Read Kok Borok PHUNUKJAKMANI 7 Bible Online

PHUNUKJAKMANI 7 - Kok Borok bible

PHUNUKJAKMANI 7

¹Aboni ulo ang nuk kha, haktoro, twijlango tei buphang phangsa-o phano nokbar sibwi nang ya tẃi khe haktorni babai brwi nokbarno rom laiwi suari khorokbrwi haktorni babai brwi-o bacha laijak.

²Hakhe ang tei khoroksa suarino Kaitor kwthangni sil tubu-ui salkabaini kasaui phaima nuk kha. Kaitor haktor bai twijlangno dera rwna hwnwi phan rwmani a suari khorokbrwino bo sotonwi hai hwnwi ring kha,

³“Chwng Kaitorni selengrokno talikha-o sil buya sak haktorno, twijlangno eba buphangrokno ta dera rw khu di.”

⁴Hakhe talikha-o a sil bujaknairok bwswk báng abo ano saui khna rw kha; abo khorok 1,44,000. Israilni joto bosongni bororok’-no aro tongo.

⁵Juda bosongni khorok 12,000 borok; Ruben bosongni khorok 12,000 borok; Gad bosongni khorok 12,000 borok;

⁶Aser bosongni khorok 12,000 borok; Naptali bosongni khorok 12,000 borok; Manase bosongni khorok 12,000 borok;

⁷Simon bosongni khorok 12,000 borok; Lebi bosongni khorok 12,000 borok; Isakar bosongni khorok 12,000 borok;

⁸Jebulun bosongni khorok 12,000 borok; Josep bosongni khorok 12,000 borok tei Benjamin bosongni khorok 12,000 borok sil bujak bai kha.

⁹Aboni ulo ang naisigwi nai ba borok kwbángma, aswk bororokno kebo lekha bai ya! Aro joto hani, joto bosongni, joto dophani tei joto kókni borok tongo; bórok rí kuphur kan laijak khe yago khajuri bedek tẃi laiwi achukthayung bai Mera bwsani bwskango bacha laijak.

¹⁰Bórok sotonwi hai hwnwi chirikhók lai kha, “Achukthayungo achugwi tongnai Kaitor bai se tei Mera bwsa bai se chwng mwthangjago!”

¹¹Suarirok bebakno a achukthayungno, okrarokno tei a makbrwirokno chorsa khe bacha lai kha. Hakhe bórok a achukthayungni bwskango pwtapsa klaiwi hai hwnwi saui Kaitorno khulum lai kha,

¹²“Amen! Elem bai phan mol brúm brúm chini Kaitorni se! Chini Kaitor mol brúm brúm chẃngsacha khe kwplai wng thung, bo mol brúm brúm lobjak thung, hambai rwjak thung, bórijak thung! Amen!”

¹³Aphuru okrarokni bere khoroksa ano hai hwnwi sẃng kha, “O rí kuphur kanjakrok bórok sabo gwja? Bórok buroni phai baimani gwja?”

¹⁴“Hodasa, ang abo saui man ya, nwng se saui mannai,” hwnwi ang sa kha. Bo ano hai hwnwi sa kha, “O bororok belai sátokjakmani bising tẃi kaham kwrwng khe sók phainairok se. Bórok Mera bwsani thẃi bai rírokno sú-ui kuphur khlai kha.

¹⁵Aboni bagwi’-no bórok Kaitorni achukthayungni bwskango bacha laiwi bini noktharo hor sal bini samung khlai laijak. A achukthayungo achugwi tongnai bo bórok bai tongwi kaham khe nainai.

¹⁶Bórok tei okbo khui phlai glak, twibo kang phlai glak; salbo bórokno khampra rwui man glak, mungsa hop hop kutungbo khampra rwui man glak.

¹⁷Tamni hwn khe achukthayung kwcharo tongnai a Mera Bwsa bo se bórokno mwrwgwi twimuk kwthang bwkhak tlangnai. Kaitor se bórokni mokolni joto muktwi hu-ui rwnai.”