Read Kok Borok PHUNUKJAKMANI 9 Bible Online

PHUNUKJAKMANI 9 - Kok Borok bible

PHUNUKJAKMANI 9

¹Aphuru khorokbrwini ulni a suari bini totro tam kha. Ang athukiri kolsano nokhani ha-o klaijak nuk kha. Bini yago hakhorni surani rwjak kha.

²A athukiri a hakhorno phiyok kha, hakhe thapa kotorni hoku hai a bisingni hoku ongkhorwi phai kha. A hakhorni hoku bai sal bai nokha suda kosom wng kha.

³Kúkthorarok a hoku bisingni ongkhorwi haktoro phai bai kha, sindrairokni phan bórok rwjak kha.

⁴Bórokno hai hwnwi sajak, “Haktorni jabra eba buphang uáphang ta dera rw di, talikha-o Kaitorni sil bujak ya abo tẃi bororokno simi dera rw di.

⁵A bororokno ta buthar di, nokha talba jora uákhak-sukhak di.” A kúkthorarok uákhak-sukhagwi samani abo sindrai uárwi sama hai.

⁶A nokha talba jora le a bororok thwina ma naituknai, tamo khe man glak; bórok thwina nainai, tamo khe thwina lama man glak.

⁷A kúkthorarokno choba-o thángna hwnwi tiyar wngjak korairok hai nugo; bórokni bokhorogo rangchakni motok hai, bumukhangbo borokni bumukhang hai.

⁸Bwkhnai hwn khe bwrwirokni bwkhnai hai, bua hwn khe singhoni bua hai.

⁹Sorni khaklap katijaknai hai bai bórokni khaklap khopjak, phiya bórokni bwkrang pungmani hwn khe choba-o korai kwbángma korai malkhung soui khachigwi thángmani khorang hai.

¹⁰Sindrairokni hai bóroknibo khitung bai bwlwisa tongo, hakhe bórokni khitung bai simi’-no bórok nokha talba jora bororokno lengsa rwui tonwi mano.

¹¹Bóroknibo bugra tongo, abo hakhorni barja berjak a suari. Bini mung Hibru kók bai hwn khe Abadon; Grik kók bai hwn khe Apolion, (omo “Sokomornai” hwnma se).

¹²Kirimasingcha kaisa lái gra kha; aboni ulo tei kwnwi kirimasingcha wngna tong kho.

¹³Aphuru khorokbani ulni a suari bini totro tam kha. Ang Kaitorni bwskangni a rangchakni háyá bwkhakrokni kók sama khna kha.

¹⁴Khorokbani ulni a totro tẃijak a suari hai hwnwi sajak kha, “Uphratis twima kotoro khajagwi tongnai a suari khorokbrwirokno phiyógwi rwui di!”

¹⁵Hakhe a suari khorokbrwirok phiyógwi rwjak kha; swngcharni bororokni khakthamni khaksano butharna hwnwi bórokno tiyar khlaiwi tonjak, o jora-o’-no, o salono, o talo’-no tei o bisi’-ono butharna hwnwi bórokno tiyar khlaiwi tonjak.

¹⁶A sengkrak korai bwswk báng abo ano saui khna rw kha: bórok nwira-chirasai ká-o.

¹⁷Ang nukmani korairok bai a korai kasanairok wng kha ahai: Bórok khaklap katijaknai gwnang, abo hór hai kwchak, sapir holong hai kwkhrang, gwndwk hai kormo. A korairokni bokhorok hwn khe singho bokhorok hai, phiya hór, hoku tei gwndwk bórokni búkhúkni ongkhorwi phai-o.

¹⁸Korairokni búkhúkni ongkhorwi phaimani hór, hoku tei gwndwk o birman kwtham bai’-no swngcharni bororokni khakthamni khaksa butharjak kha.

¹⁹Tamni hwn ba a korairokni phan búkhúgo se, khitungobo tongo. Bórokni khitung chibuk hai se bokhorok gwnang, abo bai’-no bororokno leng rw-o.

²⁰O birmanrok bai butharjak yaui tong rwknai tei bororok hwn khe bórok takmarokno yakar ya. Bórok mwtai hamyarokno khulum laima thak ya kho, rangchakni, rukphaini, pitolni, holongni tei buphangni mwtairokno khulum laima thak ya kho, aile abórok mokolbo nuk ya, khunjubo khna ya, himwibo man ya se.

²¹A bororok bórok borok butharmarokno, danda khlaimarokno, buitali-buitala wngmarokno eba bórok khokmarokno tẃiwi khá chingsa phano wngjak ya.