Read Kok Borok PHUNUKJAKMANI 3 Bible Online

PHUNUKJAKMANI 3 - Kok Borok bible

PHUNUKJAKMANI 3

¹“Sardini mothani suarino hai hwnwi swihor di: “Kaitorni aroni phola kaisni bai athukiri kolsni tẃijak a borok o kókno sa-o. Nwng khlaimarokno ang saui mano; ang saui mano bororok nono kwthang hwno, hai phano nwng kwthwi.

²Abo bai’-no sicha di, tabuk phano nini thani tongmano kwma bai ya sini rak rw di, tamni hwn ba ang nuk kha nwng khlaimani abo ani Kaitorni mokolo sói wng súk ya kho.

³Hakhe norok phrwngjagwi khnamano uansugui nai di; abono rákhogwi tong di, sumsok yakar di. Nwng sicha ya khe ang nini thani sikhok hai khe phainai, ang buphuru phaino norok sauibo man glak.

⁴Hai phano Sardini nini bororokni bere baksa rí kuphur khe ton kha. Bórok kuphur kanwi ang bai himnai, tamni hwn ba bórok himna chúgo.

⁵Kwplai wngnairok abo hai rí kuphur kan rwjaknai, ang bórokni mungno Langma Bijapni hu-ui khibi glak, ani Aphani bwskango tei bini suarirokni bwskango bórok ani borok se hwnwi gosinai.

⁶“Khunju tong khe ba Phola motharokno samano khna di.”

⁷“Philadelphiani mothani suarino hai hwnwi swihor di: “Daudni surani tẃiwi tongnai a borok kwthar, a borok kubui o kókno sa-o. Bo phiyok khe khoroksa phano soui man ya, bo so khe khoroksa phano phiyogwi man ya.

⁸Nwng khlaimarokno ang saui mano. Ang saui mano nini kisa phan tongo, ang phrwngmano nwng khnaui tongo, nwng ano poito khlai ya wng ya. Ang nini bwskango duglam phiyogwi rw kha, abono khoroksa phano soui man glak.

⁹Khna di, Soitanni a bororok hwn khe, Judai wng yaui’-no chwng Judai hwnwi hwnnairok hwn khe ang bórokno nini thani tubu-ui nini yakung yaphango klai khulum rw anw. Hakhe ang nono hamjakmano bórok saui man anw.

¹⁰Ang dagima hai’-no nwng khá logwi tongma bai o swngcharni bebak borokno amjokna bagwi swngchar gwnangwi tekto nang phuru angbo nono tektoni yakni kati rw anw.

¹¹Ang dakti’-no phainai. Kwplai wngwi motok mannano khoroksa phano segwi man ya tẃi khe nini thani tongmano kaham khe ton di.

¹²Kwplai wngnai borokno ang ani Kaitorni noktharni thongla snamnai, bo aroni tháng phlai glak. Ang bini saka ani Kaitorni bumung swinai, ani Kaitorni taunni bumungbo swinai; a taun wng kha Jerusalem kwtal, abo chuknohani ani Kaitorni aroni ongkhorwi phainai. Ang bini saka ani mung kwtalbo swinai.

¹³“Khunju tong khe ba Phola motharokno samano khna di.”

¹⁴“Laodikiani mothani suarino hai hwnwi swihor di: “Amen o kók sa-o, bo kaham khe kók kubui sanai, Kaitorni snammarokni bere bo se yaphang.

¹⁵Nwng khlaimarokno ang saui mano. Ang saui mano nwng kwchang buya, kutung buya. Nwng mungsa ya khe mungsa wng thung ang bwswk se naimani!

¹⁶Nwng tung lwlwk, kutung buya, kwchang buya, aboni bagwi ang nono búkhúkni ongkhlaiwi khibinai!

¹⁷‘Ang mai gwnang, rang gwnang, ani biyal kwrwi,’ hwnwi nwng sa-o. Tamo khe nwng saui man ya nwng bwswk talikha hamya, bwswk khairok susuk! Nwng kwrwi, nwng sak lánga, nwng phula.

¹⁸Aboni bagwi ang nono hai hwnwi sa-o, gwnang wngna bagwi ani thani sói rangchak pai di. Kanna bagwi ani thani rí kuphurbo pai di, hakhe nini lachimasingcha bwsak kholop di. Nini mokolo rwna bagwi mokol nukna tẃi khe ani thani bithibo pai di.

¹⁹Ang hamjakma bororokno khobo khorai-o, bubo bu-o. Hakhe kaichomwi sumsok yakar di.

²⁰Khna di, ang duglamo bachaui dugar bu-o; ani khorang khnaui khoroksa swk duglam phiyogwi rw khe ang bini nogo hapnai, hakhe ang bo bai chánai, bobo ang bai chánai.

²¹Ang kwplai wngwi ani Apha bai baksa bini achukthayungo achugwi tongma hai angbo kwplai wngnairokno ang bai baksa ani achukthayungo achuk rwnai.

²²“Khunju tong khe ba Phola motharokno samano khna di.”