Read Kok Borok RUT 4 Bible Online

RUT 4 - Kok Borok bible

RUT 4

¹Boas kamiyungni duglamni kuthum laima nogo thángwi achugwi kha. Hakhe Elimelekni sampha kuk sandai, Boas samani a chwla aboni gana tẃi phai khe Boas bono hai hwnwi ring kha, “Phai gra di, oro achuk phai di takhuk.” Hakhe bo aro thángwi achugwi kha.

²Hakhe Boas kamiyungni khorokchi tẃiphangrokno aro ringwi tubu-ui achuk rw kha. Bórok achuk khe,

³bo bini sandaino hai hwnwi sa kha, “Tabuk Noami Moabni kiphilwi phai kha, bo tabuk chini sandai Elimelekni khetono phalna hwnwi nai-o,

⁴tei ang chongo norok omono sithai. Hakhe tabuk, nwng omono nai khe tabuk nwng oro achugwi tongnai bororokni bwskango’-no pai di. Tamo khe nwng na ya hwn khe ba sa di, tamni hwn ba nwng’-se swkang paina klaimaba, aboni ulo se ang paiwi mano.” “Ang painai,” hwnwi a borok sa kha.

⁵Boas hai hwnwi sa kha, “Ham kha, tamo khe nwng Noamini kheto pai khe, nwng Rutnobo paina klai-o, abo wng kha Moabni bwrwi randijwk; hakhe a kheto a thwinaini núkhungni’-no tongma klai-o.”

⁶A borok hai hwnwi sa kha, “Abo hai hwn khe le ang paina klai phano pai li ya, tamni hwn ba abono ani bwsarok man glak. Nwng abono pai si di, ang pai li ya.”

⁷A jora-o ha paina eba sláinani raida omo hai, phalnai bororokni yaklapno khugwi painaino ma rw-o. Omo hai khe kók sachu laimano Israilrok sói khe chongo.

⁸“Nwng’-no pai si di” hwnwi a borok Boasno sa kheno, bo bini yaklap khugwi Boasno rw kha.

⁹Hakhe Boas aro tongnai tẃiphangrokno tei kubun bororokno hai hwnwi sa kha, “Norok wng kha mokol baithang nuknairok, tini ang Noamini aroni Elimelekni bebak tong-kwrwi, Chilion tei Malon a bwsa khoroknwini tong kwrwino paiwi na kha.

¹⁰Aboni bising tẃi’-no, Moabjwk Rut Malonni bihik randijwk ani hik wng kha. Omo hai khe tabuk harok a thwinaini bosongni’-no tong rwknai. Omo hai kheno bini bosong kamiyungo tong rwknai. Norok omono mokol baithang nuk bai kha.”

¹¹Tẃiphangrok tei kubun bororok hai hwnwi sa kha, “Chwng mokol baithang nuk kha. Subraiyung nihikno, Rahel tei Lea hai khlai thung, bórok Jakobni bagwi bwsa kwbángma ba kha. Nwng Ephratha bosongni rang gwnang tei mung gwnang wng di.

¹²Subraiyung nono rwma o bwrwini bising tẃi bwsa rwma Peresni núkhungni Judai bai Tamarni bwsarok hai wng thung.”

¹³Hakhe Boas Rutno káijagwi hik snamwi nogo tlangwi tháng kha. Subraiyung Rutno hamari rw kha, bo ogo bwsa wngwi bwsa chwla khoroksa bá kha.

¹⁴A bwrwi Noamino hai hwnwi sa kha, “Subraiyungno lob di, Subraiyung nono súk chwla khoroksa nono bai nana bagwi rw kha. O chwrai Israil bosongni mung gwnang wng thung.

¹⁵Nini hamjwk nono hamjago. Sajla khoroksnini slái’-bo bo nini bagwi bára khlai kha. Bo tabuk nono súk chwla khoroksa rw kha. Bo nono tabuk langma kwtal rwnai tei nwng chakra phuru khe bo nono naiwi-nugwi tonnai.”

¹⁶Noami a chwraino naui bamwi na kha tei bai naui tor rw kha.

¹⁷Nok-arini bororok, a chwraino Obed hwnwi mung phar kha. Bórok bebakno hai hwnwi sa kha. “Noamini bagwi chwla bwsa khoroksa achai kha.” Obed Jisaini bupha wng kha, bo’-no Daudni bupha.

¹⁸Tabuk omono Peresni bosongrok.

¹⁹Peres wng kha Hesronni bupha, Hesron khe Ramni, Ram khe Aminadabni.

²⁰Aminadab khe Nasonni, Nason khe Salmonni.

²¹Salmon khe Boasni, Boas khe Obedni,

²²Obed khe Jisaini tei Jisai khe Daudni bupha.