Read Kok Borok 1 SAMUEL 11 Bible Online

1 SAMUEL 11 - Kok Borok bible

1 SAMUEL 11

¹Aphuru Ammonni habugra Nahas Giliad amchoini Jabes kami kotorno segwi na phai kha; tei Jabesni bebak bororok Nahasno hai hwnwi sa kha, “Chwng bai kók kha lai si di, hakhe chwng nono mon lai si anw.”

²Tamo khe Ammonsa Nahas bórokno hai hwnwi sa kha, “Omo hai khe kaisa soi khe se ang norok bai kók kha lainai, norokni bebak yagrani mokol ekhregwi khibinai, hakhe Israilo ur phnangnai.”

³Jabesni tẃiphangrok bono hai hwnwi sa kha, “Chwng bebak Israil amchoirogo tẃitun rohorwi sa hornani bagwi salsni jora rw di, chwngno khoroksa phano chuba ya khe, chwng sakno nini thani yapharnai.”

⁴Tẃitunrok Sol tongmani Gibea-o sók phaiwi bororokni thani sa phai khe bebak bororok chirik laiwi kap lai kha.

⁵Tabuk Sol khe musuk bai khe panthorni kiphilwi phaidrop se tei Sol hai hwnwi sẃng kha, “Tamo wngwi bororok kap lai?” Bórok Jabesni bororok sa phaimani kókno sa kha.

⁶Sol abono khna khe Kaitorni phola bini thani phankrak khe phai kha, bo belai joli kha.

⁷Bo musuk chwla jorsa naui abono bophon bophon khe helebwi abono tẃitunrokni yak tẃi bebak Israil amchoirogo tlangnani rohor kha tei hai hwnwi sa kha, “Sol bai Samuelni logi tháng ya bororokni musuk chwlabo abo hai khlaijaknai!” Aphuru Subraiyung tamo khlai langno Israilni bororok belai khe kiriui bebak thansa khe ongkhorwi phai lai kha.

⁸Sol bórokno Bejego thum kha, aro Israilni khorok 300,000 tei Judani khe khorok 30,000 wng kha.

⁹Bórok phainai tẃitunrokno hai hwnwi sa kha, “Jabes Giliadni bororokno norok abo hai khe sa di, khwna omo hai sal kutungni jora norok phiyókjak bainai.” Tẃitunrok phaiwi Jabesrokno sa phai khe bórok belai tongthok lai kha.

¹⁰Hakhe Jabesni bororok Nahasno, “Khwna chwng sakno nini thani yapharnai, hakhe nini muchung tẃi nwng khlai di,” Hwnwi sa kha.

¹¹Teini salo aidrobo Sol bini bororokno bodol kwtham khe khak kha, bórok kena arirokni bathamo phaiwi sal dibor wng ya sak Ammonsarokno buthar lai kha tei kwthang tongnairok khárwi tháng bai kha, bórokni bisingo khoroknwi suda yakarwi klangjak li ya.

¹²Hakhe Israilni bororok Samuelno hai hwnwi sa kha, “Sol de chini bugra wngnai hwnnairok biyang? Abórokno butharnani oro tubu di.”

¹³Phiya ba Sol, “Tini khoroksabo butharjak glak, tamni hwn ba Subraiyung tini Israilsarokno phiyókmani sal,” hwnwi sa kha.

¹⁴Hakhe Samuel bororokno hai hwnwi sa kha, “Phai di, chwng Gilgalo tháng laiwi tei uáisa Solno chini habugra hwnwi sakhlai anw.”

¹⁵Hakhe bórok bebak Gilgalo tháng laiwi aro Subraiyungni bwskango Solno habugra hwnwi sakhlai kha. Bórok aro khakchang yapharmung yaphar lai kha, Sol tei bebak bororok belai khe tongthok lai kha.