Read Kok Borok RUT 2 Bible Online

RUT 2 - Kok Borok bible

RUT 2

¹Boas hwnwi rang gwnang tei buino kók khna rwui mannai borok Noamini sandai khoroksa tongo. Bo wng kha bini bwsai Elimelekni bosongni borok.

²Salsa Rut Noamino hai hwnwi sa kha, “Ang barli ranairok karwi klangmarokno kheto-o thángwi thumwi anw. Hakhe ang khoroksa swkni aro le samung tangnani man anw.” Noami hai hwnwi sa kha, “Hakhe tháng di, sajwkma.”

³Hakhe Rut kheto phaising tháng kha tei ranairokni uklok uklok him kha, bórok karwi klangmarokno thum kha. Tháng te tháng te bo Boasni kheto-o sógwi kha.

⁴Salsa khe Boas Betlehemni phaiwi sók phai kha, hakhe samung tangnairokno hai hwnwi sa kha, “Subraiyung norok bai tong thung,” hakhe bórok hai hwnwi sa phi kha “Subraiyung nono hamari rw thung.”

⁵Hakhe Boas samung tangnairokni bokhorokno hai hwnwi sẃng kha, “O bwrwi sikla le sabo wng kha?”

⁶A borok sa kha, omo wng kha buini hani bwrwi, Noami bai phainai Moabjwk se.

⁷Bo a bwrwino samung tangnairok bai pal kheno barli thum di hwnwi sa kha. Phung aidropni simi bo samung tangmani tabuk le bo lenglana bagwi kainogo bathagwi kha.

⁸Hakhe Boas Rutno hai hwnwi sa kha, “Ang nono kisa kókbiti sa anw, nwng o khetono karwi tei kubun kheto-o ta thumwi di. Orono bwrwirok bai khe samung tang di.

⁹Bórok bai’-no tong di. Ang ani bororokno dagiui rw kha, khoroksa phano nini sak ta tang thung. Tei nwng twi kang khe bórok khókmani tilokni twino thángwi nungwi di.”

¹⁰Rut ha-o bolokhógwi botok khe khulumui Boasno hai hwnwi sa kha “Nwng tamo ano aswk khá súk lang? Buini hani bwrwino nwng tamo aswk khairoknaba ma nang lang?”

¹¹Boas hai hwnwi sa kha, “Nwng nini nwsai thwi phuruni simi nwkrajwkno bwswk tamo khlai kha bebakno khna kha. Ang si-o, nwng bahai khe nwma, nwpha tei sakni hano khibiui uáisabo nuk ya kho omo hai bororok bai tongna hwnwi phai kha.

¹²Nini samungni bagwi Subraiyung nono sokat rw thung. Israilni Subraiyung Kaitorni thani khorok bomna phaima ba nwng bini bebak sokat man si thung!”

¹³Hakhe Rut hai hwnwi sa kha, “Nwng ano belai khe khairok kha, nokphangsa, nwng ano kók kwchang saui belai khe khá srang rw kha, hai phano ang le nini seleng khoroksa hai phano se wng ya.”

¹⁴Cháma jora-o khe Boas Rutno hai hwnwi sa kha, “Phai di, auan lepsa na phai di tei bwtwi-o chomsaui na di.” Hakhe bo samung tangnairok bai baksa achuk kha, Boas bono bwchlwi yókjak kisa rwui rohor kha. Rut ok pung yasakno chá kha tei bo cháma bára man rwk kha.

¹⁵Tei bo barli thumna tháng kheno Boas samung tangnairokno hai hwnwi dagiui rw kha, “Rajak ya tongmarogo suda bono thum rw di, bono ta lachi rw di.

¹⁶Hakhe aboni bisingo bo thumwi nana bagwi ra yaui kwbángma karwi klang di, bono mungsa ta hwn di.”

¹⁷Hakhe Rut sanja wng yasakno thum máng tong kha tei ulo nai khe nuk kha abo kilo kaichi swk ká khna.

¹⁸Bo kamiyungo thángwi thummani a barlino bwkrajwkno phunugui kha. Bo cháui bára tongmanobo bwkrajwkno rw kha.

¹⁹Noami bono hai hwnwi sẃng kha, “Nwng omo aswk buroni thum kha? Nwng saboni kheto-o samung tangwi kha? Subraiyung nono khá súknai borokno hamari rw thung.” Hakhe Rut Noamino hai hwnwi sa kha, “Boas hwnwi borok khoroksani kheto-o se ang samung tangwi-o.”

²⁰“Subraiyung Boasno hamari rw thung, Subraiyung, kwthang tongnai tei thwi thángnai bebakno kók rwmano’-no narwgo” hwnwi Noami sa kha. Hakhe bo hai hwnwi sa kha, “A borok wng kha chini sampha kukni sandai se, bo’-no chini barja nana klaimarokni bere khoroksa.”

²¹Hakhe Moabjwk Rut hai hwnwi sa kha, “Bo ano teibo sa kha, bini aroni ra bai ya sakno ang bórok bai tongwi thumwi mano.”

²²Noami bahamjwk Rutno hai hwnwi sa kha, “I’n sajwk, nwng Boasni kheto-o bini selengjwkrok bai samung tangwi kheno hamnai. Nwng tei kubunni kheto-o thángma te romphre-sophre phano se khlaijak kha mun.”

²³Hakhe Rut bórok bai’-no barli ra bái yasakno aro samung tangwi kha tei bo bwkrajwk bai’-no tongwi kha.