wngno bini selengrokno phunukna bagwi bini suarino rohor kha.”

⁷Jisu hai hwnwi sa-o, “Khna di, ang dakti’-no phainai. O bijapni kók diyarirokno rákhoknairok bórok hamchajak!”

⁸Ang Johon omorokno bebakno nubo nuk kha, khwbo khna kha. Ang omorokno khna bai khe’-no nuk bai khe’-no omorokno phunuknai suarino khulumna bagwi bini yakung yaphango pwtapsa klai kha.

⁹Hakhe bo ano hai hwnwi sa kha, “Ano ta khulum di. Ang nwng bai baksa seleng se, nini takhuk diyarirok tei o bijapni kókno rákhoknairok bórok bai baksa seleng se. Kaitorno se khulum di.”

¹⁰Bo ano hai hwnwibo sa kha, “Nwng o bijapni kók diyarirokno khogwi ta ton di, tamni hwn ba omorok nang phainani kasu kha.

¹¹Borok hamya bo hamya máng khlaiwi tong thung, tongmung sitra bo sitra khe máng tong thung; borok kaham bo kaham khe máng tong, thung borok kwthar bo kwthar khe máng tong thung.”

¹²Jisu hai hwnwi sa kha, “Khna di, ang dakti’-no phainai. Ang rwna hwnmarokno tubunai, hakhe borok samung khlaima tẃino jotono’-no rwnai.

¹³Angno Alpha, angno Omega, angno Yaphang angno Buchuk, angno puila angno páithak.”

¹⁴Rí súnairok bórok hamchajak, bórok rí súma bai a mwthangnai buphangni bwtháino cháui mannai, bórok duglam tẃi tauno habwibo mannai.

¹⁵Phiya selengmasingcha samung khlainairok dandabaji phunuknairok, buitali-buitala wngnairok, borok butharnairok, takjak mwtaino khulumnairok, samungobo kógobo tatal wngnairok bórok taunni phataro ma tongnai.

¹⁶“Ang Jisu norok motharokno omorokno sana bagwi ani suarino rohor kha. Ang Daud bosongni; ang aitorma kwchẃng.”

¹⁷Phola bai Hamjwk kwtal “Phai di!” hwnwi sa-o. O kók khnanairok joto’-no “Phai di!” hwnwi ma sanai. O twi kangnai borok, phai di. O twi nungna muchungnai borok, mwthangnai twino ahai’-no nung phai di.

¹⁸O bijapni kók diyarirokno khnanairok jotono’-no ang Johon hai hwnwi hus khe rw-o: Khoroksa phano o kókrok bai tei kók tháisa swk phano thepa khe Kaitor bono yagul su phuru o bijabo swijak tongmani birmanroknobo phnangnai.

¹⁹Phiya khoroksa phano o bijapni kók diyarirokni tháisa swk kók phano swkwma khe Kaitor o bijabo swijak tongmani bwtháino bui bai baksa bono chá rw glak, phiya o bijabo swijak tongmani taunobo bui bai baksa bono hap rw glak.

²⁰O kókrok bebak’-no kubui se hwnwi sanai bo hai hwnwi sa-o, “Kubui’-no, ang dakti’-no phainai!” Amen. Subrai Jisu nwng phai di!

²¹Subrai Jisu bebakno khairok thung. Amen.