Read Kok Borok PHUNUKJAKMANI 8 Bible Online

PHUNUKJAKMANI 8 - Kok Borok bible

PHUNUKJAKMANI 8

¹Mera bwsa kaidokni ulni a silno swkak khe’-no chuknoha srapsani bagwi siring siring wngwi tong kha.

²Aphuru ang Kaitorni bwskango tongnai suari khoroksnino nuk kha; bórok totro kongsni yapharjak kha.

³Rangchakni dugol tẃijak tei khoroksa suari phaiwi háyá bwskango bacha phai kha. Bo Kaitorni bebak bororok suri san thani thansa khe achukthayungni bwskango rangchakni háyá-o satrai sókna bagwi satrai kwbángma rwjak kha.

⁴Kaitorni bororok suri sanmani bising tẃi a satrai khammani hoku suarini yakni Kaitorni aro sógwi kha.

⁵Aphuru a suari a dugolno naui háyáni hór naui supungwi abono ha-o khiklai rohor kha. Hakhe phirang kok kha, gurum kha, nokha philik kha tei bangla phai kha.

⁶Aphuru totro tẃijak suarirok abono tam laina tiyar wng lai kha.

⁷Suarirokni bere khoroksa totro tam kha, hai khe’-no thẃi dalokjak hór bai kothor ha-o klai kha. Haktorni khakthamni khaksa khamwi tháng kha, buphangroknibo khakthamni khaksa khamwi tháng kha, phiya bebak jabrarok khamwi tháng bai kha.

⁸Aphuru khoroksani ulni a suari bini totro tam kha. Hakhe hathái kotorma khamwi tongjak hai twijlango khiklaijak kha. Twijlangni khakthamni khaksa thẃi khaui tháng kha,

⁹twijlangni kwthang tongnairokni khakthamni khaksa thwi bai kha tei rungtorrokni khakthamni khaksa sokomorjak kha.

¹⁰Aphuru khoroknwini ulni a suari bini totro tam kha. Hakhe homchang hai jlai jlai athukiri kotorma kolsa nokhani klaiwi twimarokni khakthamni khaksa-o tei twimukrogo klai kha.

¹¹(A athukirini mung “Kwkha.”) Twirokni khakthamni khaksa kwkha wng kha, abo kwkha wngma bai abono nungwi borok kwbángma thwi bai kha.

¹²Aphuru khorokthamni ulni a suari bini totro tam kha. Salni khakthamni khaksa bujak kha, talni khakthamni khaksa tei athukirirokni khakthamni khaksa abo hai’-no bujak kha, hakhe abórokni chẃngmani khakthamni khaksa kwmaui tháng kha; salni khakthamni khaksa pohor wng li ya, hornibo khakthamni khaksa pir li ya.

¹³Aphuru ang toling masano nokha-o birwi tongma nuk kha, bono sotonwi hai hwnwi sama khna kha, “Omai-o, Omai-o! A tei khoroktham suarirok totro tamna naiwi tong kha, totro pung phuru haktoro bebak tongnairokni bwswk se kirimasingcha wngno!”